إعلانات رمضان ٢٠٢٥: ميزانيات ضخمة وأفكار جوه الصندوق
قليلين الناس اللي بتقدر قيمة الإعلانات الحلوة.. الحقيقة اننا مش بنحس ان الإعلانات هي مجرد مشاهد دعائية عن منتج او خدمة معينة. لكن الإعلانات فن توصيل رسالة معينة في زمن قليل وبشكل مكثف واحترافي جدا. ومن هنا بتيجي أهمية موسم رمضان، علشان ده الموسم اللي بتتنافس فيه الشركات انها تقدم اعلاناتها الجديدة اللي بقت منتج فني له جمهور قائم بذاته زي جمهور المسلسلات كده. تعالوا نشوف موسم رمضان ٢٠٢٥ اعلاناته كانت عامله ازاي
البداية مع فودافون، صاحبة الإعلان الأضخم من حيث الميزانية، بنشوف أغنية نانسي عجرم (ماتيجي نعيش) اللي بيظهر فيها نانسي ومحمد صلاح مع أطفالهم. الإعلان بسيط ومباشر وبيأكد على ضرورة التركيز على اللحظة الحالية اللي بنعيشها واننا مانشغلش بالنا بإيه اللي هايحصل في المستقبل، لإن المهم هو اللحظة الحالية وبس.
كالعادة فودافون مش مهتمة تعلن عن خدماتها بشكل مباشر، هي بس مهتمة توصل رسالة: احنا اقوى أغلى أهم براند اتصالات في مصر وبنجيب نجوم الصف الأول في الرياضة والفن تعمل لنا إعلانات.
من فودافون الى البنك الأهلي، اللي تميز السنين اللي فاتت بإعلانات جميلة جدا ومتعوب عليها سواء من حيث الأفكار أو التنفيذ. السنة دي بنشوف اعلان الأهلي عبارة عن أغنية لمحمد حماقي مع ويجز، بتركز على فكرة ان الانسان لو عايز حاجه هايقدر يعملها مهما كانت صعبة، الإعلان متعوب عليه وفيه شغل كتير بالـ AI
الإعلان بيلعب على نفس النقطة اللي تميزت بيها إعلانات البنوك عموما اللي نقدر نسميها “إعلانات التنمية البشرية” لكن المرة دي مع توظيف تقنيات حديثة بتديله رونق مختلف.
أما أورانج فا ركزت على فكرة التواصل بين الناس، واننا مهم نسأل على بعض حتى لو كل (يومين) زي ما بتقول الأغنية اللي غناها حسين الجسمي مع أداء تمثيلي من أحمد داوود و سلوى محمد علي و ريهام عبد الغفور وغيرهم، وطبعا الإعلان بينتهي بمفجأة حلوة هي الظهور الخاص للفنان أحمد عز. وهنا اورانج بتلعب في منطقة التواصل الإنساني والعلاقات بين البشر كمدخل للإعلان عن خدماتها ودي حركة ذكية منها.
وبما اننا بنتكلم عن شركات الاتصالات فا ماينفعش ننسى اعلان WE اللي ركز على فكرة القرب بين الناس من خلال اغنية تامر حسني اللي كلها أحضان تقريبا. الإعلان بيورينا قيمة القرب بين الناس في كل المواقف. وأهمية التقارب بين البشر بشكل عام. ونقدر نقول ان اعلان WE السنة دي مش بيقدم جديد وبيلعب في المنطقة المعتادة بتاعة كل سنة.
العربي جروب حب يضرب عصفورين بحجر ويحتفل برمضان مع عيد الأم من خلال اعلان يارب يخلي ماما. اعلان ظريف وخفيف مع اغنية سهلة الكلمات وأجوائها عائلية وجميلة عن أهمية الأم في حياتنا. ده اعلان ذكي ومميز من العربي جروب اللي أصبحت بتعمل إعلانات Creative جدا الفترة الأخيرة.
ولو العربي ضربوا عصفورين بحجر واحد فا (بلبن) دخل رمضان بإعلانين مش إعلان واحد.. الأول وده المميز أكتر من وجهة نظرنا مع أكرم حسني بفكرة ذكية عن اعتذار بلبن. لكنه اعتذار اعلاني مش حقيقي، أما الإعلان الثاني مع الفنان محمد ثروت وهو برضو اعلان كويس لكن في رأينا ان الأقوى هو اعلان أكرم حسني.
أما وادي دجلة فا قرروا الاحتفال على طريقتهم من خلال أغنية محمود العسيلي، مع أداء تمثيلي ظريف جدا من ماجد الكدواني. اعلان خفيف وظريف لكن مؤثر في نفس الوقت
وأخيرا مع ليبتون.. اعلان تقليدي شويتين عن اللمة وازاي ليبتون بيظبط أي لمة. والحقيقة اننا مش حاسين ان الإعلان بيقدم جديد.
صناع الإعلانات في رمضان ٢٠٢٥ بيلعبوا كلهم من منطقة الأمان، ماحدش عايز يجرب حاجه بره الـ comfort zone بتاعته. على الرغم من أن كل الشركات أصبحت راصده ميزانيات ضخمة لاعلاناتها، بس أكترها بتروح في أجور الفنانين، وده معناه ان أي شركة هاتخاطر وتقدم اعلان بفكرة جديدة هاتاكل الجو، مهما كانت فكرتها بسيطة، المهم انها تبقى جديدة ومبتكرة علشان خلاص المُشاهد وصل لحالة من التشبع.
