كل اللي محتاجين تعرفوه عن تطبيق Watchit لمشاهدة المسلسلات العربية
خبر مفاجئ أعلنته شبكة اعلام المصريين بقرارها عدم عرض مسلسلات رمضان على يوتيوب زي ما بيحصل كل سنة. واستبدال تجربة المشاهدة الالكترونية بتطبيق خاص بها هايتعرض عليه المسلسلات والأفلام طوال السنة مش بس في رمضان.
توقيت إذاعة الخبر كان قبل بداية شهر رمضان بيوم واحد تقريبا. ومع هجرة عدد كبير من المشاهدين من مشاهدة مسلسلاتهم المفضلة على التليفزيون بالطريقة التقليدية بسبب الإعلانات الطويلة والمملة. بدأ قطاع كبير من المستخدمين في الاعتماد على يوتيوب بشكل يومي علشان يشوفوا مسلسلاتهم. علشان كده الخبر أقلق ناس كتير وبدأت السوشيال ميديا تسأل عن التطبيق الجديد وأسعار الاشتراك فيه وهل الموضوع كويس ولا وحش. كل الأسئلة دي وأكتر هانجاوب عليها في تقريرنا.
- هل المسلسلات مش هاتتعرض على التليفزيون؟
لا. المسلسلات هاتتعرض على التليفزيون عادي جدا زي كل سنة. لكن مع الفواصل الطويلة والمتكررة خاصة في شهر رمضان بيتفرج ناس كتير على اليوتيوب. اللي مافيهوش إعلانات – او إعلانات قليلة جدا- مع القدرة على المشاهدة في أي وقت ومن خلال التليفونات المحمولة بشكل أكثر سهولة ومجاني تماما. لكن “اعلام المصريين” قررت تخلي المشاهدة حصرية من خلال تطبيقها فقط.
- ازاي اتفرج على المسلسلات بالشكل الجديد؟
من خلال تحميل تطبيق watchit على التليفون المحمول سواء بنظام اندرويد من هنا أو IOS من هنا أو حتى المشاهدة من خلال الموقع الالكتروني نفسه من هنا http://www.watchit.com/ لكن المشاهدة مش مجانية. الموقع بيوفر 3 باقات للأشتراك. الأولى شهرية بـ 99 جنيه والثانية بـ 555 لنصف سنة والثالثة بـ 999 جنيه لسنة كاملة وفي كل الأحوال الأسبوع الأول مجاني لتجربة الخدمة.
- ايه هي مميزات وعيوب النظام الجديد للمشاهدة؟
أولا المشاهدة مشروعة تماما بعيد عن مواقع التحميل الغير شرعية. ومافيهاش إعلانات خالص يعني افضل حتى من تجربة المشاهدة على اليوتيوب أو التليفزيون. كمان اعلام المصريين بتوفر حوالي 15 عمل من اهم واقوى الاعمال الرمضانية يعني مافيش زهق او عدم وجود محتوى مناسب لان كل المحتوى تقريبا جديد.
أما عن عيوب نظام المشاهدة الجديد انه هايخلي اللي عاوز يتفرج الكترونيا يدفع فلوس وطبعا دي حاجه مش مناسبه لكل الناس. ثانيا الموقع مافيهوش نفس مميزات يوتيوب القوية اللي بيقدمها جوجل زي القدرة على المشاهدة على التليفزيون مثلا من خلال برامج السمارت اللي في التليفزيونات الحديثة. كمان الموقع بيقع لوقت طويل نتيجة كثافة الدخول عليه لكن نتوقع المشاكل تنتهي مع التشغيل الدائم للتطبيق.
