جواب اعتقال: فيلم محمد رمضان في العيد

سواء اختلفنا أو اتفقنا على ما يقدمه محمد رمضان، لازم نعترف أنه فنان ذكي، قادر على تحديد اختياراته الفنية بشكل واضح ومباشر، بنى نفسه من الصفر في عالم صعب، وتحمل كتير من الاتهامات والمشكلات لحد ما يوصل للمكانة اللي أصبح عليها اليوم كواحد من أشهر نجوم مصر ومنافس رئيسي على كعكة الإيرادات سواء من خلال اعماله السينمائية أو الدرامية.

لكن مع طرح فيلم جواب اعتقال في السينمات بدأنا نلاحظ أن موسم عيد الفطر 2017 بدأ يخرج من أيد رمضان بشكل كبير، وبدأت دفة الإيرادات تتجه لصالح فيلم هبوط اضطراري لأحمد السقا، وهو المنافس الطبيعي لرمضان في موسم العيد، وده بسبب اختيار رمضان لفيلم بيتحدث في المقام الأول والأخير عن الإرهاب والعمليات الإرهابية اللي بنشوفها مؤخرا في مصر، والناس في موسم العيد كانت محتاجه فيلم ينسيها اللي بيحصل. مش يدخلها في الأحداث الصعبة أكتر فأكثر.

قصة الفيلم

جواب اعتقال بيحكي عن خالد الدجوي، شاب بيدخل في طريق الأرهاب وبيترقى في المناصب لحد ما يوصل لمنصب وزير الدفاع في جماعه جهادية بتعمل ضد الدولة، خالد بيجد ترصد ومقاومة من جهتين، الأولى هي وزارة الداخلية اللي بتحاول تقبض عليه وتجمع أكبر قدر من الأدلة ضده، وبين رجال من داخل الجماعه نفسها شايفين أنه مش قدر المسئولية. وفى نفس الوقت بيحاول خالد يرتبط ببنت عمه اللي بيحبها، لكنها بتصده بسبب أفكاره الجهاديه.

فريق العمل

محمد رمضان بيقوم بدور البطولة بشخصية خالد الدجوي، والبطولة النسائية كانت من نصيب العائدة بقوة للساحة الفنية دينا الشربيني، أما اياد نصار فا قدم دور ضابط الشرطة اللي بيحاول يقبض على خالد، سيد رجب و وليد فواز و محمد عادل بيقوموا بدور رجال الجماعة الإرهابية.

جواب اعتقال من تأليف وإخراج محمد سامي. واللي قدم كتير من الأعمال السينمائية والدرامية مؤخرا.

الإخراج والأداء التمثيلي

على الرغم من قوة أداء محمد رمضان التمثيلي، لكن باقي الممثلين معاه أداؤهم كان ضعيف وغير مقنع، إياد نصار مثلا قدم دور انفعالي والجمل الحواريه الخاصة به ضعيفة وغير مؤثرة، دينا الشربيني على الرغم من اجتهادها، ماقدرتش تمسك خيوط الشخصية اللي بتقدمها بشكل كويس. لكن سيد رجب على سبيل المثال قدر يقدم أداء تمثيلي مميز ومحترم.

سيناريو الفيلم كان قوي ومترابط، لكن في نفس الوقت المشاهد خرج بكم كبير من الأسئلة بدون إجابة، منها مثلا: ليه شخصية خالد الدجوي ما خرجتش من العمل المسلح في الجماعة الأرهابية رغم قدرته على تنفيذ رغبته من وقت طويل. وغيرها من الأسئلة.

أما إخراج الفيلم فجاء في مجمله ضعيف، وحسينا انه تم الاستعجال في تصوير الفيلم والانتهاء منه علشان يلحق موسم عيد الأضحى 2016 لكن تم تأجيل الفيلم لموسم عيد الفطر للعام الحالي.

الموسيقى والديكور والملابس

لا جديد على مستوى الموسيقى التصويرية، وحسينا ان الموسيقى غير مميزه على الإطلاق، أما الديكورات والملابس فكانت قوية ومميزه، وكان فيه تصوير في أماكن جديدة ومميزة وبشكل واقعي بعيدا عن التصوير في الديكورات المغلقة.

الخلاصة

جواب اعتقال كان ممكن يكون فيلم اقوى لو تم الاهتمام بالسيناريو والحوار والإخراج أكتر من كده. وبنعتقد أن محمد رمضان هايقدم أعمال أفضل بعد انتهاء خدمته في التجنيد علشان يرجع بكامل لياقته وقدرته على العطاء.

علشان تبقى عارف: كان المفروض يتم عرض الفيلم في موسم عيد الأضحى 2016 لكن تم تغييره بسبب بعض المشاكل الرقابية.