قدرات غير عادية : قدرات داوود عبد السيد غير العادية
فيلم قدرات غير عادية من الافلام اللى طال انتظارنا لها بقالنا فترة طويلة جدا.. بداية من مشاكل انتاجية واشاعات دخلتنا فى متاهات عن سبب منع الفيلم، وهل هناك مشاكل سياسية بتطارد نجوم الفيلم جعلت السلطات تتعنت فى الافراج عن الفيلم واتاحته للجماهير العريضة اللى بتحب سينما داوود عبد السيد؟ كلها كانت تكهنات انتهت بالسماح بعرض الفيلم اخيرا، ووجدنا نفسنا وجها لوجه امام قدرات داوود عبد السيد الغير عادية!
الفيلم من بطولة خالد ابو النجا و نجلاء بدر ومحمود الجندي وحسن كامي و عباس ابو الحسن وغيرهم من النجوم، وبيحكي عن شاب (خالد ابو النجا) بيحاول انجاز بحث عن القدرات غير العادية فى البشر، الامر اللى بيقوده فى بحثه للسكن فى بانسيون فى مدينة قريبة من الاسكندرية بتديره سيده غامضة (حياه) وبنتها الطفلة (فريده) واللى بتحمل قدرات خاصة لها علاقه بتوقع هطول المطر او اي حصان هايفوز فى السباق.. وغيرها من الامور الغرئبية.
الفيلم من نوعية الافلام اللى فيها لمحة فلسفية قوية جدا، ويعتبر من الافلام متعددة الرواة (يعني بنشوف الاحداث من وجهه نظر اكتر من بطل) وبنسمع تعليقات على الاحداث من خالد ابو النجا و نجلاء بدر على الأحداث المتعاقبة واللى بيتخللها موسيقي تصويرية اكثر من رائعة وممتزجه بخط صوفى جميل ورقيق استمر من الربع الاخير للاحداث وحتي نهاية الفيلم.
الاسماء بتلعب دور مهم وقوي فى الاحداث.. اسم (يحيي) يعتبر من الاسماء المفضلة لداود عبد السيد وبيستعمله كتير فى اسماء ابطال افلامه، كمان اسم (فريده) بيدل على صاحبته البنت (الفريده) فعلا واللى بتحمل جينات ممثلة ممتازه وهى الطفلة (مريم تامر) واللى بنتوقع لها مستقبل باهر فى مجال التمثيل.
على الرغم من احترافيته العالية لكن اداء محمود الجندي كان ضعيف، وحاول يضيف خيط كوميدي للاحداث بلا جدوي لان موضوع الفيلم لم يكن يحتمل اي كوميديا، لكن نجلاء بدر فى راينا قامت بدور عمرها وافضل ادوارها على الاطلاق، بالاضافة لعباس ابو الحسن اللى قدم دور ظابط الجهة السيادية بشكل متميز على العكس من كريم الشرقاوي اللى ادي دور كان ممكن يتم حذفه من الاحداث تماما دون ادني تأثير!
العلاقة بين المتشددين دينيا وبين المجتمع العلماني المنفتح بتظهر بشكل كبير فى احداث الفيلم، بداية من النظرات الغاضبه اللى بيوجهها الرجل الملتحي لخالد ابو النجا وهو بيشتري الخمور، او ضرب رجال السيرك بالحجاره وطردهم من المنطقة على ايدي اطفال ممولين من التيارات الاسلامية المتشددة، كلها اسقاطات وضعها داود عبد السيد فى فيلمه لتوصيل رسائل نعتقد انها هاتوصل كاملة من خلال احداث الفيلم.
قدرات غير عادية فيلم متميز، لكنه محتاج تركيز غير عادي وتعمق فى سينما المتميز والرائع داوود عبد السيد.
