استاذ ورئيس قسم : الزعيم يسخر من الكل

للمره اللى مش عارفين كام للتعاون بين الزعيم عادل امام والمؤلف يوسف معاطي، وللمرة الاولى منذ اكتر من مسلسل لم يستعن عادل امام بابنه رامي فى اخراج اعماله، او ابنه محمد فى مشاركته البطولة، وان كان استعان بهيثم احمد زكي ابن الفنان الراحل الشهير –يعني ما راحش بعيد برضه- واضح ان عادل امام عرف سر الخلطة اللى بتعجب الجمهور كل سنة، وقرر انه يقدمها مرارا وتكرارا!

بتبدأ الحلقة الأولى بمشاهد اختطاف وضرب عادل امام اللى بنعرف انه بيشتغل استاذ ورئيس قسم الحشرات فى احدي الجامعات المصرية.. ميوله السياسية اليسارية واراؤه اللى ضد الدولة بشكل عام وضد رئيس الوزراء بشكل خاص بتخليه دائما عرضه لاضطهاد اجهزة الامن ومعاملتهم السيئة معاه.

بيبدأ فوزي جمعه فى تاسيس حزبه (ايه) اللى بيعتبر حزب سياسي يساري مناهض لسياسات الحكومة.. الامر اللى بيفجر حالة من السخرية من كل الاحزاب سواء معارضه او مع الدولة.. بالاضافة للنشطاء السياسيين وكل العاملين فى المشهد السياسي المصري.. اللى تحول بالفعل مؤخرا للوحة سريالة ساخرة كبيرة.

عادل امام لسه قادر على العطاء الفني على الرغم من تقدمه فى السن، لكن مشكلته الوحيده انه متخيل انه هايقدر يؤدي نفس الادوار القديمة بكل ما فيها من تعاطي خمور وعلاقات نسائية، وكان امام لا يزال ساحر النساء وزير النساء الاول وهو امر لم يكونه عادل امام فى بدايته او متوسط مسيرته بالتالى من غير المنطقى انه يطلع النهرده فى نفس الدور! وكان عجبنا فى (صاحب السعادة) انه كان اكثر انحيازا لدور الاب والجد عن اي دور تاني.

احداث ثورة 25 يناير بتندلع فى المسلسل فى الحلقة السادسة تقريبا، وبيبدأ المسلسل يرصد التغيرات اللى حصلت فى المجتمع المصري بعد الثورة باسلوب ساخر، وعلى الرغم من مواقف عادل امام ضد الثورة، الا انه بيظهر فى المسلسل كمنحاز للثورة، وده مش جديد على الوسط الفني اللى ظهر فيه خالد الصاوي مثلا كرجل ضد الثورة بينما هو فى الحقيقه منحاز لها قلبا وقالبا.

استاذ ورئيس قسم مسلسل تقليدي لعادل امام بيسخر فيه من كل شىء واي شىء.