عام الحزن الفني ٢٠١٦

واحنا فى استقبال عام جديد، ماينفعش ننسى الناس اللى فقدناهم فى 2016، خاصة لو كانوا مؤثرين فى عالم الفن والحياة الفنية، مش فى مصر فقط لكن فى العالم العربي كله.

كايرو360 بتقدم لكم عرض بالفنانين اللى فارقونا فى 2016، وبندعي لهم بالرحمة ونتمني ربنا يصبر أهلهم.

ممدوح عبد العليم

فى أوائل يناير 2016 وتحديدا يوم 5 يناير، صدمت مصر والوطن العربي بوفاة الفنان ممدوح عبد العليم عن عمر 59 سنة. ممدوح توفى بشكل مفاجىء فى الجيم اللى بيتدرب فيه فى نادي الجزيرة، واتنقل المستشفى فى حالة خطيرة علشان يتوفي هناك بهدوء. ممدوح عبد العليم قدم للسينما والتليفزيون مجموعة من أفضل وأقوي أعمالهم زي مسلسل ليالى الحلمية وفيلم بطل من ورق وغيرها من الأعمال.

حمدي أحمد

وفى 8 يناير فوجئنا بخبر وفاة الفنان القدير حمدي أحمد عن عمر 82 سنه.. حمدي أحمد من فنانين مصر القلائل اللى ممكن نوصفهم بالمثقفين، والمهتمين بقضايا دولتهم وأحوالها المختلفة. كمان كان عضو فى مجلس الشعب، وقدم للسينما والتليفزيون مجموعة كبيرة من الأعمال المهمة زي فيلم الأرض وأبناء الصمت وغيرها.

يسري الإبياري

مافيش كتير التفتوا لوفاة المؤلف والنتج المصري يسري الإبياري فى 10 يناير 2016.. الإبياري كتب كتير من الأعمال الخفيفة والكوميدية زي مسرحية الجوكر وفيلم أونكل زيزو حبيبي ومسرحية عبده يتحدي رامبو.. وغيرها.

عبد العزيز مكيوي

من الكوميديا لقصة فى قمة التراجيديا. وفاة الفنان عبد العزيز مكيوي فى 18 يناير 2016 واللى قدم للسينما المصرية واحد من أهم أعمالها وهو فيلم القاهرة30.. مكيوي عاش حياة فى قمة البؤس، وفى أخر أيامه عاش فى الشارع بدون منزل، وبعد تسليط الضوء على حياته الصعبه تم نقله لدار مسنين على حساب نقابة المهن التمثيلية علشان يتوفي هناك فى هدوء.

فيروز

وفاة تانية مؤثرة حصلت فى 2016 وتحديدا فى 30 يناير 2016 لما عرفنا خبر وفاة الفنانة فيروز المصرية، واللى بيطلق عليها أحيانا فيروز الصغيرة، وهى اللى  شاركت الفنان أنور وجدي فى كتير من أعماله وكانت حديث مصر والعالم العربي كطفلة معجزة كانت بتمثل وترقص وتغني بشكل مبهر ومتميز… الله يرحمها.

سيد زيان

فى 13 ابريل 2016 فقدنا الفنان سيد زيان، واللى توفي بعد صراع طويل ومتعب مع عدد من الأمراض، ومع شكوي مستمرة منه من عدم اهتمام أهل الفن به.. السيد زيان كان مشهور بقدرته على أداء أي دور مهما كان فقير أو غني أو فلاح أو صعيدي.. الخ كمان كان له إسلوب خاص ومميز فى الكلام بيثير ضحك الجمهور بشكل كبير.

وائل نور

فى 2 مايو 2016 فوجئنا بوفاة فنان شاب كان عزيز على قلبنا جميعا وهو الفنان وائل نور.. وائل توفي بشكل مفاجىء بعد جلطة مفاجئة فى القلب جات له وهو فى منزله فى الأسكندرية.

شارك وائل فى أعمال كتير ومهمة زي ذئاب الجبل ومسلسل المصراوية ومسلسل البخيل وأنا وغيرها من الأعمال.

حمدي السخاوي

بشكل مفاجىء برضو، وبعد أزمة قلبية مفاجئة توفي الفنان حمدي السخاوي فى 18 يوليو2016.. الفنان السخاوي كان مشهور بأداء مجموعة متنوعة من الأدوار المساندة والغير رئيسية، وقدم دور الخواجة أو الرجل الأجنبي فى أفلام ومسلسلات كتير.

حمدي السخاوي شارك فى مسلسلات رأفت الهجان، ليالي الحلمية، الوسية، زمن عماد الدين، العمة نور، عباس الأبيض في يوم الأسود، الشارد، أماكن في القلب، الملك فاروق، وفى أفلام المنسي، جحيم تحت الماء، السيد كاف، عيال حبيبة، يا انا يا خالتي.

محمد خان و محمد كامل

فى يوم واحد هو 26 يوليو 2016 توفي المخرج الشهير محمد خان صاحب أفلام هند وكاميليا والحريف وأيام السادات وغيرها، وبعده بساعات توفى الفنان محمد كامل المشهور بدور البلطجي فى مسلسل زيزينيا.. نقدر نقول ان 26 يوليو كان واحد من أكتر الأيام حزنا فى الوسط الفني فى 2016.

محمود عبد العزيز

فى 12 نوفمبر نزل الخبر زي الصاعقة على كل محبى الفن فى مصر والمنطقة العربية… وهو الفنان محمود عبد العزيز.. وهو واحد من أشهر الفنانين فى مصر، ومشهور بأخلاقه العالية وفنه الراقي وصاحب واحد من أشهر المسلسلات العربية وهو مسلسل رأفت الهجان، واللى تسبب فى نعي المخابرات العامة للفنان الكبير فى واقعة ماحصلتش قبل كده فى مصر.

زبيده ثروت

عن عمر قريب من 76 سنه توفت الفنانة الجميلة والشهيرة زبيده ثروت، وصاحبة أجمل عيون فى تاريخ السينما المصرية وكانت ملقبة بقطة السينما المصرية وقدمت عدد من الأفلام المتميزة فى تاريخ السينما.

أحمد راتب

أخر وفاة فى 2016، وواحد من أسوأ الأخبار اللى ختمنا بيها 2016 كانت وفاة الفنان الموهوب والمتميز أحمد راتب… راتب تخصص فى الأدوار المركبة والصعبة، وعمل دويتو فني مع الفنان عادل إمام لفترة طويلة من الزمن، وجاء خبر وفاته المفاجئة بعد صراع لفترة متوسطة مع المرض.

ربنا يرحم كل الفنانين اللى أمتعونا بفنهم، وقدموا لنا أفلام ومسلسلات متميزة وممتعة طوال فترة عطاؤهم الفني.