الكريسماس السنة دي ٢٠١٧.. رعب × رعب
موسم الكريسماس مشهور بالخروج وزيارة الأماكن الجديدة.. لكن كتير من الناس والشباب بتحب تقضي اليوم ده في البيت. والبيت يعني الأفلام والـ Home Cinema والفيشار والمسليات. لكننا في كايرو360 قررنا السنة دي ما نقترحش عليكم أفلام تقليدية علشان الكريسماس.. قررنا نخلي لكم الليلة دي رعب × رعب علشان تقضوا أجازة سعيدة ومرعبة ومختلفة عن أي كريسماس تاني!
Krampus
يعتبر فيلم Krampus واحد من أكتر الأفلام ملائمة لليالي الرعب في الكريسماس. لأنه بيحكي عن وحش أسطوري بيمثل عدو الكريسماس أو Anti Christmas
الفيلم بيحكي عن اجتماع عائلي بمناسبة الكريسماس، مع أجواء دافئة وحميمية ولا يفسدها سوى شقاوة الأولاد الصغيرين، وهى نفس الأجواء اللى شوفناها فى فيلم زي Home Alone خاصة بدايات الجزء الأول منه.
لكن الأمور بـ تتطور لما بـ تحصل خناقة بين الأولاد الصغار، وواحد فيهم بـ يهين فكرة “بابا نويل” والأمل فى الغد الموجود فى الفكرة دي، الأمر اللى بـ يستدعي شيطان رجيم اسمه Krampus بـ يهدد الأسرتين المجتمعتين وبـ يسحب الفيلم لمساحة ومنطقة من الغموض والرعب والمواجهة بين العائلة وبين Krampus الشرير وأتباعه الغرباء.
الفيلم من تأليف وإخراج مايكل دورتي، ومن بطولة آدم سكوت وتوني كوليت وكونشاتا فيريل وديفيد كيكنير
ممكن تشوفوا أعلان Krampus من هنا
https://www.youtube.com/watch?v=h6cVyoMH4QE
IT
برضو مش بنبتعد كتير عن منطقة الرعب المرتبط بشخصيات المفروض تكون كوميدية زي شخصية المهرج، واللي بنشوفه بشكل مالوش أي علاقة بالتهريج والكوميديا من خلال فيلم IT
قصة الفيلم مأخوذة عن رواية لكاتب الرعب الشهير ستيفن كينج، وستيفن قدم مجموعة مهمة من الروايات المرعبة واللي تحول معظمها لأفلام وأعمال درامية شكلت علامات في سينما الرعب في هوليود، ومن هنا بييجي الاهتمام بالفيلم. بطولة It كانت من نصيب فين وولفارد وميجان تشاربينتير وأوين تيج وبيل سكارسجارد. أما الإخراج فكان لـ أندريس موسشيتي.
أما الفيلم بيحكي عن أحداث خيالية بتدور في أحد المدن، مع انتشار ظاهرة اختفاء الأطفال بشكل مريب، واللي بترتبط بظهور مهرج مخيف مسئول عن خطف الأولاد، ومن هنا بيقرر مجموعة من الأطفال البحث وراء الظاهرة ومحاولة تفسير سبب اختفاء الأطفال ومين المهرج المرعب اللي بيعمل كل الأحداث دي. خاصة أن واحد من أعضاء الفريق ده فقد أخوه على يد المهرج في الماضي.
ممكن تشوفوا اعلان الفيلم من هنا
https://www.youtube.com/watch?v=xKJmEC5ieOk
Jigsaw
ومن الرعب المعتمد على الأشياء المبهجة بطبيعتها، للرعب القائم على المشاهد المخيفة زي مشاهد القتل والتعذيب واراقة الدماء. على الرغم من أن ناس كتير بتخاف من المشاهد دي لكن برضو الأفلام دي ليها جمهورها.
فيلم Jigsaw هو امتداد طبيعي لسلسلة أفلام SAW اللي كلها بتعتمد على مشاهد الرعب الدموي أو الرعب (المعوي) زي ما بيسميه المتخصصين.
الفيلم بيحكي عن سلسلة من جرائم القتل اللي بيتم تنفيذها بعنف ووحشية وبتخطيط مسبق، وبشكل بيفكرنا بسلسلة الجرائم السابقة اللي شوفناها في أجزاء SAW اللي فاتت، لكن المحققين بيحاولوا يجاوبوا على السؤال الأهم: إزاي الجرائم دي بتحصل بينما العقل المدبر لها المفروض أنه مات من فترة طويلة؟!
أما عن فريق العمل في الفيلم فالفيلم من إخراج مايكل وبيتر سبيريج ومن تأليف بيت جولدفينجر وجوش ستولبيرج ومن بطولة لورا فانديرفوورت وتوبين بيل وبريتاني آلن وكالوم كيث رينيه ومات باسمور وهانا إميلي آندرسون.
وممكن تشوفوا اعلان الفيلم من هنا
https://www.youtube.com/watch?v=vPP6aIw1vgY
Annabelle: Creation
محبي أفلام الرعب القائم على لعبة الأطفال المسكونة والأشباح والأرواح هل ينفع ننساهم في ليلة الكريسماس المرعبة؟ طبعا لا… علشان كده جبنالهم أحدث جزء من سلسلة أفلام Annabelle بعنوان Annabelle: Creation
الفيلم من إخراج ديفيد إف. ساندبرج ومن تأليف جاري دوبرمان ومن بطولة ستيفاني سيجمان وميراندا أوتو وأليشيا فيلا-بايلي وفيليبا كولثارد.
أما الفيلم فا بيعود بينا لبداية تصنيع دمية (أنابيل) واللي تزامن تصنيعها مع استقبال صانعها لمجموعة من البنات اليتيمات. ومع الوقت بيتعرض المنزل كله للعنة شيطانية بتجعل كل أفراد البيت في حالة رعب خاصة بعد وفاة بنت صانع الدمى قبل الحادث بسنوات.
وممكن تشوفوا اعلان الفيلم من هنا
https://www.youtube.com/watch?v=KisPhy7T__Q
Amityville The Awakening
وأخيرا وليس أخراً… ممكن تختموا الليلة المرعبة مع فيلم Amityville The Awakening وهو فيلم بيحكي عن أم عايشة لوحدها مع أطفالها، وبتضطر تنتقل بيهم لمنزل مسكون بالأشباح، كحل أخير علشان تقدر تعالج ابنها، لكن الأمور بتخرج عن السيطرة وبيتحول الأمر من محاولة للشفاء لمحاولة للنجاة بأرواحهم وعقولهم.
الفيلم من تأليف وإخراج فرانك كالفون ومن بطولة هانتر جوليجوسكي ومكينا جرايس وبريان بريتر وتوماس مان وكيرتووود سميث. وممكن تشوفوا إعلانه من هنا
https://www.youtube.com/watch?v=pCN3Ouo-Hys
