خمس أسباب تعرفك ليه منتظرين مسلسل (فلاش) بكل الشغف ده
مافيش شك أن الأخبار الاقتصادية والسياسية والاجتماعية الفترة الأخيرة، كفيلة أنها تخلي دماغ أي واحد تلف، وتجبرنا نقضي ساعات على السوشيال ميديا نتابع كل جديد في الملفات دي.. لكننا مستعدين نتراهن معاكم كلكم أنكم لو سألتم أي حد من مواليد الثمانينات على الخبر الأهم اللي سمعه الأيام اللي فاتت هايكون خبر تحويل سلسلة (فلاش) لمسلسل من انتاج منصة شاهد، هو الخبر الأهم بالنسبة له.. تعالوا نعرف ليه.
١. يانوستالجيا يا!
مواليد الثمانينات كانت تسليتهم الوحيدة تقريباً هي قراءة سلسلة روايات تابعه لمشروع عبقري أسمه (روايات مصرية للجيب)، صدر عن دار نشر (المؤسسة العربية الحديثة) قدمت للقراء سلاسل بأهمية وقيمة (رجل المستحيل) و (ملف المستقبل) و (ما وراء الطبيعة) وعلى رأس السلاسل دي، كانت سلسلة (فلاش) للكاتب ورسام الكاريكاتير خالد الصفتي.
تحويل السلسلة لمسلسل في رمضان على شاهد، بيرجع ألاف الأطفال (اللي سنهم حوالي ٣٥ سنه دلوقت) لحالة من النوستالجيا اللي مخليانا بنعد الأيام علشان نشوف المسلسل.
٢. انتصار كبير في زمن الهزائم الكبيرة
احنا الجيل اللي عايش الوباء والحرب الشبه عالمية، مرينا بانكسارات كتير وأفراح قليلة. حتى كُتاب المؤسسة العربية الحديثة اللي عيشنا معاهم طفولتنا ومراهقتنا توفوا في أعمار مبكرة نسبيا، وما شافوش السلاسل اللي تعبوا في تأليفها وهي بتتحول لأعمال على الشاشة. لكن خالد الصفتي صاحب سلسلة فلاش هو أول كاتب من المؤسسة يشوف السلسلة بتاعته وهي بتتحول لعمل تليفزيوني قدام عينيه (ربنا يمد في عمره وصحته).. ده انتصار لا يستهان بيه في زمن أصبحت الانتصارات فيه قليلة.
٣. انتاج محترم في توقيت عظيم
احنا مش مستنيين مجرد عمل كارتون تقليدي بميزانية قليلة. لما بنتكلم عن أعمال شاهد بنتكلم عن ميزانية ضخمة، واهتمام بكل تفصيلة في الإنتاج. يعني احنا بانتظار عمل بيحترم دماغنا ومش بيقدم مجرد تسلية أو كوميديا فارغة. احنا مننظرين عمل ممتع ومسلي على صعيد الصورة والتحريك وباقي عناصر العمل الفني. كل ده مع ثقتنا في شغل أستاذ خالد. اللي اتربينا عليه. تخلينا بنعد الأيام علشان نشوف الحلقة الأولى.
٤. المواطن المطحون!
لو كنتم من متابعين سلسلة فلاش، هاتبقوا عارفين شخصية المواطن المطحون اللي كل قراء السلسلة بيحبوه ويعتبروه شخصيتهم المفضلة. واللي قدر خالد الصفتي يعبر عنها على شكل راجل رفيع وبيعاني من نقص التغذية لدرجة أنه تحول لهيكل عظمي! شخصية المواطن المطحون تعتبر تصوير كاريكاتيري للشخص اللي تعبان ماديا في حياته وبيعاني بشكل يومي، لكن بشكل كوميدي في نفس الوقت. دي واحدة من أهم الشخصيات اللي كلنا منتظرينها بشغف.
٥. مناسب للجميع
مسلسل فلاش هايكون مناسب لكل أفراد الأسرة، ومشاهدته في رمضان هاترجع لنا ذكريات البرامج الكارتونيه العظيمة اللي اتربينا عليها، زي بكار و سلاحف النينجا والسندباد وغيرها. لكن المرة دي هانشوفها بتطويرات ضخمة، وهانشوفها مع أولادنا. في رأينا أن مسلسل (فلاش) هايكون أحلى مسلسل كارتون يجمع أفراد الأسرة كلها في مكان واحد… استنونا علشان نعمل لكم مراجعة للمسلسل لما يتم عرضه. ورمضان كريم مقدماً.
