إعلانات رمضان 2018
على الرغم من المبالغ الطائلة اللي بيتم دفعها في رمضان على إنتاج الأعمال الدرامية والإعلانية على حد سواء. لكن بشكل عام عندنا شعور أن الإنتاج الفني والدعائي في رمضان السنة دي مش في أفضل حالاته.
وبشكل عام لاحظنا حالة من تكرار الأفكار والقصص على صعيد المسلسلات. والإعلانات كمان ما اختلفتش كتير عن إعلانات السنين اللي فاتت. تعالوا نبص على أحدث إعلانات رمضان 2019 وتقييمنا لها. خاصة إعلانات شركات الاتصالات
أورانج: خليك إيجابي
https://www.youtube.com/watch?v=_gOux1Epe18
أورانج بترجع لنا السنة دي بإعلان بيشترك فيه نانسي عجرم وتامر حسني. اثنين من ألمع الأسماء في عالم الفن في مصر ولبنان والمنطقة العربية بالكامل. الإعلان السنة دي بيتكلم عن أهمية التفكير الإيجابي وإزاي تصرف صغير ممكن يعمل (فرق كبير)
الإعلان بيركز على تصرفات صغيرة ممكن نعملها في حياتنا اليومية تفرق في حياة الناس اللي حوالينا بشكل كبير. بداية من مناولة تامر حسني للميكروفون الواقع على الأرض لنانسي. مرورا بمساعدة تامر للشباب علشان يوصلوا امتحانهم وهكذا.
عجبنا في الإعلان انه مش بس بيركز على تصرفات صغيرة. لكن كمان كلمات صغيرة. زي التعبير عن مشاعرنا للناس وازاي ده بيفرق في علاقتنا بيهم ونظرتهم هم نفسهم للحياة.
اللون البرتقالي كان هو المسيطر على الإعلان. زي الورد في ياقات جاكتة تامر وصحابه في مشهد الاستعداد للفرح أو حتى لون الأكل في مشهد المحل لنانسي
أما أحلى ما في الإعلان فعلا كان ظهور الفنان مصطفى هريدي واللي شارك تامر في فيلم عمر وسلمى. وكان فيه كلام كتير عن سفر مصطفى خارج مصر بعد احساسه بعدم جدوى العمل في الوسط الفني في مصر لكننا بنشوفه في الإعلان مع خلفية الأهرامات كإشارة واضحة أنه موجود ومؤثر.
لكن ماعجبناش في الإعلان أن مستواه أضعف من إعلانات السنين اللي فاتت. خاصة الإعلانات اللي كانت بتركز على قطاعات مختلفة في مصر زي النوبة والصعيد والدلتا. ودي حاجه كانت غايبه تماما عن الإعلان اللي كان مافيهوش أي تنوع جغرافي أو اجتماعي.
فودافون والكينج.. أنا مهما (كبرتوا) صغير!
https://www.youtube.com/watch?v=guLORQtCp_U
فودافون لسه مكملة السنة دي برضو مع فكرة لمة العيلة. لكن بتاخدها لمستوى تاني خالص مع الاستعانة بعمرو دياب ومجموعة من الفنانين الكبار في الإعلان.
أحلى حاجه في الإعلان كانت الإستعانة بشخصيات حقيقية. زي عم عمرو دياب وابن عمه. وناس حقيقية من صحابة البعيدين عن الوسط الفني. كمان بنشوف مشاهد نادرة لحفلات قديمة لعمرو ولقطات وصور قديمة حقيقية.
كمان عجبنا قوي المزج بين فكرة (الفريق) اللي بتطرحها فودافون علشان مستخدميها يحصلوا على عروض خاصة وبين (فريق) عمرو دياب اللي بنشوفه بيلعب معاهم كوره. طبعا الكل كان مذهول من فارق الشكل بين عمرو وصحابه رغم التقارب في السن بينهم. وده اللي خلى البعض يؤكد على فكرة أن عمرو مش بيتقدم في السن ومش بيبان عليه.
عجبنا كمان أن رسالة الإعلان مش بس عن التجمع مع العيلة. لكن كمان مع صحاب الشغل اللي بيبقوا مع الوقت اقوى من العيلة زي افراد فرقة عمرو دياب. وطبعا الظهور الأسطوري لعزت أبو عوف والمقارنة بين مشهد ظهوره مع عمرو زمان ودلوقت.
كمان بيظهر في الإعلان دينا الشربيني اللي بيدور اشاعات كتير عن ارتباطها بعمرو. لكن من ناحية تانيه استغربنا وماعجبناش ظهور ممثل صغير في السن زي أحمد مالك في اعلان المفروض بيجمع عمرو بصحابه زمان! كمان ظهور فنانين مش معروف علاقتهم بعمرو زي ريهام عبد الغفور أو منه شلبي. والموضوع ده خلى ناس كتير تقول أن ظهورهم في الإعلان كان بسبب صداقتهم لدينا الشربيني مش لعمرو!
إتصالات: فكرة مكررة مع ليفل أعلى
https://www.youtube.com/watch?v=2wq_YjAuqvk
إتصالات هي كمان مكمله في نفس الخط اللي بدأت فيه قبل كده بتاع التحدي بينها وبين الشبكات التانيه. بس المرة دي بتاخد الموضوع لليفل أعلى بكتير مع الاستعانة بنجم عالمي زي جان كلود فان دام واللي ظهر مع محمد رمضان للمرة الأولى، وتكلم بالعربي كمان في بعض مشاهد الإعلان.
من الحاجات الكويسة في الإعلان اننا شوفنا فان دام بشكل مختلف. وبنيولوك مصري تماما خلاه زي بلطجية أفلام الستينات اللي كان فريد شوقي بيضربهم في (الخمارة).
عجبنا قوي كمان الديكورات اللي استمدت تصميمها الأساسي من أفلام فان دام الشهيرة زي street fighter وسلسلة (لا تراجع ولا استسلام) اللي حققت شهرة كبيرة في مصر وسابت بصمتها في عقل كل مواليد الثمانينات والتسعينات تقريبا.
لكن من ناحية تانيه مش عاجبنا استخدام نفس الفكرة المهروسة بتاعة التحدي والأفضلية. وحسينا أن اتصالات عملت اعلان ونجح ومن يومها وهي بتلعب على نفس التيمة بدون أي نوع من التغيير. وده عيب تشترك فيه اتصالات مع باقي الشركات اللي ماغيرتش كتير عن نفس أفكار السنين اللي فاتت لكن على الأقل باقي الشركات بتلعب على تنويعات جديدة للأفكار دي
الأرقام تتكلم!
لم هانتكلم عن إعلانات رمضان 2019 بالأرقام هانلاقي أن صعب نحصر عدد مرات مشاهدة لاعلانات بدقة 100% خاصة ان بعض الإعلانات بيتم عرضها على اكتر من قناة على يوتيوب بالتالي المشاهدات بتتوزع. لكن نقدر نقول ان اعلان فودافون هو الأعلى من حيث المشاهدة بحوالي 20 مليون مشاهدة واورانج حوالي 7 مليون مشاهدة واتصالات حوالي 15 مليون مشاهدة
أما ترتيبنا النهائي لإعلانات شركات الاتصالات في 2019 هايبقى المرتبة الأولى فيها لإعلان فودافون يليها أورانج ثم اتصالات في النهاية
