الشاشة في رمضان.. ورمضان على الشاشة!
زي ما اشتهر عن شهر رمضان المبارك أنه الشهر اللي بتتجمع فيه العائلة أمام المسلسلات اللي بتعرضها شاشة التليفزيون، رمضان كمان كان جزء أساسي من أحداث مسلسلات وأفلام وأعمال فنية كتير. يمكن بسبب الطبيعة الخاصة للشهر الكريم واحتفالاته، واللي كان لازم تجذب انتباه صناع الدراما، وتخلي رمضان جزء أساسي من بعض الأعمال اللي هانحكي لكم عن بعضها.
عسل اسود
فيلم أحمد حلمي الشهير المنتج سنة ٢٠١٠. اللي بيحكي عن (مصري) الشاب اللي بيرجع من أمريكا لمصر علشان يقضي رمضان مع عيلته، ثم يكتشف حجم الاختلافات بين المجتمع الأمريكي والمصري.
صناع (عسل اسود) اختاروا شهر رمضان كفترة زمنية لأحداث الفيلم لأنهم عارفين أن رمضان في مصر حاجه تانيه (بجد مش علشان الأغنية) وبالفعل بيندهش (مصري) من حجم الترابط وحالة الأخوة والمحبة في المنطقة الشعبية اللي بيسكن فيها واللي بتوصل أقصى حد لها خلال رمضان.
بيميز الفيلم تركيزه على ابسط التفاصيل، زي الزينة في الشوارع، ولعب الأطفال ولمة الأسرة حوالين الفطار، وكل الطقوس الرمضانية الجميلة.
رمضان كريم
ماينفعش نتكلم عن الأعمال اللي تناولت شهر رمضان، بدون الكلام عن المسلسل اللي بيحمل نفس الاسم! اتعرض الجزء الأول من مسلسل (رمضان كريم) في شهر رمضان سنة ٢٠١٧. حاليا بيعرض الجزء الثاني من نفس المسلسل.
مسلسل (رمضان كريم) بيحكي عن مجموعة أسر ساكنة في منطقة شعبية، وبيحصل كم من الأحداث الإنسانية والتفاعلات المستمرة بينهم، بينما بيكون شهر رمضان هو العامل المشترك بين كل الأحداث دي.
الميزة في (رمضان كريم) أنه جسد لنا الحياة الرمضانية اليومية بدون كليشيهات الحارة المصرية اللي بنشوفها في أعمال تانيه، زي ضرورة وجود بطل واحد المسلسل كله بيدور حواليه، أو وجود تيمة انتقام أو أحداث مش متعودين عليها في حياتنا اليومية التقليدية، بالعكس المسلسل من أفضل ما يميزه أنه دراما اجتماعية حياتية حقيقية. وده اللي خلانا نحب نتابعه.
حكاية مهلة أخيرة
هل شهر رمضان ممكن يكون المهلة الأخيرة قبل انهيار الحياة الزوجية بين شابين؟ هي دي الحبكة اللي اشتغل عليها صناع قصة (مهلة أخيرة) اللي تم عرضها ضمن أحداث مسلسل “في كل أسبوع حكاية”
القصة بتحكي عن (دنيا) و (حسن) الزوجين اللي بيتشاركوا في سوبر ماركت، لكن تراكم الأقساط عليهم مش بس بيهدد حياتهم الاقتصادية، لكن حياتهم الأسرية كمان. ثم بتيجي (مهلة أخيرة) لنهاية شهر رمضان قبل ما يتم الطلاق بين الاتنين. فهل فيه حاجه ممكن تتغير خلال الشهر الكريم؟
طبعا دي مش كل الأعمال اللي تناولت شهر رمضان في السينما والدراما المصرية، لكنها مجموعة من أشهر الأعمال اللي هاتوريكم رمضان بشكل تاني، بدل رمضان اللي بنشوف من خلاله شاشة التليفزيون، المرة دي بيكون رمضان هو اللي بيتم تجسيده على الشاشة.
