ساعة رضا: فيلم كوميدي تقليدي في السينمات
فكرة العودة بالزمن أو الأساليب السحرية اللي بتخلي أشخاص معينة تقدر ترجع بالزمن وتغير الأحداث، من الأفكار اللي تم تقديمها بشكل جدي وهزلي في كتير من الأفلام والمسلسلات. يمكن أشهرها وأحدثها فيلم سمير وشهير وبهير واللي كان بيحكي عن 3 أصدقاء بيرجعوا في الزمن ويبدأوا يحكموا على حياة أهلهم.
ساعة رضا وإن كان بيلعب على نفس التيمة، لكنه قدر يتناولها بشكل مختلف تماما عن الأفلام التانيه. لكن مش معنى ده أن تناول (ساعة رضا) واللي أخرجه هاني حمدي وألفه هشام يحي هو التناول الأفضل. لكنه تناول بيلعب على تيمة مقبولة عند قطاع كبير من الجمهور وفي نفس الوقت مضمونة النجاح – الى حد ما- .
(ساعة رضا) بيحكي عن رضا، واللي بيقوم بدوره أحمد فتحي واللي بيكتشف منبه قديم فيه تعويذة سحرية قادرة ترجعه للماضي. الأمر اللي بيخليه يقع في مجموعة من المواقف الكوميدية اللي مش بتنتهي.
بيشارك أحمد فتحي البطولة هالة فاخر ودينا فؤاد و شيماء سيف ومحمد ثروت. والحقيقة أن محمد ثروت أصبح من الوجوه اللي بتشارك في معظم الأفلام الكوميدية اللي بنشوفها مؤخرا. وللأسف أداؤه يعتبر واحد في كل الأفلام دي من أول مسلسل (نيللي وشريهان) ولحد دلوقت!
أحمد فتحي بيقدم أداء جيد في دور البطولة. والحقيقة أن فتحي من الفنانين القادرين على تقديم كوميديا خاصة بهم. ومع الوقت هايقدر يطور ايفيهات خاصة به. مش ناقصه غير تطوير أداؤه الحركي علشان يتجاوب مع معالم وشه اللي مجرد ظهورها على الشاشة بتخلي المشاهدين تضحك بدون أي مجهود منه.
ساعة رضا مش أحسن فيلم كوميدي شوفناه. لكن في نفس الوقت ينفع كتجربة مشاهدة جيدة للناس اللي عاوزه تقضي حوالي ساعتين من الفراغ الكوميدي بدون تشغيل دماغ مع بعض الكوميديا المعتمدة على الايفيهات.
