بروموهات رمضان ٢٠١٦
كل سنة وحضراتكم بخير. ورمضان سعيد عليكم وعلينا جميعاً.. زي ما اتعودنا كل سنة رمضان زي ما هو شهر الصيام والقيام والقطايف والمكسرات.. هو كمان شهر المسلسلات والدراما… وكمية المسلسلات اللى بيتم تقديمها فى الشهر ده تقريباً بتكفى المشاهدين لحد رمضان القادم!
علشان كده قررنا النهرده نختار لكم أفضل 5 بروموهات لمسلسلات رمضان.. والحقيقة قبل ما نحكي لكم عن البروموهات نحب نقول لكم إن صناعة البرومو هو فن أصيل بحد ذاته، مايقلش أهمية عن صناعة المسلسل أو الفيلم نفسه! والنهرده فى هوليود بنشوف شركات كاملة متخصصة فقط فى إنتاج بروموهات قوية ومؤثرة..
الأمر الصعب فى صناعة البرومو هي إنك مطالب فى حوالى دقيقة إنك تقدم ماده تجذب المشاهد وتجبره على متابعة المسلسل أو العمل السينمائى.. ودي مهمة صعبة ومش سهلة زي ما بيبدو للناس.
دلوقتي مع أفضل بروموهات مسلسلات رمضان مرتبة من الأقل جودة للأعلي حسب رأينا… ونحب نسمع منكم فى التعليقات رأيكم أنتم.
5. القيصر
مسلسل يوسف الشريف السنوي اللى بنستناه وبنتراهن مع بعض على سياق أحداثه.. يوسف قدر يخلق لنفسه منطقة جديدة من الأعمال الدرامية قائمة على التشويق والإثارة والأكشن، وألعاب الذكاء والتشويق واللى بتستمر من المشهد الأول للحلقة الأولى وحتي نهاية المسلسل… بدأ يوسف مع (رقم مجهول) ونهاية بمسلسل العام الماضى (لعبة أبليس) مروراً بمسلسلات زي (الصياد) و (اسم مؤقت) وغيرها، كلها مسلسلات مبنية على الأكشن والتشويق والمغامرة.
على الرغم من كل اللى قولناه إلا إن برومو مسلسل (القيصر) فى رأينا هو الأضعف من بروموهات مسلسلات رمضان، لإهتمام صناعه بمشاهد الأكشن السريعة والمتلاحقة بدون أي تركيز على الأحداث نفسها أو الخيوط الدرامية اللى بتجمعها… يعني ايه اللى فهمناه أو خرجنا بيه من برومو (القيصر)؟ لا شىء! مجرد أشخاص بتضرب بعض ومشاهد قتال يدوي.. ناهيك إن إخراج المشاهد دي كان سريع جداً لدرجة إننا أحياناً ما كناش بنقدر نفهم إيه اللى بيحصل بالظبط!
4. بنات سوبرمان
من الأكشن للكوميديا.. برومو مسلسل بنات سوبرمان كان فيه أكتر من ميزه.. أولاً إنه بيعرفنا الخيط الرئيسي للأحداث، وهو عن مجموعة من البنات عندهم قدرات خارقة، وفى نفس الوقت المسلسل بيعرفنا بالتيمة الرئيسية له: الكوميديا المُطلقة، لكن نعيب على البرومو كترة استخدام الإيفيهات خاصة ايفيه (اقسم بالله ما ولادي) واللى بنعتبره ايفيه مش ظريف خاصة إنه مرتبط بقضية نسب بين اتنين فنانين… شىء مش كوميدي خالص الصراحه!
برومو بنات سوبرمان مانساش يسيب لنا (تكة) تشويق.. لما هاتشوفوا البرومو أكيد هاتسألوا نفسكم إيه هى ياتري القدرة الخارقة اللى بتتمتع بيها شيري عادل؟ إحنا كمان بنسأل نفس السؤال.
3.المغني
فى المرتبة التالته بنستريح شوية من الأكشن والكوميديا وبننتقل للطرب.. قصة حياة المطرب المتميز محمد منير فى مسلسل رمضاني… التوليفه دي أكيد هاتكون ناجحة ومؤثرة.. برومو المسلسل كان بيضرب على الحديد وهو سخن.. وعارف بالظبط نقطة قوة المسلسل وبيلعب عليها.. البرومو كان مختصر وبيوصل تقريباً رسالة واحده : احنا جايبين محمد منير فى أول مسلسل له فى حياته الفنية اللى تنوعت بين الغناء والتمثيل… علشان كده البرومو ركز على ظهور محمد منير وغناؤه… واحنا بنعتبر ده نوع من التركيز فى توصيل رسالة البرومو للمسلسل… علشان كده يستحق المركز الثالث.
2. سقوط حر
فى المركز الثاني بنشوف مسلسل نيلي كريم.. نيلي قدرت –زي يوسف الشريف- تخلق لنفسها منطقة من التمثيل وفريق عمل متميز بيقدم قضايا نسوية بالمقام الأول… شوفناها قبل كده فى سجن النسا اللى كان بيقدم قصص عن سيدات سجينات، بعد كده شوفناها فى تحت السيطرة اللى اقتحمت فيها عالم الإدمان والمخدرات بشكل جديد ومتميز.
فى مسلسلها الجديد اعتمد البرومو على فكرة التشويق للحد الاقصي… مشاهد متقطعة بتقول لنا بعض تفاصيل القصة، لكن فى نفس الوقت مش بتقول لنا كل حاجه علشان نفضل على نار لحد ليلة اول يوم فى رمضان مع بداية عرض المسلسل… البرومو ده مثال على على فكرة التشويق للمنتهي و (جر رجل) المشاهد وإجباره على مشاهدة المسلسل علشان يعرف ايه اللى هايحصل.
1.ونوس
المركز الأول وبلا منازع بيحتله العبقري يحيي الفخراني، واللى بنعتبره أفضل ممثل فى مصر حالياً.. والحقيقة إن برومو مسلسل ونوس لا يقل عبقريه عن بطل المسلسل نفسه… لإن البرومو لعب على جانب التشويق الى الحد الأقصي.. وقدر يعمل أكتر من Twist فى زمن قصير جدا.. بحيث نبدأ نشغل مخنا ونفكر هو ايه بالظبط اللى هايقدمه الفخراني السنة دي؟ هل مجرد مسلسل عن أسرة مصرية عادية؟ ولا هاياخدنا فى رحلة لعالم المنشدين وأهل الخطوة؟ ولا بيحكي عن قصة غواية (ابليس) لبني أدم عادي؟ كل جملة فى البرومو كانت محسوبة.. كل مشهد كان بيزود التساؤلات عندنا… فى رأينا لو فيه برومو قدر يحقق 100% من أهدافه هايكون أكيد برومو مسلسل ونوس.
ده كان ترتيبنا لأفضل بروموهات مسلسلات رمضان… قولولنا فى التعليقات كنتوا عاوزين تشوفوا ايه فى القايمة دي؟ وهل ليكم ترتيب تاني للقائمة؟ وكل سنة انتوا طيبين مرة تانية.
