استدعاء ولي عمرو : النتيجة.. لم ينجح أحد!
عارفين لما تبقوا مسافرين على طريق سفر طويل وممل وعاوزين تتفرجوا على فيلم يضيع الوقت. أو تلاقوا فيلم شغال في أتوبيس السوبر جيت تتابعوه بنص مخ؟ هو ده بالظبط اللي بيقدمه “استدعاء ولي عمرو” لكن للأسف اللي شاركوا في الفيلم مكانوش عارفين أنهم بيقدموا لايت كوميدي!
“استدعاء ولي عمرو” بيحكي عن طالب شقي في المدرسة. وبيجيله استدعاء ولي أمر. وفي الوقت ده بيقرر أهله (حورية فرغلي و محمد عز) يجمعوا أصدقاء الدراسة القدامى من جديد.
لو كان ده الخيط الدرامي الأساسي اللي التزم بيه محمد سمير مبروك المؤلف و أحمد البدري المخرج كان ممكن الفيلم يكون لطيف وكوميدي مع شوية أغاني خفيفة وخلاص. لكن الفيلم عند مرحلة معينة بيحاول يتكلم عن مشاكل التعليم والطلاب والمدرسين. وللأسف ده حصل بطريقة انشائية شويه.
الفيلم بيشهد مفاجأة لطيفة هي عودة الفنانة سماح أنور للتمثيل. ونتمنى نشوف مشاركات أكتر لها الفترة الجاية لكن ياريت تخرج من إطار الشخصيات المثالية الحالمة.
لو بنقيم الفيلم كفيلم بيدي للناس رسالة وقيمة وهدف. الفيلم هايكون ضعيف على كافة الأصعدة. لكن لو شوفنا الفيلم كفيلم خفيف ينفع للمشاهدة في السفر أو لتضييع الوقت زي ما قولنا هايكون كويس في الفئة دي.
