ايثان هانت راجع يا محبي Mission Impssible !
أيام قليلة جدا بتفصلنا عن الجزء الأحدث من واحده من أهم وأفضل سلاسل أفلام الأكشن والجاسوسية في تاريخ هوليود. سلسلة Mission Impossible هي السلسلة اللي بيتابعها الملايين حوالين العالم، واللي بيعتبر كل جزء جديد منها بمثابة فيلم مضمون النجاح في واحدة من أكتر سلاسل الأفلام قدرة على الأستمرار وتحقيق الأرباح في نفس الوقت.
لكن اللي مش كل الناس عارفاه أن سلسلة Mission Impossible بدأت كسلسلة من الحلقات في مسلسل تليفزيوني حقق شهرة واسعة جدا نتيجة اعتماد تصويره على التقنيات الحديثة أيامها. طبعا لما بنتكلم عن التقنيات الحديثة سنة 1966 يعني كل اللي ظهر في المسلسل أيامها تحول لبديهيات في عصرنا الحالي.
لكن مع نجاح المسلسل أيامها واستمرار عرضه لسنوات طويلة، تم تقديم الجزء الأول من السلسلة كفيلم سنة 1996 وده التاريخ اللي ناس كتير فاكراه كويس لأنه توقيت عرض الجزء الأول في مصر، واللي حققت نجاح رهيب بمشهد ايثان هنت عميل المخابرات الامريكية وعضو فريق (المهمة المستحيلة) وهو متعلق في حبل علشان يخترق كمبيوتر مهم ومؤمن بشكل مستحيل حد يخترقه.
ومن هنا جاء أسم السلسلة واللي بتتناول في كل جزء منها مهمة مستحيلة بيقوم بيها فريق بيتم اختياره بعنايه بقيادة توم كروز أو ايثان هنت واللي بيقوم في كل جزء باقتحام مكان مستحيل اقتحامه أو الدخول في عداء مع مؤسسات تجسس وأرهاب دولية لا يمكن لشخص واحده أنه يتحداها.
مع نجاح الجزء الأول تم تقديم جزء ثاني في سنة 2000 ثم جزء ثالث سنة 2006 ومن هنا بدأت السلسلة تاخد شكل واضح ومعايير ثابتة للنجاح.
من أهم المعايير دي الموسيقى التصويرية المميزة واللي بيتم تطويرها في كل جزء بيتم تقديمه علشان تبقى أحلى من الجزء السابق، لكن الموسيقى الخاصة بالجزء الأول الأصلية تظل الأفضل وليها وضع خاص عند عشاق السلسلة.
أما على صعيد السيناريو أصبحت أفكار زي الأجهزة الحديثة وماسكات التنكر والأجهزة اللي بتغير شكل الوجه والصوت من الثوابت اللي بيتم تقديمها في كل جزء برضو.
ومؤخرا بدأنا نلاحظ حاجتين مهمين وجداد على السلسلة. الأول هي أن الأجزاء الجديدة من السلسلة بيطلق عليها أسماء بدل ما كانت مجرد ارقام للأجزاء. وده لاحظناه من الجزء الرابع اللي تم تقديمه سنة 2011 بعنوان Mission: Impossible – Ghost Protocol والجزء الخامس بعنوان Mission: Impossible – Rogue Nation واللي تم تقديمه في 2015.
وفي الجزء ده لاحظنا أن السلسلة رايحه في اتجاه فلسفي عميق، وده على العكس من باقي الأجزاء اللي كانت أسهل في الفهم وكان البعض بيتهمها بالتفاهة أو الميل لتقديم الأكشن للأكشن وخلاص. لكن بداية من الجزء الخامس بدأت السلسلة تكون أشبه بسلاسل أفلام جيمس بوند من حيث الجمل الحوارية العميقة الطويلة وغيرها من الأمور.
السؤال اللي بيطرح نفسه دلوقت.. ياتري هايكون ايه شكل أحدث أجزاء السلسلة اللي بيتم تقديمه بعنوان Mission: Impossible – Fallout وبيتم طرحه في السينمات المصرية في وقت متقارب مع السينمات الأمريكية. وهل هايقدر ايثان هانت أو توم كروز أنه يستمر في النجاح للمرة السادسة على التوالي؟ ده اللي هانعرفه وها ننقله لكم في الريفيو بتاعنا عن الفيلم.
