لعبة pubg قادمة للبلاي ستيشن في ٢٠١٨

محبي ألعب القتال والإلتحام واللي بيشترك فيها مجموعة كبيرة من اللاعبين. عارفين كويس لعبة PUBG أو PLAYERUNKNOWN’S BATTLEGROUNDS واللي تعتبر اللعبة الأشهر والأكثر انتشارا على مستوى العالم في النوع ده من الألعاب.

اللعبة عبارة عن شخص مجهود بيتم القاؤه من طيارة، وبيبدأ يجمع أسلحة ومعدات من البيئة اللي حواليه. ثم يدخل في مطاردات واشتباكات مع لاعبين تانيين. وفي النهاية يتبقى لاعب واحد هو اللي بيفوز ويحقق النصر.

وعلى الرغم من بساطة فكرة اللعبة إلا أنها نجحت في جذب الملايين علشان يلعبوها بشكل (إدماني). وفي بعض الأحيان أدت اللعبة لخلافات عائلية كبيرة أو حتى حالات طلاق بسبب الإنشغال بلعبها لوقت طويل!

لكن محبي PUBG كان عندهم مشكلة. وهي العقد الحصري بين اللعبة وبين شركة مايكروسوفت صاحبة جهاز XBOX الشهير في عالم الألعاب. الأمر اللي كان بيخلي محبي اللعبة مش عارفين يلعبوها غير على أجهزة إكس بوكس. أو أجهزة الكمبيوتر الشخصية.

لكن الكلام ده أصبح من الماضي، بعد إعلان بلاي ستيشن عن تقديم اللعبة على منصاتها وأجهزتها، وأهمها جهاز بلاي ستيشن 4 اللي يعتبر من أشهر أجهزة الألعاب في العالم. والخبر أثار حالة من الفرح بين مستخدمين السوشيال ميديا واللي كانت الطريقة الوحيدة علشان يلعبوا بيها PUBG بعيدا عن اكس بوكس هي اللعب من خلال الموبايل. وطبعا تجربة اللعب على الموبايل أقل استمتاعا وبتضطر بطارية الموبايل بشكل كبير.

بلاي ستيشن أعلنت أن اللعبة هاتكون متوفرة في 7 ديسمبر القادم. لكنها أعلنت عن فتح باب الحجز المسبق للعبة. وقدمت اللعبة في 3 إصدارات.

• الإصدار الأساسي بيحتوي على اللعبة فقط بدون أي إضافات مقابل حوالي 30 دولار.
• إصدار Survivor بييجي معاه إضافات في اللعبة تسهل اللعب مقابل حوالي 50 دولار.
• إصدار Champion وده الأغلي. وبييجي معاه إضافات أكتر بكتير مقابل حوالي 60 دولار.

لكن الأسعار دي أسعار مخفضة أعلنت عنها بلاي ستيشن علشان تشجع الناس على شراء اللعبة. ومن المتوقع أن الأسعار تزيد مع الإصدار الفعلي وإقبال الناس عليها.

اللعبة كمان بتحتاج إتصال دائم وقوي بالإنترنت، واشتراك في باقة PS Plus واللي بتتيح اللعب أونلاين مع لاعبين أخرين باشتراك شهري أو سنوي أو ربع سنوي حسب اختيار المستخدمين.

محبي لعبة PUBG واللي لعبوها لوقت طويل على الموبايل.. ياريت يقولوا لنا استقبلوا الخبر ازاي؟ وهايعملوا ايه لما يلعبوا على بلاي ستيشن؟ والناس اللي أول مرة تسمع عن اللعبة… هل جه الوقت أنكم تجربوا أدائكم مع لعبة جديدة ومختلفة وليها شهرة عالمية؟