فيلمين عربي وفيلمين أجنبي في سينمات القاهرة.. هاتشوف ايه؟

أفلام جديدة قوية استقبلتها السينمات في القاهرة الفترة اللي فاتت.. تعالوا نستعرض معاكم ايه هي الأفلام دي وبتحكي عن ايه؟

Scream

أبناء التسعينات، اللي حوشوا مصروفهم علشان يشتروا أفلام فيديو، عارفين كويس يعني ايه سلسلة أفلام Scream. يعني السلسلة اللي استنزفت مصروفنا ووقتنا – وطبعا إحساسنا بالأمان- علشان نتفرج على المقنع الغامض اللي بيقتل ضحاياه بالسكين بدم بارد. والنهرده وبعد سنين طويلة رجعت لنا السلسلة تاني مع الجزء الخامس ومغامرة جديدة في محاولة الوصول لهوية القاتل الملثم.

Scream من إخراج مات بيتينيلي أولبين و  تايلر جيليت وبطولة كورتني كوكس و نيف كامبل.

قمر 14

ومن الأجنبي للعربي،  ومن الرعب للرومانسية من خلال مجموعة من القصص المتشابكة اللي بيجمعها حاجتين: ظهور (قمر ١٤) في سماء مصر، والحب اللي بيغير أحوال أبطال الفيلم وبيقودهم لاختيارات مصيرية في حياتهم.

قمر ١٤ فيه مجموعة ممتازة من النجوم زي أحمد الفيشاوي وخالد النبوي وغاده عادل وياسمين رئيس وأسماء أبو اليزيد وغيرهم. ومع اخراج هادي الباجوري بنتوقع أننا نكون قدام عمل تقيل ومختلف…

و.. أه.. بالنسبه للبنات اللي بعتت تسالنا هل الفيلم أتسمى (قمر ١٤) علشان خالد النبوي فيه؟ لا للأسف مش ده السبب : )

The 355

بما أننا بنتكلم عن البنات. فيلم The 355 يعتبر فيلم نسائي باقتدار. بيحكي عن مجموعة جاسوسية نسائية بتقرر توجد جهودها علشان تواجه خطر مجهول بيهدد العالم كله.

The 355 من بطولة جيسيكا شاستاين و لوبيتا نيونجو و ديان كروجر ومن اخراج سايمون كينبيرج. ولما تشوفوا اعلان الفيلم هاتحسوا أنه عن مجموعة ستات بتتحد علشان تضرب مجموعة رجالة أشرار.. لكن نتوقع أن الفيلم يكون فيه جرعة اثارة وتشويق لا يستهان بيها.

الجريمة

وعلشان بنحب دايما نسيب الأحلى للأخر.. فيلم الجريمة من تأليف وإخراج شريف عرفه. وبطولة أحمد عز ومنه شلبي وماجد الكدواني. وواضح من أسم الفيلم وقصته اللي بتحكي عن مجرم بيهرب من مصحة نفسية، أن فيه أكشن وتشويق وغموض كبير مستنينا، مع (سيكا) رعب حسينا بيها واحنا بنتفرج على التريلر.

أختاروا هاتتفرجوا على ايه.. وشاركونا اختياراتكم على السوشيال ميديا… مشاهدة ممتعة.