مش معني انك تكون نجم كبير فى مصر، انك تعزل نفسك فى برج عاجي وماتقبلش غير الاعمال اللى بتمجد فيك وبتطلعك بشكل معين مش بتقبل اقل منه. الحقيقه ان الفنان يحيي الفخراني هو الفنان الوحيد اللى بياكد لنا يوم بعد يوم انه الوحيد فى مصر – او من القلائل- اللى قادرين يعرفوا فعلا معني انهم يكونوا نجوم كبار.

الفخراني معودنا من فتره طويله على تقديم اداء صوتي متميز فى مسلسل موجه للاطفال فى رمضان.. من قصص الحيوان فى القران وقصص الانسان فى القران وقصص المرأة فى القرأن، وغيرها من البرامج المتميزة واللى كان اخرها (قصص الايات فى القران) واللى بيقدمها الفخراني السنة دي.

قصة المسلسل

من اجمل الامور فى المسلسل انه صالح للمشاهده فى اى عمر واي مرحلة سنية.. الكبار هايشوفو فيه طريقه جميله وسهله لتوصيل المعلومات الدينية المبسطة، وربط القصص القرأنية فى دماغهم بالرسوم المتحركة، اما الصغار هايلاقو فى البرنامج وسيلة ممتازه للتسليه وربط القران بالرسوم المتحركة الظريفة بالاضافة لاداء صوتي متميز تقريبا من كل المشاركين فى العمل.

القصة السنة دي منقسمة الى قسمين اساسيين، الاولى بتحكي عن ابن القاضى اللى بيقدر يصطاد حمامه زاجلة معلق فى قدمها رسالة تجسس، ومن ثم بيبدأ قاضى القضاه (الفخراني) وقائد الشرطة (ماجد الكدواني) فى محاولة تعقب الحمامة ومعرفة مرسلها.

الجديد في المسلسل

بيشارك الفخراني فى الاداء الصوتي احمد عبد العزيز اللى بنشوفه فى اكتر من عمل السنة دي فى رمضان ، ماجد الكدواني اللى اضاف على المسلسل روح من الكوميديا اللى كانت مطلوبه، احمد ماهر وريهام عبد الغفور ونهال عنبر وسوسن بدر، واللى يبدو ان مشاركة الفخراني فى المسلسل شجعتهم على خوض التجربة.

بنعيب على المسلسل مستوي الرسوم المتحركة، اللى على الرغم من قدرته على تجسيد الشكل الحقيقي للممثلين الاصليين، الا ان كان فى بعض المشكلات فيما يتعلق بمستوي التحريك وطريقة حركة الشخصيات الكرتونية على الشاشة.

قصص الايات فى القران مسلسل متميز بننصح بمتابعته للكبار والصغار على حد سواء، وبنشجع كل نجوم مصر الكبار على المشاركة فى تجارب مشابهة.. لانها بتنشىء جسر من التواصل الجميل بينهم وبين المشاهدين.