الأب الروحي و اختيار إجباري.. مسلسلات قناة DMC الجديدة.
“ولدت عملاقة” .. هو ده الوصف الوحيد اللى نقدر نوصف بيه إنطلاقة مجموعة قنوات DMC اللى قدرت تحقق نجاح كبير فى اليوم الأول لإنطلاقها…
الدعاية المكثفة والكبيرة كانت العامل الأساسي لنجاح القنوات، وحفل الإفتتاح المتميز واللى ضم كوكبة من أفضل نجوم مصر، وتابعة الملايين فى مصر والوطن العربي، وتميز ببذخ انتاجي كبير لعله الميزة الأساسية والمميزة فى كل انتاجات القناة حتي اليوم.
لكن من أمتي كانت الفلوس كل حاجه؟ كان لازم القناة تقدم مجموعة من البرامج والمسلسلات الجديدة بالتزامن مع الإنطلاقة، علشان تأكد مجموعة القنوات على تميزها وريادتها.. علشان كده بنقدم لكم فى الموضوع ده عرض نقدي ومراجعة شاملة لمسلسل (الأب الروحي) ومسلسل (اختيار إجباري).. المسلسلات الجديدة اللى تم عرضها مؤخراً على قناة DMC العامة وقناة DMC دراما.
معلومة على الطاير: تابعوا قنوات DMC على تردد 11449 H على قمر نايل سات.
أولا: مسلسل الأب الروحي:
مسلسل بينتمي لفئة الأكشن والعصابات والدراما، ومن نوعية المسلسلات الملحمية اللى بيتم تقديمها فى أكثر من جزء.. واللى عارفينه لحد دلوقت أن المسلسل مكون من 5 أجزاء، والجزء الواحد 60 حلقة، يعني إجمالي حلقات المسلسل 300 حلقة بالتمام والكمال! علشان كده حبينا ننتظر شويه قبل ما نتكلم عن المسلسل علشان الأحداث تكون بانت ومايكونش عندنا أحكام متسرعة عن المسلسل.
معلومة على الطاير: مخرج الجزء الثاني من المسلسل هو المخرج المنفذ للجزء الحالي تامر حمزه.
الأب الروحي من تأليف محمد جلال و هاني سرحان، ومن إخراج بيتر ميمي ومن بطولة محمود حميده وأحمد فلوكس وأحمد عبد العزيز وسوسن بدر، ومجموعة من الفنانين الشباب زي ميرهان حسن و محمد عادل و حسني شتا و محمد عز و باهر النويهي و كارولين عزمي وعمر الشناوي.
المسلسل بيحكي عن عائلة العطار، واحدة من أقوي وأشهر العائلات فى مجال تجارة السلاح، واللى بيتحكم كبير عائلتها (محمود حميدة) فى باقي كيانات تجارة السلاح فى مصر، وبيرتبط بعلاقات معقدة مع رجال الشرطة ومع باقي أفراد العائلة اللى بنبدأ فى تتبع خطوط سيرهم المعقدة والمتشابكة.
معلومة على الطاير: تم الأستعانة بوحدة تصوير تانية علشان يقدروا يخلصوا المسلسل فى الوقت المحدد له.
مع نهاية الحلقة التاسعة فى المسلسل بنشوف واحدة من أفضل الـ Plot Twist اللى شوفناها مؤخرا فى الأعمال المصرية، لما بيموت كبير العائلة (محمود حميده) وبتبدأ الخلافات فى النشوب سواء بين أفراد العائلة الواحدة اللى كل واحد فيهم له أطماعه الخاصة، أو حتي بين الكيانات التانية اللى بتتربص بالعائلة علشان تقضي عليها وتحل محلها.
خيط درامي جديد بيتفتح لما بنبدأ نشوف ذكريات الكبير، والمراحل اللى مر بيها علشان يوصل لمرحلة أنه يكون كبير العائلة، ويتولي مسئولية وضع قوانينها اللى بتنظم العلاقة بين الأفراد فيها، وعلاقتهم بباقي الكيانات.
لما نتكلم عن الأداء التمثيلي نلاقي محمود حميدة بيقدم واحد من أجمل أدواره، والدور فعلا مناسب له جدا على الرغم من قلة عدد الحلقات اللى بيظهر فيها، أما أحمد فلوكس فواضح أن حجم الدور أكبر منه، وأن كنا بنراهن أن قدراته التمثيلية ها تتصاعد مع الأحداث علشان يكون على قدر الدور.
الشحات مبروك بيقدم مساحة دور واسعة وقوية، لكن لهجته الصعيدية كانت محتاجه شوية مجهود، أما سوسن بدر فإسمها وقامتها كانوا كبار جدا على مساحة دورها الصغيرة، لكن نتوقع يكون لها مساحة أكبر فى الحلقات القادمة، أما ميرهان حسين و محمد عادل وحسني شتا وكارولين عزمي فا قدموا أداء متميز فى مساحات أدوار مناسبة جدا، ونعتقد أنهم هايكونوا نجوم الأجزاء القادمة من السلسلة.
من أروع الأمور فى المسلسل الديكورات الفخمة، واستعمال الإضاءة المبهرة والمتوزعة بذكاء للتركيز على الديكورات المتميزة خصوصا ديكور قصر العائلة اللى كان من أروع الديكورات اللى شوفناها فى الأفلام المصرية مؤخراً، أما الموسيقى التصويرية فعلى الرغم من روعتها حسينا إنها كانت محتاجه تكون أهدأ من كده شويه، كمان كانت محتاجه يتم توزيعها بشكل مختلف، وأختيار إمتي تكون هادئة أو مش موجوده تماما وإمتي تتصدر هى المشهد.
معلومة على الطاير: المسلسل يعتبر عودة جديدة من محمود حميدة للدراما بعد مسلسل ميراث الريح فى 2013
ثانيا: مسلسل أختيار إجباري:
نيجي بقي للمسلسل الجديد التاني اللى بيتعرض على قنوات DMC وهو مسلسل أختيار إجباري، والمسلسل من تأليف حازم متولي، ومن إخراج مجدي السميري، وبطولة كريم فهمي وأحمد زاهر و خالد سليم و مي سليم وهيدي كرم، مع مشاركة من الوجوه الجديدة هند عبد الحليم و شريف فايد و زينة مكي ونور ايهاب.
معلومة على الطاير: الفنان كريم فهمي هو شقيق السيناريست والفنان أحمد فهمي.. من مواليد ديسمبر 1982 وبدأ مشواره الفني بالمشاركة بشخصيته الحقيقية فى مسلسل (عرض خاص) مع الفنان عزت أبو عوف.
المسلسل بيناقش الإنتشار الكبير لمواقع التواصل الإجتماعي، مع التركيز علي سلبياتها من خلال قصة مجموعة من الأصدقاء بيفاجئوا بخبر عودة صديقهم بعد غياب طويل، ومع عودته بتحصل له حادثة وبيبدأوا يكتشفوا أن معظم المشاكل المالية والإجتماعية اللى بيعانوا منها مؤخرا، سببها مجموعة من الهاكرز المتخصصين فى التجسس والتلصص على المعلومات على شبكة الإنترنت.
فى سياق متصل بيستعرض المسلسل خطر وسائل التواصل الإجتماعي على جيل المراهقين والشباب، وإزاي أي شخص معدوم الضمير ممكن يستغل ثغرة معينة أو يلعب نفسياً على بنت فى سن المراهقة، وإزاي النتائج ممكن تكون كارثية فى النهاية.
المسلسل بيعتمد على نظام التشويق والإثارة، وعلى فكرة أن المشاهدين يفاجئوا فى نهاية كل حلقة بشىء مفاجىء يجعلهم فى انتظار الحلقة القادمة بكل شغف، لكن أحيانا نسبة الغموض لما تزيد عن حدها ممكن تنقلب لعكسها ويبقى المشاهدين فى حالة من عدم الفهم التام، وده اللى حصل مع المسلسل لكن نقدر نقول أن صناعه اعتمدوا على فكرة أن الأسرار والمفجأت كانت منقسمة لقسمين.. الأول بيتم كشفه أول بأول كل حلقة، وبعض الأسرار بتستمر معانا لعدة حلقات.
معلومة على الطاير: الفنان خالد سليم مطرب وممثل مصري، من مواليد الكويت 1975 وقدم أول ألبوماته (عالم تاني) ومن أشهر أفلامه : سنه أولي نصب.
على صعيد الأداء التمثيلي … الأمور مش مبشرة بالخير.. أداء باهت جدا من خالد يوسف ومي سليم، واللى تعتبر عامل مشترك بين مسلسل الأب الروحي وأختيار إجباري، ودورها فى العملين ضعيف جدا، أما أحمد زاهر فا قدم الشخصية الشريرة بشكل مبالغ فيه جدا، خاصة فيما يتعلق بنظرات العين والتكشيرة على الوجه.
واحدة من أفضل الأشياء اللى قدمها المسلسل هى الوجوه الجديدة والشابة، واللى نتوقع أنهم يكونوا نجوم المرحلة القادمة فى السينما والدراما، ونخص بالذكر نور إيهاب اللى بتقدم دور متميز خلى الفنانة مي عز الدين تشيد بيها وبدورها، وبالمناسبة نور أيهاب تبقي بنت أخت الفنانة ريهام عبد الغفور.
من الواضح البذخ الأنتاجي فيما يتعلق بالديكورات والأهتمام بالموسيقى التصويرية، كمان إخراج مشاهد الأكشن والمطاردات كان متميز وواضح الجهد المبذول فيه.
لو كنتم من متابعي المسلسلين، أو واحد منهم، مستنيين رأيكم فى التعليقات عن رأيكم فى الأحداث والتمثيل وباقي عناصر المسلسلات دي.
