أجمد 5 Smart Phones فى كايرو! ٢٠١٦
مع انتشار وسائل التعبير والتواصل وبرامج السوشيال ميديا، أصبح اقتناء Smart Phone مش اختيار كمالي على الإطلاق. ومع انتشار وتنوع أنواع السمارت فونز والإختلافات الكبيرة بين أنواعها وإمكانياتها.. بنقدم لكم فى كايرو360 عرض بأجمد 5 smart phones فى مصر، مع توضيح إمكانيات كل تليفون وسعره التقريبي…. ما تشتريش قبل ما تقرا الموضوع ده!
- أيفون 7
فى رأينا هو الموبايل الأقوى فى مصر حالياً، وممكن نقول إنه الأفضل والأقوى على مستوى العالم كمان…
أيفون 7 هو أحدث إصدار من سلسلة هواتف Apple الذكية. بيتباع فى إصدارين أساسيين الأول بإسم أيفون 7 والثاني أيفون 7 بلس، واللى بييجي بحجم شاشة أكبر وكاميرا إضافية فى الخلف لتقوية قدرة الجهاز على التقاط الصور والفيديوهات.
أي تليفون من الإتنين سعته التخزينية إما 32 أو 128 أو 256 جيجا بايت. ومن المعروف أن السعة التخزينية لأجهزة أبل غير قابلة للزيادة لإن الجهاز مش بيقبل إضافة Memory Card عكس باقي الأجهزة اللى بتطلقها شركات تانية.
من أفضل الإمكانيات فى أيفون 7 و 7 بلس الكاميرا المتميزة بدقة 12 ميجا بكسل للكاميرا الخلفية و 7 ميجا بكسل للكاميرا الأمامية. أما الرامات الخاصة بالجهاز فهى بسعة 2 جيجا بايت و 3 جيجا بايت فى حالة أيفون 7 بلس.
حجم شاشة ايفون 7 هو 4.7 إنش، أما 7 بلس حجم شاشته 5.5 وعلى الرغم من الفرق الصغير بين الرقمين إلا أن الفرق فى حجم التليفونين يستحق التفكير أكتر من مرة قبل الشراء.
كل تليفونات أبل الجديدة بتيجي فيها سيستم10 IOS اللى بنعتبره واحد من أفضل برامج إدارة الهواتف الذكية فى العالم، خاصة إنه غير قابل للإختراق أو التهنيج أو باقي المشاكل اللى بتواجه مستخدمين التليفونات التانية.
بعد ما استعرضنا إمكانيات تليفون أبل الجديد لازم نتكلم فى حاجه مش بنحب نجيب سيرتها فيما يتعلق بأبل: السعر… الحقيقة إن هواتف أبل هى الأغلي تقريبا فى السوق المصري، وبيتراوح سعرها من حوالى 12 ألف الى 18 ألف جنيه، على حسب موديل التليفون وسعته التخزينية والمكان اللى بتشتري منه… غالي شويتين… لكن الغالي تمنه فيه.
- سامسونج S7
المنافس الأقوى لشركة أبل هى بالتأكيد شركة سامسونج.. واللى على الرغم من خروجها بمشكلة كبيرة مع أحدث منتجاتها (جالاكسى نوت7) واللى تعرضت بعض الهواتف منه للإحتراق مع المستخدمين، إلا أن الشركة العملاقة لسه قادرة على المنافسة بقوة على ريادة السوق.
أجهزة سامسونج بتعتمد على نظام أندرويد مفتوح المصدر، واللى يعتبر واحد من أقوي وأهم أنظمة إدارة الهواتف الذكية.. وفى إصدارها الأحداث S7 بتقدم لنا إصدارين أساسيين هم S7 و S7 Edge واللى بييجي بشاشة لها أطراف منحنية لتقديم تقنية مشاهدة وتعامل أفضل مع الشاشة.
5.1 انش هو حجم الـ S7 و 5.5 هو حجم الـS7 EDGE لكن الجهازين بييجوا بكاميرا واحدة خلفية قوتها 12 ميجا بكسل، وأمامية بقوة 5 ميجا بكسل ورامات 4 جيجا بايت.
سعة بطارية S7 هى 3000 MAH أما S7EDGE بطاريته سعتها 3600 MAH يعني هاتدوم لوقت أطول بس مش بكتير قوي عن الـS7 .
نيجي للسعر… السعر بيتراوح بين 10 ألاف إلى 12 ألف حسب الموديل والسعة التخزينية اللى بتختلف مابين 32 جيجا بايت أو 64 جيجا واللى بينفع تزيد باستخدام كروت الذاكرة الى 256 جيجا بايت.
- SONY
بعيداً عن الاسعار العالية لأبل وسامسونج، بتقدم سوني مجموعة من الهواتف الذكية المتميزة فى شكلها وامكانياتها المتناسبة مع سعرها.. اخترنا لكم منها الإصدار الأحداث Sony Xperia XZ المقاوم للماء واللى بيتمتع بشكل خارجي وتصميم أنيق.
بحجم شاشة 5.2 انش وبطارية بسعة 2900 mah ورامات 3 جيجا بايت بييجي الهاتف الجديد من سوني، واللى كالعادة بتنتجه الشركة بحيث يكون مضاد للماء وبنظام Android الشهير لإدارة الهواتف الذكية.
كاميرا تليفون سوني الجديد 23 ميجا بكسل، أما الكاميرا الأمامية 13 ميجا بكسل، وبكده تكون سوني بتقدم تليفون متميز جداً فيما يتعلق بالكاميرا وقوتها وقدرتها على التقاط الصور الثابتة أو الفيديو.
على الرغم من عدم انتشار منتجات سوني بين المستخدمين فى مصر بشكل كبير إلا أن اللى بيحبوا منتجاتها وبيتعودوا عليها مش بيقدروا يسيبوها بشكل سريع وينتقلوا لمنتجات تانية. علشان تليفونات سوني من الأجهزة اللى بتدي امكانيات كويسة لمستخدميها مقابل سعر جيد.
فيما يتعلق بالسعر.. التليفون الجديد من سوني بحوالى 7000 جنيه لكن مافيش عندنا تأكيدات نهائية بخصوص السعر لحد دلوقت.
4.HTC
من الشركات اللى قدرت تحقق سمعة وإسم جيدين جداً فى الأسواق العالمية وخاصة الأسواق المصرية، وعملائها بيتمتعوا بمستوي عالي جداً من الولاء للشركة ومنتجاتها وحبهم لها، خاصة وأن التليفونات بتتمتع بشكل متميز وتصميم قوي وسعر مناسب فى نفس الوقت.
اختارنا لكم HTC10 اللى بييجي بكاميرا خلفية 12 ميجا بكسل وأمامية 5 ميجا بكسل، ورامات 4 جيجا بايت و شاشة 5.2 بوصة بتصميم متميز ومتين جداً وشيك لدرجة كبيرة.
بنلاحظ إن تليفون HTC مش متميز بدرجة كبيرة فيما يتعلق بالإمكانيات، لكنه متميز فيما يتعلق بالتصميم والشكل وحجم الشاشة، كمان صوت الجهاز ممتاز جداً فى تشغيل السماعات الخارجية Speakers لو كنتم من محبي تشغيل الموسيقي وسماعها فى كل مكان.
سعر HTC10 حوالى 10 ألاف جنيه وممكن يكون سعره مرتفع مقارنة بباقي الأجهزة، لكن زى ما قولنا سعره بيضاهيه تصميم متميز وامكانيات مناسبة.
5: HUAWEI
بتدور على تليفون بإمكانيات ممتازة وسعر قليل؟ HUAWEI بيمثل كلمة السر فى المعادلة دي.. علشان كده اختارنا لكم HUAWEI mate8 واللى سعره حوالى 7500 جنيه على الرغم من مواصفاته المتميزة اللى لو دورنا على شبيهها فى موديلات تانية مش هايقل السعر عن 11 ألف على سبيل المثال!
HUAWEI بييجي بسعة تخزين 64 جيجا بايت وشريحتين اتصال و 4 جيجا بايت رامات و شاشة 6 إنش بكفاءة HD وده يخليه واحد من أقوي شاشات الهواتف الذكية اللى شوفناها بالسعر ده.. كمان التصميم الخارجي للتليفون متميز جدا، وأداؤه الداخلي عالي قوي لعمله بنظام أندرويد الشهير.
الكاميرا الخلفية للتليفون 16 ميجا بكسل والأمامية 8 ميجا بكسل وده بيخلي امكانياته فى التصوير متواضعة شويه خاصة فى صور السيلفي، لكن سعر الجهاز مقارنة بمواصفاته بتخليه دايما صفقة رابحة للناس اللى بتدور على السعر الأرخص بدون ما تخسر كتير فى المواصفات.
عالم السمارت فونز بيتغير كل يوم… وكل واحد له رأي ممكن يكون متفق أو مختلف معانا فيه.. عاوزين نشوف فى التعليقات أنواع تليفوناتكم وأسعارها، وهل تنصحوا باقي المستخدمين بيها أم لا؟
