سألنا القاهرة عن أفضل المصايف… ودي كانت الإجابة!
من الواضح أن صيف السنة دي دخل علينا دخلة حامية قوي… لكن على مين.. دايما أهل القاهرة عندهم الحلول.. علشان كده نقدر تعتبر موسم الصيف هو موسم هجرة أهل القاهرة للمدن الساحلية باختلاف أنواعها.. بحثا عن بعض النسمات العليلة وريحة البحر المنعشة… لكن ايه يا ترى أفضل المصايف عند أهل كايرو؟ ده اللي هانعرفه في موضوعنا
السخنة… سخنة قوي!
العين السخنة جاءت على هرم اختيارات أهل كايرو فيما يتعلق بالمصايف، والسبب الأول لاختيارهم كان بسبب اقتراب العين السخنة من القاهرة. يعني ممكن يقضي سكان القاهرة الويك اند بسهولة في العين السخنة ويرجعوا وهم (فريش) علشان يبدأوا أسبوع جديد من العمل في الحر.
لكن بيعي بالعين السخنة ارتفاع أسعار الفنادق فيها، لكن أهل كايرو مش بيغلبوا، وممكن يستعيضوا عن قضاء ليالي كاملة في فنادق العين السخنة، بعمل day use في أي فندق، وده تكلفته بتكون اقل خاصة لو ابتعدنا عن أيام الويك أند.
شرم الشيخ والغردقة.. خروج وفسح وبحر
على الرغم من أن تصنيف شرم الشيخ والغردقة من ناحية الحرارة والطقس بيخليها مشتى بالمقام الأول مش مصيف، لكن كتير من أهل مصر كلها وأهل القاهرة بيحبوا يذهبوا لشرم الشيخ والغردقة في الصيف. والسبب في ده يعود لطبيعة الطقس هناك، درجة الحرارة مرتفعة فعلا لكن في المقابل نسبة الرطوبة تكاد تكون منعدمة، يعني ما فيش إحساس بالحر والعرق زي ما بنشوف في القاهرة.
الميزة كمان في شرم الشيخ والغردقة وجود شواطئ البحر الأحمر المميزة، وفى الغردقة ممكن تمارسوا نشاط الغوص تحت المياه، وهو نشاط ممتع وتشتهر به الغردقة عالميا ومحليا.
أما شرم الشيخ بيميزها الخروجات اللي ممكن تقوموا بيها، بالإضافة طبعا للحياة الساحلية المميزة الموجودة في شرم، ومطاعم السمك المشهورة بيها.
الإسكندرية والساحل.. تقليدي لكن مميز
بعض أهل القاهرة بيفضلوا الاختيارات الكلاسيكية.. المصايف اللي تربينا عليها في الثمانينات والتسعينات.. الإسكندرية والساحل الشمالي لسه محتفظين بمكانتهم في قلوب أهل كايرو، واحتلوا معانا المرتبة الثالثة في الأماكن اللي بيحبها أهل القاهرة علشان يقضوا فيها أجازه الصيف.
الميزة في الأماكن دي أن ممكن تقضوا فيها أوقات جميلة بميزانية قليلة، كمان معاملة المدن دي للناس جيدة جدا ومنتشر فيها كل الأمور اللي بنبحث عنها في الصيف زي البحر ومطاعم الأسماك وأماكن السهر…الخ
مرسى مطروح مميزات كل المصايف هنا
في مرتبة متأخرة شوية بتيجي مرسى مطروح.. المميز في مطروح أنها بتجمع مميزات البحر النقي والجميل لشرم والغردقة، وفى نفس الوقت الطقس فيها جميل ومستقر، بالإضافة لأنها مشهورة بحاجات كتيرة ليها علاقة بالبحر والصيف زي اللب الأبيض والأسمر والمسليات بشكل عام، وأهلها ودودين وبيرحبوا بالمصيفين.
جمصة-رأس البر- بلطيم
من المناطق الصيفية الجميلة في مصر، لكن ترتيبها ضمن تفضيلات أهل القاهرة جاء في النهاية تماما، ونسبة قليلة من اللي سألناهم قالوا لنا انهم بيحبوا يقضوا المصيف في الأماكن دي. يمكن بسبب بعدها عن القاهرة، أو لأنها أصبحت أماكن غير مشهورة حاليا بأنشطة المصايف، ومعظم اللي فضلوها كان بسبب ارتباطها بذكريات عائلية عندهم.
