افضل 10 افلام فى 2015

لازم نعترف ان سنة 2015 كانت مميزة جداً على الصعيد السينمائى.. من حيث الافلام اللى تم طرحها او النجوم اللى خاضت مباريات حقيقية فى التمثيل والأداء.. المخرجين اللى انفقو كتير من الوقت والجهد علشان يقدموا افلام حقيقية وقوية وقادرة على المنافسة فى سوق لا يرحم.. كل العوامل دي جعلت اختيارنا لافضل 10 افلام فى 2015 صعب ومحير الى اقصى درجة.

لازم نعترف ان بعض الأعمال تم استبعادها من القائمة فقط علشان نقدر نقدم لكم 10 افلام فقط، والبعض الاخر تم استبعاده علشان نقدر نقدم تشكيله مختلفة من الافلام اللى تناسب كل الأذواق.. واللى بتـ… ما تيجوا نشوف :)..

10. He Named Me Malala

في رأينا هو أفضل فيلم وثائقي فى 2015 لأنه قدر يخرج بالفيلم الوثائقى من الجانب الممل والتقريري، الى جانب اشراكنا فى حياة ابطال الفيلم انفسهم، وتحويلهم لممثلين فى فيلم بيحكي قصة حياتهم! ولما القصة دي كمان تكون اصلية وقوية ومثيرة ومختلفة.. ساعتها بس حسينا اننا امام عمل استثنائى وقوي ومؤثر.

9. inside out

فى راينا الفيلم اللى اخرجه وألفه بيتي دوكتر يعتبر احسن فيلم انيميشن فى 2015، والميزة فى الفيلم انه مش بيكتفى فقط بتوجيه رسالته الاساسية للصغار بل بيخاطب الكبار ايضا، احنا كمان ممكن نروح لأبعد من كده ونقول ان الفيلم له طابع فلسفي جميل ومحبب ومختلف عن باقى أفلام الأنيميشن التانية. جدير بالذكر ان الفيلم يعتبر واحد من احدث واكبر واهم اصدارات شركة (بيكسار) العالمية فى مجال الأنيميشن.

8Kingsman: The Secret Service

السبب الرئيسيى لاختيارنا Kingsman بيتمثل فى قدرته على تقديم اكتر من تيمة من خلال احداثه.. بداية من السخرية والكوميديا ومحاكاة افلام الجاسوسية الشهيرة، وانتهاء بتقديمه جرعة حقيقية من الأكشن الصادق والمتميز واللى خلانا مشدودين لمتابعة الأحداث من البداية للنهاية، الفيلم كمان حقق واحدة من اكبر ايرادات الافتتاحات فى هوليود بمجرد عرضه فى الولايات المتحدة.

7.قدرات غير عادية

رائعة المخرج والمؤلف داوود عبد السيد، واللى قدم من خلالها عمل فلسفي درامي شيق كعادته.. واللى قدر ياخد لقب افضل فيلم عربى فى 2015 على الرغم من كثرة الانتاجات العربية فى الفترة الاخيرة الا ان كلها كانت ضعيفه ولا ترقى للمستوي المطلوب. لكن (داوود) قدر يقدم فيلم بيجمع بين التشويق والفلسفة والرموز الخفية فى أفلامه، وهى خلطة سينمائية مش بيحبها او يفهمها الا عشاق سينما (داوود عبد السيد) وقدرته الفذة على مخاطبة كل المستويات والعقول فى اعماله.

6.Mission Impossible Rouge Nation

على الرغم من المنافسة الشرسة بين فيلم جيمس بوند الجديد وبين الجزء الأحدث من Mission Impossible الا ان الاخير قدر يحسم السباق لصالحه بعد شعورنا بان جيمس بوند بيعيد تكرار نفسه وبيقدم تيمات محفوظه من الافلام السابقة علشان كده  فى راينا ان توم كروز باحدث افلامه يستحق لقب افضل فيلم اكشن فى 2015 لأنه قدر يقدم أكشن جديد ومختلف ومشاهد صعبة أداها بنفسه، بالاضافة لقدرته على الحفاظ على المشاهدين الأصليين للسلسلة ويظل محتفظ بمتابعتهم واهتمامهم.

5. mad max

لسه فى محطة الاكشن مع فيلم اخر لا يقل تميزاً وان كان يزيد، وهو فيلم Mad Max او (ماكس المجنون) واللى بيقدم لنا رحلة صراع من اجل البقاء .. اختيارنا للفيلم كان نتيجة الأهتمام الغير عادي بالتصوير واخراج مشاهد المطاردات والحركة، واللى تم الاستعانة فيها ببعض الاعبين فى السيرك! الوان الفيلم كمان تركزت على اللون الأحمر القاني بعيدا عن الالوان الهادئة اللى كانت طاغية على باقى الأعمال السنة دي، وده طبعا شىء يحسب للفيلم.

4. by the sea

واحد من افضل الافلام الدرامية فى 2015 واللى كتبته واخرجته انجلينا جولى فى تجربتها الاولى فى الكتابة والاخراج، ومن بطولة زوجها براد بت واللى قدروا يقدموا من خلاله عمل متميز وشديد الخصوصية والقوة، اختيارنا للفيلم كان نتيجة التصوير المتميز والهادىء، والكادرات الواثقة الجميلة واللى ريحت عيوننا واعصابنا وهيأتنا لأستقبال احداث الفيلم اللى لم تقل تميزاً عن باقى عناصره.

3. bridge of spies

على الرغم من تنوع تصنيفات الافلام بين الاكشن والرعب و.. الخ الا اننا لم نجد اي افلام جاسوسية هذا العام، علشان كده جه اختيارنا للفيلم اللى اخرجه ستيفن سبيلبرج ومن بطولة توم هانكس، واللى بيحاولوا ينافسوا به على اوسكار من جديد. الخلطة (الهانك-بيلرجيه) لم تفشل من قبل ابداً، سواء فى Saving Private Ryan وغيرها من الافلام اللى تعاون فيها (ستيفن) مع (هانكس)، والمرة دي فى احدث تعاوناتهم قدموا فيلم هادىء ومشوق وناضج على نار هادئة من الخبرة السينمائية الفذة للأثنين.

2. The Perfect Guy

فى الفيلم ده بتتمثل فكرة البقاء لمدة حوالى ساعتين فى حالة انجذاب كامل لسيناريو قوي ومحكم وحوار مُعبر عن ادق مشاعر الأبطال، وأداء تمثيلي متميز وحبكة درامية أكثر من رائعة.. بنعتقد ان The Perfect Guy من افضل افلام الاثارة والجريمة فى 2015.

1 . Star Wars: The Force Awakens

على الرغم من كونه واحد من الاعمال اللى تم طرحها قبل نهاية السنة بوقت قصير، الا ان الجزء الأحدث من سلسلة (حرب الكواكب) قدر يجمع بين محبى السلسلة القديمة وبحثهم عن (النوستالجيا) فى العمل الجديد، وبين الوافدين الجدد على السلسلة واللى اتلاقوا فيها الاثارة والاكشن والمؤثرات الخاصة الاكثر من رائعة.

قبل ما نختم موضوعنا معاكم، حابين نلفت النظر لوجود بعض الأفلام المحسوبة على 2015 لكنها لم تصدر لحد دلوقت فى السينمات المصرية، على الرغم من تعرضها للتسريب والقرصنة على الأنترنت زي The Hateful Eight و The Revenant واللى بنتوقع انها تكون من افضل الأفلام خلال 2015

منتظرين منكم فى التعليقات ارائكم الشخصية فى اختياراتنا، واختياراتكم انتم الشخصية فى افضل افلام 2015 من وجهة نظركم.. وكل سنة وانتم بخير وسعاده.