فيلم Vamps: فيلم تأدية واجب
اللى بـ نحبه فى هوليود هى أنها بـ تقدم للمشاهد اللى هو بالضبط محتاج يشوفه، بعض الأفلام بـ تقدم للمشاهد (اللى المفروض يشوفه) والفرق بين النوعيتين دول من الأفلام كبير. الفيلم ده من نوعية الأفلام اللى بـ تقدم للمشاهد اللى هو عاوز يشوفه.
الفيلم بـ يستهدف الجمهور العائلى اللى عاوز يتفرج على فيلم مع فيشار وبيبسى ويقضى أجازة سعيدة فى الويك إند ويرجع البيت فرحان، بالتالى الخيط الدرامى الخفيف للأحداث مش قوى بالدرجة الكافية، لأن الهدف من الفيلم رسم البسمة على وجوه المشاهدين.
الفيلم بـ يحكى عن بنتين مصاصات دماء بـ يعيشوا فى مدينة نيويورك، ورغم غرابة الفكرة أو إحساسنا أنها ممكن تكون فكرة مرعبة، إلا أنه تم تحويل القصة لحكاية مضحكة تستحق متابعتها من البداية للنهاية خصوصًا فى الجزء اللى بـ تقع فيه البنتين فى الحب وبـ تستمر الأحداث الكوميدية .
المخرجة إيمى هيركلينج قدرت تقدم لنا عمل خفيف فى وقت قليل، وروحها المرحة كانت واضحة فى كل تفاصيل الفيلم، و”قفشنا” نفسنا متلبسين بالبسمة على وجوهنا.
أبطال الفيلم رغم أن تمثيلهم ما كانش بالقوة اللى كنا متوقعينها إلا أنه بالنظر للمستهدف من الفيلم هـ نلاقى أنهم عملوا المطلوب منهم وزيادة كمان، وده اللى كنا متوقعينه.
موضة مصاصى الدماء فى السينما الأمريكية منتشرة فى الفترة الأخيرة، سواء كان البطل مصاص دماء أو إنسان بـ يتحول إلى مصاص دماء زى ما شوفنا فى سلسلة Twilight أو حتى رئيس الجمهورية لما بـ يتحول لقاتل لمصاصى الدماء زى ما شوفنا فى فيلمAbraham Lincoln Vampire Hunter ويا عالم يا هوليود مين ثانى هـ يتحول لمصاص دماء.. أنتم إيه رأيكم؟
