أفلام عيد الأضحى 2018 .. أفلام قوية.. على غير العادة!
على الرغم من أننا بقى لنا فترة طويلة متعودين على أن مواسم الأعياد مش بينزل فيها أفلام قوية في الغالب، لأن منتجي ومخرجي الأفلام التقيلة بيحبوا يبعدوا بيها عن (معجنة) الأفلام في مواسم الأعياد، لكن من الواضح أن سنة بعد سنة موسم عيد الأضحى بيكتسب قوة وزخم من حيث نوعية الأفلام المعروضة فيه. تعالوا نتعرف أكتر على الأفلام اللي بتتنافس على عيديات عيد الأضحى 2018!
تراب الماس
واحد من أهم وأكثر الأفلام ترقبا في عالم السينما العربية بشكل عام. السبب الأول لأهمية الفيلم هو مؤلفه أحمد مراد. شاب صغير في السن نسبيا قدر يحقق نجاح مميز ويفرض أسمه كواحد من أحسن الروائيين الشباب في مصر مؤخرا. روايته الفيل الأزرق تحولت لفيلم سينمائي كسر الدنيا حرفيا (اتعرض في موسم عيد الأضحى 2014) ومن الواضح أن نفس الفريق (أحمد مراد في التاليف ومروان حامد في الإخراج) قرروا يعيدوا النجاح تاني مع تراب الماس. مع فريق عمل بيضم أسماء بحجم ماجد الكدواني ومنة شلبي واسر ياسين. منه وماجد شاركوا قبل كده في بطولة فيلم (الأصليين) اللي كتبه مراد برضو.
تراب الماس بيحكي عن شاب بيشتغل مندوب أدوية بيحاول ينتقم من اللي قتل أبوه القعيد، الأمر اللي بيدخله في عالم شديد التعقيد من العلاقات بين المال والسلطة في مصر.
الديزل
“رايحين فين أنا الملك.. نادي الملوك من فيكم مشترك؟!” بالطريقة دي بيعبر محمد رمضان عن نفسه في أغانيه اللي بتثير كتير من الجدل (وملايين المشاهدات على يوتيوب) لكن هل هايقدر يحصد نفس النجاح في صالة العرض؟ فيلم الديزل هو أحدث أفلام محمد رمضان اللي بيوصف نفسه دايما أنه (نمبر وان) في عالم التمثيل.
في الديزل رمضان بيعلب دور دوبلير خاطب بنت بتشتغل مساعدة لفنانة مشهورة، لكن الأحداث بتتطور على عكس المتوقع تماما وبتاخدنا لمنطقة جديدة ومختلفة من الأحداث. الديزل من أخراج كريم السبكي وبيشارك رمضان البطولة فتحي عبد الوهاب وهنا شيحة وشيماء سيف.
البدلة
وبعد نجاحه الكبير في الكليبات اللي قدمها مؤخرا، تامر حسني بينزل ساحة التمثيل من جديد مع فيلم البدلة، وبيشاركه البطولة أكرم حسني اللي حقق نجاح كبير في مسلسل الوصية رمضان الماضي وماجد المصري وأمينة خليل وغيرهم.
البدلة بيحكي عن شاب (تامر حسني) بيتلقى دعوة حضور حفلة فا بيروح لابس بدلة ضابط، الأمر اللي بيدخله في سلسلة من المواقف الكوميدية وغير الكوميدية اللي بتتفجر مع الأحداث.
البدلة من اخراج محمد جمال العدل وتأليف أيمن بهجت قمر.
بني أدم
يوسف الشريف بعد ما فضل ما يقدمش دراما في رمضان الماضي علشان يتفرغ لفيلمه الجديد، وبعد الدعاية المكثفة اللي شاركت فيها الستايلست والمؤلفة انجي علاء، واللي قدرت تخلينا منتظرين الفيلم على أحر من جمر.. أخيرا هانشوف فيلم بني أدم في عيد الأضحى 2018 واللي بنتوقع أنه يكون من أهم الأحصنة المنافسة في السباق. الفيلم من إخراج أحمد نادر جلال اللي صنع مسلسلات رائعة مع الشريف، ومن تأليف عمرو سمير عاطف اللي بيشكلوا مع بعض ثلاثي (أحمد ويوسف وعمرو) متميز.
سوق الجمعة
من نفس الروح العامة لأفلام زي الفرح وكباريه وساعة ونصف.. بنشوف فيلم سوق الجمعة اللي أخرجه سامح عبد العزيز وتأليف أحمد عادل سلطان عن قصة محمد الطحاوي. بناخد جولة على مدار أحداث الفيلم في سوق الجمعة وقصص الناس اللي بترتاد السوق.
سوق الجمعة من بطولة محمود الجندي و عمرو عبد الجليل (اللي قدم دور عمره في مسلسل طايع رمضان اللي فات) ودلال عبد العزيز و شمم الحسن.
الكويسين
أما الكوميدية في العيد فا هاتكون مع فيلم الكويسين.. مع عيله اسمها (كويس) اللي يشوفها من بعيد يحسب انها عيلة عادية لكنها أبعد ما يكون عن العادية من خلال المواقف الكوميدية المميزة اللي بتحصل طوال أحداث الفيلم.
الكويسين من بطولة بيومي فؤاد و أحمد فهمي وحسين فهمي و شيرين رضا مع مشاركة من النجمات الشابات أسماء أبو اليزيد و تارا عماد و جيلان علاء. والفيلم من تأليف ايمن وتار وأخراج أحمد الجندي.
بيكيا
محمد رجب الممثل المميز راجع مع دور قوي وحاطين عليه أمال عظيمة. رجب بيقوم بدور عالم بيقوم بأبحاث في مجال علاج الأمراض المستعصية والخطيرة لكن بيتم التأمر عليه من منظمة أجنبية، الأمر اللي بيخليه يتنكر في شخصية جديدة لحد ما ينتهي من البحث الخاص به.
الفيلم من تأليف محمد سمير مبروك وأخراج محمد حمدي وبطولة ايتن عامر ومحمد لطفي و ميرنا جميل
