خمس أفلام.. لسهرة هالوين ماتتنساش

انه الهالوين ياسادة.. ليلة الرعب التي لا تنتهي.. واللي بيحتفل بيها العالم كله في أخر يوم في شهر أكتوبر من كل سنة. والمفترض أنه يكون عيد بيلبس فيه الأطفال ملابس مخيفة ويلفوا على البيوت ياخدوا حلويات.. بينما الأكبر سنا بيعملوا ايه؟

بيتفرجوا على قائمة الأفلام اللي جمعناها لكم مخصوص بمناسبة اليوم ده.. تعالوا نشوف هانتفرج عليه ايه سوا… خاصة اننا اخترنا لكم أفلام بعضها مرعب بجد وبعضها مرعب من النوع العائلي اللي يعمل اثارة لكن مش هايسبب كوابيس بالليل.

Totally Killer

لما القاتل المرعب الملقب بـ “Sweet Sixteen Killer” يرجع بعد 35 سنة من جريمته الأولى عشان يقتل ضحية تانية، بنشوف رحلة لبنت شابة عبر الزمن، بتحصل لها بالغلط، بترجع فيها لسنة 1987، علشان تحاول توقف القاتل قبل ما يبدأ جرايمه بالأساس.

Cobweb

ولد صغير، بيزعجه صوت طرقات مستمرة على جدار غرفة نومه. في البداية بيحسب الموضوع مجرد كوابيس متكررة بتزوره كل ليلة. لكن مع الوقت بيكتشف أن الموضوع له وضع أغرب من مجرد كوابيس. وان فيه رسالة خفية فيه كيان ما محتاج يوصلها له. من هنا بتبدأ المغامرة المرعبة.

Haunted Mansion

بعد اكتشاف أن قصرها مسكون بالأشباح، بتحاول سيدة أنها تستعين بمجموعة أشخاص من خلفيات مختلفة علشان يطهروا قصرها من الأرواح الشريرة اللي فيه. فيلم كوميدي الى حد ما مع حس من المغامرة ومناسب لكل أفراد الأسرة اللي عاوزين يتفرجوا على فيلم مرعب بس مش مرعب قوي

The Curse of Bridge Hollow

بنت مراهقة.. عندها مشاكل في علاقتها مع والدها، لكنها بتتسبب عن طريق الخطأ في تشغيل لعنة قديمة، بتخليهم يقضوا ليلة هالوين صعبة جدا وحقيقية جدا بعد ما كانت مجرد خرافات واحتفالات بدون رعب حقيقي. لكن اللي هاتتعلمه من خلال الليلة دي هي ضرورة توحيد جهودها مع ابوها علشان ينجوا من ليلة  الرعب.

Hocus Pocus 2

فيلم عائلي كوميدي عن عودة الساحرات تاني للعالم الحديث بتاعنا، ومحاولتهم خطف الأطفال، وازاي يقدر ابطال الفيلم يمنعوهم من تنفيذ مخططهم الشرير.

الفيلم ده مثالي لأفراد الأسرة اللي بيحبوا الأفلام التقليدية عن الساحرات اللي بيستعملوا المقشة اللي بتطير. ومافيهوش رعب بنسبة كبيرة بالتالي هايكون اختيار مثالي للناس اللي قلوبهم ضعيفة شوية أو للأطفال.