حرب كرموز: أحلى فيلم في العيد ولا ايه؟!
مع بداية طرح الأعلانات التشويقية الخاصة بفيلم حرب كرموز، افتكرنا قصة واقعية لها نفس قصة الفيلم. عن حكاية صمود مجموعة من ضباط الشرطة المصريين أمام جيش الاحتلال الإنجليزي اللي كان بيحتل مصر أيامها. وتحولت قصة صمود الضباط لعيد للشرطة في 25 يناير. وفي رأينا لو كان الفيلم بيحكي القصة الحقيقية كانت هاتكون لفتة أفضل. لكن مافيش فرق كبير بين الحقيقة والخيال.
(حرب كرموز) بيحكي عن قصة اغتصاب بنت مصرية من مجموعة عساكر انجليز، في فترة احتلالهم لمصر. وبيتدخل مجموعة من الشباب المصري لحماية البنت وبتحصل اشتباكات بيتم أسر واحد من الجنود الأنجليز بعدها.
بيتم مطالبة مأمور القسم (أمير كرارة) بالأفراج عن العسكري الأنجليزي، لكنه بيرفض، وبيعرض كل القسم لخطر الحصار والسحق من الجيش الأنجليزي اللي بيحرك وحداته لضرب القسم المصري. معركة غير متكافئة لكننا بنشوف من خلالها صمود الشعب المصري أيام الاحتلال على الرغم من اختلاف أطياف المجتمع ده والانقسامات الظاهرية اللي ممكن تكون موجودة بين أشخاصه.
الفيلم من تأليف وأنتاج محمد السبكي، وكان واضح من البداية للنهاية أن السبكي بيراهن على نجاح الفيلم بشكل شخصي. وكان واضح البذخ الأنتاجي اللي يمكن مش بنشوفه عادة في أفلام السبكي. لكن على الرغم من البذخ ده بعض التفاصيل كانت ناقصة الفيلم زي مثلا شعورنا أن الدم الظاهر في المشاهد مش حقيقي، أو شعورنا طوال الوقت بجو التصوير في الاستوديو. لكن من ناحية تانية أفاد الأنتاج في اخراج مشاهد أكشن قوية ومشاهد التحامات ومطاردات مميزة.
المخرج بيتر ميمي من الواضح أنه بيهتم بكل التفاصيل وبيخرج الفيلم بشغف كبير. ومن خلال متابعتنا لحسابه على تويتر شوفنا الملابس اللي تم تخصيصها للشخصيات والورق اللي تم عمله علشان يخرج الفيلم متقن من ناحية التفاصيل الصغيرة. لكن وبما أننا بنتكلم عن الملابس، كنا متوقعين أن الملابس ماتكونش تقليدية، لكن للأسف ظهرت كل شخصية من شخصيات الفيلم بالملابس التقليدية لها بدون أي محاولة للتجديد أو كسر الصورة النمطية.
أمير كرارة في دور البطولة بيعيد تجسيد شخصيته في مسلسل كلبش من جديد. حتى أننا توقعنا واحد من الأبطال يناديه بلقبه الشهير (باشا مصر)! لكن الغريب أن أمير قدر يقدم الشخصية بشكل متنوع بدون ما يشعر المشاهدين بالملل من تكرار نفس الخطوط الرئيسية للشخصية. ودي تحسب لأمير قدرته على تقديم شخصية واحدة لمدة شهر كامل ثم إعادة تقديم نفس الشخصية –تقريبا- بعدها ولا يشعر المشاهدين بالنفور.
مصطفى خاطر ومحمود حميدة قدموا أداء مميز، وخصوصا مصطفى خاطر اللي بنعتبره الجواد الرابح في الفيلم، أما سكوت ادكنز فقدم أداء ممتاز على صعيد المعارك والالتحامات اليدوية، وان كان وجوده في الفيلم مقحم بشكل أو بأخر ومش متسق مع السيناريو العام للأحداث.
حرب كرموز واحد من أفضل أفلام عيد الفطر 2018 خاصة أنه بيبعد عن منطقة الكوميديا اللي أصبحت مكررة ومحفوظة وبيقدم أحداث متعوب عليها وعلى تفاصيلها وعلى أنتاجها بشكل يحترم عقلية المشاهد ويقدم له وجبة سينمائية جيدة وصالحة للمشاهدة في العيد.
علشان تبقى عارف:
اعتمد المخرج بيتر ميمي على 1200 صورة و حوالي 15 ساعة من الوثائق المصورة عن الفترة دي في مصر علشان يطلع الفيلم بشكل متقن في النهاية.
