بث مباشر: محاولة غير موفقة لمناقشة قضايا المجتمع
للأسف بعض الأفلام بتحاول تناقش قضايا واحداث كتير من خلال أحداثها، وده اللي حاول صناع بث مباشر انهم يقدموه، لكن في النهاية كانت نتيجة الفيلم سيئة على الصعيد الفني. تعالو نتعرف اكتر على التجربة دي.
القصة
الفيلم بيحكي عن قصة ظابط شرطة موقوف عن العمل بيحاول يقبض على شخص نصاب، وفى اطار بحثه عنه بيكشف كتير من قضايا الفساد في المجتمع، وبتحصل له كتير من المواقف الكوميدية اللي مش بتنقطع على مدار يوم كامل من البداية للنهاية.
فريق العمل
الفيلم من بطولة سامح حسين وسامية الطرابلسي ومصطفى عباس و محسن منصور مع مشاركة كتير من الفنانين والنجوم زي مراد مكرم (مقدم برنامج الأكيل) و المذيعة انجي علي وغيرهم.
الفيلم من تأليف طارق رمضان وإخراج مرقس عادل.
الأداء التمثيلي
للأسف الأداء التمثيلي لكل الابطال تقريبا كان ضعيف ونمطي ومحفوظ، ماشوفناش أي بطل من أبطال الفيلم خارج النمط التقليدي اللي احنا متعودين عليه منه، وده كان سبب رئيسي لضعف الفيلم وشعورنا بالنمطية وبعض الملل خلال الأحداث.
السيناريو والحوار والأخراج
سيناريو الفيلم كان أبعد ما يكون عن الملل، لكن على صعيد أخر السيناريو ماقدمش أي شيء جديد غير مجموعة من المواقف الكوميدية والايفيهات اللي بتحاول تكون كوميدية، ومن هنا شعرنا أن الفيلم مبني في المقام الأول والأخير على الحوار الكوميدي وده كان واحدة من أهم نقاط ضعف الفيلم.
أما اخراج الفيلم فعلى الرغم من نجاحه في انه يبعدنا عن الملل لكن كان محتاج اخراج الفيلم يكون أقوى وأكثر تأثيرا واكثر تملكا من أدواته وطريقة تقديمه لمشاهد الفيلم وتعامله معاها.
الديكورات والموسيقى والأزياء
من الصعب أننا نناقش ديكورات وموسيقى فيلم زي بث مباشر لان تركيز القائمين على الفيلم كان غير منصب على العوامل دي خالص، على الرغم من أهميتها لنجاح أي فيلم، لكن للأسف الفيلم كان ضعيف في الديكورات والموسيقى والأزياء وباقي العناصر المكملة لأي فيلم.
الخلاصة
فيلم بث مباشر حب يقدم جرعة من الاكشن مع الكوميديا مع مناقشة قضايا المجتمع، لكنه للأسف لم ينجح في تقديم أي حاجه من الحاجات دي!
علشان تبقى عارف:
نجوم الفيلم باعوا التذاكر للجمهور ضمن حملة الدعاية للفيلم.
