الايمان والعصر : بين الدين والتنمية البشرية

بعد غياب طويل واتجاه لسكة الادب واصدار رواية بعنوان (رافى بركات)، بيعود علينا “الداعية” عمرو خالد ببرنامج (الايمان والعصر).. البرنامج بيحاول يربط بين حياتنا اليومية والعصرية، وبين الدين والتدين والاسلام.

اول واهم شىء لفت نظرنا فى البرنامج كانت الديكورات الفخمة والمتميزة، تقريبا التصوير تم فى فيلا راقية، وفى غرفة واسعة لها سقف مش بنشوف اخره! وجدران الغرفة عبارة عن ارفف مكتبة واسعة، اللقطات الواسعة اللى بتتجول فيها الكاميرا بحرية بتخلينا نركز مع الديكور ونحس بالعراقة والمستوي الانتاجي المتميز.

بعد كده بيبدأ عمرو خالد فى تقديم برنامجه من وضع الوقوف، وبيبدأ يتحرك يمينا ويساراً باسلوب سلس وبحركات بطيئة، وممكن يستعين بكتاب ياخده من الرفوف الموضوعه امامه .. وبيكلم اكتر من كاميرا فى نفس الوقت ويتحرك بين الكاميرات بسلاسة عارفينها فيه من زمان.

عمرو خالد هو نفسه عمرو خالد.. بداية من خلط الدين بالتنمية البشرية، ونهاية باسلوبه المميز فى الكلام وحركات يده، مروراً بحبه لسرد القصص وتقريب رسالته بالأمثلة والشروحات المستفيضة، واللى اشعرتنا فى بعض الحلقات بالملل زي حلقة (فقه حب الحياه) واللى ضرب فيها امثله كتير علشان يوصل لهدف واحد كان مفهوم لنا من البداية.

البرنامج بيركز فى حياته على نقد الالحاد ومحاولة تفنيد دعاوي الملحدين، ثم بيبدأ يناقش القضايا السياسية اليومية زي انتشار جماعة داعش وغيرها من الجماعات الارهابية اللى بتاخد من الاسلام اياته وتعيد صياغتها واستعمالها باسلوب خاطيء، والحقيقة ان البرنامج مش بيقدم جديد فى المنطقة دي لاننا سبق وتابعنا برنامج اخر حاول يناقش نفس الامور للشيخ خالد الجندي.

الدين عند عمرو خالد مرتبط بشكل كبير بالتنمية البشرية.. بنشوفه طوال الوقت بيستعمل كلمات انجليزية فى نصف الكلام، وبيستعمل اسلوب وطريقة بنشوفها كتير فى مدربى التنمية البشرية، بالاضافة لاسلوبه فى السرد وطريقته فى توصيل المعلومة اللى بتخلط بين الدين والتنمية البشرية وهو خلط فى راينا خاطىء جدا.

ثقافة عمرو خالد الواسعة بتظهر فى حلقات البرنامج، وبما انه صاحب الاعداد للحلقات بنقدر ننسب له فضل المعلومات اللى شوفناها فى البرنامج ولم نكن نعلم عنها زي (قلعة موسي) اللى اتكلم عنها فى الحلقة 14 لرجل لبناني ضربه مدرس التربية الفنية وهو صغير لأنه حلم ببناء قلعه وقال له (احلم على قدرك) ، فصمم وقدر يبني القلعة فعلا ويجعلها مزار للناس من كل مكان.. وغيرها من المعلومات.

الايمان والعصر برنامج جديد لعمرو خالد وعوده موفقه لعالم الميديا، وان كان فيه خلط بين الدين والتنمية البشرية.