قصص الإنسان فى القرآن: تجربة تستحق التشجيع
من الحاجات الجميلة فى عدد كبير من الفنانين المصريين أنهم بـ يهتموا يقدموا أعمال للأطفال، مش بـ يتكسفوا ومش بـ يحسوا بالتفاهة، ومش بـ يتملكهم الغرور، ودى حاجة لازم تخلينا نرفع القبعة لكل فنان قدم عمل أنيميشن، أو أى عمل آخر موجه للأطفال بشكل عام.
مسلسل “قصص الإنسان فى القرأن” ممكن نعتبره استمرار لمسلسل “قصص الحيوان فى القرآن” اللى سبق وقدمه الفنان يحيى الفخرانى فى رمضان اللى فات. المسلسل بـ يحكى عن كثير من القصص الجميلة فى القرآن الكريم زى قصة أصحاب الأخدود وطالوت وجالوت وذى القرنين وآل فرعون .
القصص بـ تحمل فى طياتها عظات وعبر كثيرة جدًا. ويمكن التحدى الأصيل كان أمام المخرج مصطفى الفرماوى أنه يقدم العظات والمعلومات بصورة نهائية محببة للأطفال وتشدهم للمتابعة من اللحظة الأولى للمسلسل.
المؤلف أحمد بهجت وقع عليه العبء الأول فى تبسيط المعلومات للأطفال، لكنه مشهور بقدرته الرهيبة على الكتابة السلسة وتقديم المعلومة بشكل سهل وبسيط وهنا جاء دور محمد أحمد بهجت –ابن الكاتب أحمد بهجت– أنه يصيغ القصص لسيناريو وحوار سهلين على المشاهدين من الأطفال، وإن كنا نتمنى لو كان الحوار بالعامية علشان يكون أسهل وأقرب للأطفال. لكن برضه تقديم الحوار بالفصحى ممكن ينمى قدرة الأطفال على استساغة اللغة والكلام بها بشكل صحيح من بداية نشأتهم.
بـ نسمع فى المسلسل أصوات كثير من النجوم المحببين لنا، بالإضافة ليحيى الفخرانى اللى جاء صوته دافئومحبب ومفعم بالأمل، بـ نسمع حنان ترك وشريف منير وصلاح عبد الله ولطفى لبيب وغيرهم من الفنانين الكبار، وزى ما قولنا قبل كده خطوة جميلة جدًا ومبادرة طيبة للتوجه للأطفال بعمل جميل زى ده.
الجرافيك مش رائع، لكن أدى الغرض، وعجبنا أن شخصيات المسلسل شبه الشخصيات الحقيقة لأبطاله، يعنى مثلا شخصية يحيى الفخرانى فى المسلسل مرسومة بشكل مشابه له ومحبب للأطفال.
قصص الإنسان فى القرأن مش بس مسلسل للأطفال، أى حد كبير ممكن يعجبه المسلسل ويتابعه باستمرار.. ننصحك تتفرج عليه.
