تعويذة تو: فيلم للاستهلاك المحلي

مش عارفين لحد امتي ها نفضل نتفرج على أفلام كل مشهد فيها يدل على أنه تم الدفع بها دفعا علشان تلحق سباق الأفلام في موسم معين، سواء كان موسم عيد أو أعياد الربيع أو غيرها من المناسبات اللي بتشهد رواج سينمائي كبير.

فيلم تعويذه تو دليل على أن الأفلام اللي بالشكل ده لسه موجودة ومؤثرة، وللأسف بتلقى اقبال من بعض الجمهور اللي عاوز يقضي وقت ظريف في السينما بعيدا عن أي أفكار او هموم أو مسئوليات من اللي بيشوفها في حياته اليومية.

فريق العمل

تعويذه تو من إخراج محمود سليم ومن بطولة شيماء سيف ومحمد ثروت ومصطفى أبو سريع، والفيلم من تأليف حسام حلمي وحقق حوالي 125 ألف جنيه في شباك التذاكر حتى الأن.

القصة

الفيلم بيحكي عن 3 شباب بيعملوا حسابات وهمية على موقع التواصل الاجتماعي فيس بوك، ومن ثم بيقعوا في حب نفس البنت، الامر اللي بيفتح مجموعة من المواقف اللي المفروض تكون كوميدية.

السيناريو والحوار والإخراج

طبعا من المتوقع أن سيناريو الفيلم يكون عبارة عن مجموعة من المشاهد اللي بتحاول تكون كوميدية، واللي مش بيربط بينها غير رابط درامي واهي جدا وأحيانا بنحس إنه غير موجود بالمرة، أما حوار الفيلم فاعتمد بدرجة كبيرة على الايفيهات الجنسية، أو حتى الايفيهات العادية اللي كانت بتحاول طوال الوقت تكون كوميدية لكن بلا جدوى.

مستوى الكوميديا في الفيلم كان منخفض جدا، وفشل السيناريو والإخراج والحوار مجتمعين في أنهم يرسموا ابتسامة حقيقية على شفاهنا!

الموسيقى والديكور

طبعا من العبث اننا نتكلم عن الموسيقى أو الديكور في فيلم بمستوى تعويذة تو، وطبعا سواء الديكور أو الموسيقى التصويرية للفيلم فكلاهما كان دون المستوي.

الخلاصة

تعويذة تو فيلم تدخله لو عاوز تضيع ساعتين من وقتك في لا شيء. حتى الكوميديا السطحية الخفيفة مش موجودة بالقدر المناسب في الفيلم ده.

علشان تبقى عارف: شيماء سيف بطلة الفيلم من مواليد 1988 وشاركت في عدد كبير من الأعمال الكوميدية والبرامج التليفزيونية اللي حققت نسبة مشاهدة كبيرة في الفترة الأخيرة.