كلبش 2: باشا مصر يضرب من جديد!

من النادر في مصر أننا نعمل أجزاء تانية من الأفلام بتاعتنا، ومن الأندر أن الأجزاء دي تنجح. لكن بالنسبة للمسلسلات الدرامية. بقى لنا فترة طويلة جدا لم نشاهد جزء ثاني من مسلسل. ناهيك عن تحقيق الجزء الثاني لنجاح كبير ينافس نجاح الجزء الأول! ده اللي بيخلينا نقف ونتأمل ونحاول نفهم أكتر ايه السر وراء نجاح الجزء الثاني من مسلسل كلبش.

المؤلف باهر دويدار والمخرج بيتر ميمي كانوا مش عارفين انهم هايشتغلوا في جزء ثاني من مسلسل كلبش غير بعد النجاح الكبير اللي حققه الجزء الأول. وهنا بيكون قدام فريق العمل سكتين.. الأولى هي الاستمرار في البناء على شخصية سليم الأنصاري والاستمرار في نفس نهج الأحداث. أو البدء من جديد بشخصية جديدة غير سليم الأنصاري (لكن يفضل امير كرارة هو البطل) وتناسي اللي حصل في الجزء الأول. والحقيقة أن صناع المسلسل قرروا اتباع النمط الأول.

في الجزء الثاني بنشوف الشهرة الواسعة اللي أصبحت بتحرك سليم الأنصاري (أمير كرارة) سواء في أوساط الداخلية أو مع المواطنين العاديين، وفي نفس الوقت بنشوف عدو جديد وهو بيتجسد: جماعة من جماعات الأسلام السياسي بيقودها عبد الرحمن أبو زهرة (أبو العز الجبلاوي) وابنه (عاكف أبو العز) واللي بيقوم بدوره هيثم احمد زكي. وفي سبيل الانتقام من سليم الانصاري بيتم تدبير حادث إرهابي له… ياتري هايكون رد فعله ايه؟

أمير كرارة في الجزء الجديد أصبح أكثر تملكا من شخصية سليم الأنصاري. والجميل أن السيناريو مش بيظهره على صواب طوال الوقت، بل بالعكس بنشوف بعض عيوب شخصيته زي العصبية الزايدة أو الفهم الغلط لبعض الناس حواليه.

روجينا كاختيار نسائي في رأينا كانت اختيار غير صحيح وكنا محتاجين ممثلة قادرة على إدارة انفعالاتها بشكل أفضل من اللي شوفناه على الشاشة. أما عبد الرحمن أبو زهرة فكان محتاج يظبط لهجة الكلام الصعيدية أو البدوية أفضل من كده.

بنعيب على السيناريو أن الشخصيات فيه واضحه وماشيه على نمط واحد. يعني سليم الانصاري حقاني وبينتصر للمظلومين. والشخصيات الشريرة مش بتظهر أي ملامح رحمة أو حب. شخصيات شريرة من الالف للياء بعيدا عن المنطقية والواقعية. وكأن المشاهد ماعندوش اختيارات بخصوص انحيازه الأخلاقي ناحية طرف ضد طرف!

لكن من ناحية تانية المسلسل بيشجع على الأنتماء للبلد والالتفاف وراء الداخلية ونبذ الإرهاب والعنف والتلاعب بمصائر البشر. وفي نفس الوقت بيقدم دراما بتجمع بين الأكشن والحركة مع بعض الرومانسية وبعض المشاهد الكوميدية اللي وجودها في المسلسل أضاف له وخلاه من المسلسلات القوية اللي بينتظرها قطاع كبير من المشاهدين.