لف ودوران : حلمي بيلف ويدور على الجمهور!
لازم نعترف إن الفنان أحمد حلمي واحد من أذكي فنانين جيله، إن مكانش أذكاهم على الإطلاق، والوحيد القادر على الخروج من أزماته مع الجمهور وتجديد ثقته فيهم من جديد وإعادة بناء الثقة بينه وبينهم وكمان القدرة على اكتساب مساحات وأراضي جديدة من الجمهور من فئات مختلفة وطبقات متفاوته. وده تحديداً اللى حصل فى (لف ودوران).
الفيلم من تأليف منة فوزي وإخراج خالد مرعي وبيشارك أحمد حلمي فى البطولة دنيا سمير غانم وصابرين و إنعام سالوسة و جميلة عوض و-طبعا- بيومي فؤاد و ميمي جمال.
الفيلم بيحكي عن قصة شاب مصري بيشتغل مرشد سياحي إيطالي، بيقرر يرتبط ببنت إيطالية ويهاجر معاها، لكن أخته وأمه وجدته وخالته بيتأمروا ضدة علشان يوقعوا بينه وبين (الخواجايه) علشان يفضل قاعد معاهم، وفى نفس الوقت يرتبط بالبنت اللى بتشترك معاهم فى المؤامرة (دنيا سمير غانم).
أداء أحمد حلمي جه فى المنطقة (الأمنة) المتوقعة منه.. الشاب الغني اللي بيقول دايماً إيفيهات تضحك الناس.. محور الإهتمام والأحداث كلها بتدور إما بسببه أو علشانه… بطولة مطلقة زي الكتاب ما بيقول، لكن لازم نقول إنه فى الفيلم ترك مساحة لباقي الشخصيات علشان تاخد حقها فى الظهور وفقاً لترتيب وثقل كل دور منها… وده اللى هانستعرضه دلوقت.
دنيا سمير غانم دورها كان متميز.. على الرغم من صعوبة تقاسم البطولة مع أحمد حلمي لكن دنيا قدرت تعملها وتقتنص دورها وتقدم أداء متميز وكوميدي، أما جميلة عوض والمشهورة بدور (هانيا) فى مسلسل تحت السيطرة فكان دورها هو الأسوأ فى الفيلم أو فى أدوار جميلة نفسها.
صابرين وميمي جمال وإنعام سالوسة كانت أدوارهم تقليدية ومساحتها صغيرة، أما بيومي فؤاد فكان فى غير فورمته إطلاقا ودوره ما قدمش أي جديد علي صعيد الدراما أو الكوميديا.
شعرنا مع اقتراب الأحداث من النهاية إن حلمي بـ(يلف ويدور) على الجمهور ومش بيقدم فيلم كوميدي زي ما كنا متوقعين منه.. على العكس هو بيحاول يقدم خلطة تجمع بين الرومانسية والفيلم الإجتماعي مع بعض الكوميديا لزوم تظبيط خروجة العيد. بالتالى الفيلم ومساحته الكوميدية ممكن تكون صادمة شوية للناس اللى كانت داخله الفيلم ومنتظرة إن الفيلم يكون كوميدي بس.
مستوي التصوير فى الفيلم كان متميز.. الإضاءة كمان كانت رائعة خاصة المشاهد على الجزيرة.. الديكور رغم بساطته كان قادر على وضعنا فى سياق الأحداث وعجبنا الإستغلال المتميز للطبيعة الساحرة لشرم الشيخ فى تصوير أحداث الفيلم.
(لف ودوران) هو أفضل أفلام عيد الاضحي فى رأينا.. لكنه –باختصار- مش أحسن أفلام أحمد حلمي.. لسه في أحسن من كده منتظرينه منه.
