سكر بره: فيلم بره الخريطة!
ظاهرة جديدة بنلاحظها مؤخرا، هي انتشار عدد كبير من أفلام الشباب، زي فيلم على معزة وإبراهيم، وفيلم بترا بوابة الزمن، وفيلم سكر بره اللي بنتكلم عنه دلوقت. وعلى الرغم من سعادتنا بسيطرة الشباب على معظم الأسماء اللي بنشوفها حاليا، لكن مش دايما بتمشي الرياح بما تشتهي السفن.
وعلى الرغم من انتشار أفلام الشباب، إلا أن مستواها كان متدني جدا وضعيف، وفشل معظمها في تحقيق أي إيرادات تذكر. الأمر اللي ممكن يجهض كتير من المشروعات القادمة لتقديم أفلام شبابية.
فريق العمل
فيلم سكر بره من إخراج أحمد عبد الله صالح، ومن تأليف محمد الدرة في أول تجاربه الطويلة في التأليف. والفيلم من بطولة خالد عليش وأميرة هاني وإسلام جمال وابرام سمير وإسراء عبد الفتاح.
القصة
الفيلم بيحكي عن مجموعة من الأصدقاء اللي بيتسبب الزمن والانشغال في ابتعادهم عن بعض، ثم بيرجعوا يتقابلوا مع بعض من جديد في أحد الأفراح، ثم بتتوالي الأحداث اللي بتحمل لهم العديد من المفاجئات المختلفة.
الإخراج والسيناريو
أسوأ ما في الفيلم كان السيناريو المترهل، والإخراج اللي كان واضح انه متخبط ومش عارف يعمل أو يقدم ايه بالظبط. وكان واضح ان هناك حالة من اللخبطة مابين محاولة تقديم كوميديا قايمه على الايفيهات الجنسية، أو كوميديا المواقف، واللي في النهاية فشل الفيلم في تقديم أي منهم بأي حال من الأحوال!
الأداء التمثيلي
طبعا من العبث اننا نتصور ان ممكن يكون هناك أداء تمثيلي جيد في فيلم كان فيه الإخراج والقصة والسيناريو بالشكل ده. وللأسف كل الفنانين المشاركين في الفيلم كانوا في حالة من (الترهل الفني)، وكان واضح أن الفيلم كان مجرد (سبوبة) لجميع المشاركين فيه!
الموسيقى والديكورات
وبما ان القصة والسيناريو والحوار والإخراج والتمثيل بالشكل ده. هل نتوقع تكون الموسيقى التصويرية او الديكورات جيدة؟ برضو من رابع المستحيلات.
الخلاصة
ممكن ننصح بمشاهدة فيلم سكر بره لو انت عندك ساعتين من عمرك عاوز تضيعهم في (الاشىء) تماما. ساعتها ممكن سكر بره يكون فيلم مناسب لك!
علشان تبقى عارف:
تم تنظيم عرض خاص للفيلم في سينما مول العرب بمدينة 6 أكتوبر بحضور أبطال الفيلم.
