هز وسط البلد : الكل شىء.. والاشىء!
كويس انك تعمل فيلم وتبقى عاوز تقول فيه حاجه معينة. كويس انك تعمل فيلم وتبقى عاوز تقول فيه حاجات كتير. لكن الوحش.. انك تعمل فيلم تعوز تقول فيه (كل شىء)، وفى الاخر تفشل فى توصيل اى شىء!
من تأليف و اخراج محمد صلاح ابو سيف بنشوف الهام شاهين وزينه و حورية فرغلى، بالاشتراك مع فتحي عبد الوهاب فى فيلم بيحاول يحكي عن الفساد فى كل شىء فى المجتمع المصري، السياسة والفن والسينما والانتاج السينمائى، البطالة واطفال الشوارع وبيع الاطفال، كل ما يمكن ان يخطر ببالك من رزائل بتحصل فى المجتمع المصري، تم تلخيصها فى هذا الفيلم القاتم. طيب والحل؟ لا يوجد حلول .. كالعاده
مشكلتنا فى السينما المصرية اننا ادمنا انتاج افلام بتتكلم وتناقش مشاكلنا، لكن بدون فيلم واحد بيتكلم عن الحلول، حتي الحلول اللى بتقدمها السينما بتكون ضعيفه ومفبركه، وفى الاحاديث الصحفية اللى بتتعمل مع نجوم العمل وابطاله، الكل بيتكلم عن الفساد والمشاكل، مافيش واحد بيتكلم عن الحلول او المقترحات اللى ممكن تتعمل علشان البلد تكون افضل!
اداء زينه كان كويس ومختلف عن باقى ادوارها السابقة الى حد كبير، وقدرت تقوم بشخصيتها بشكل كويس، على العكس من حورية فرغلى اللى شعرنا ان ادائها كان اضعف من فيلم زي (ديكور) على سبيل المثال، واللى من بعده كان لازم على حوريه انها تنقى ادوارها بتأني اكتر بكتير من كده، اما الهام شاهين اللى بتنافس نفسها بادوارها فى (ريجاتا) و (هز وسط البلد)، يبدو انها بتتبع مؤخرا ثورة على اسلوبها التمثيلى السابق، وبتبدا فى اكتشاف مناطق جديدة من ادائها، بعيدا عن الست الجميلة او النجمة الامعة.
الديكورات كانت كويسه، وقدرت تدخلنا فى الجو العام الخاص بالفيلم، لكن الموسيقي التصويرية كانت ضعيفه، ولم نشعر باى تميز بخصوصها، المونتاج الضعيف ايضا كان من الامور اللى لفتت انتباهنا وحبينا انها تكون اقوي.
(هز وسط البلد) فيلم تدخله لو كنت من محبى افلام توصيف المشاكل واظهارها، اما لو كنت زهقت –زينا- من النوعية دي، نقترح عليك تشوف فيلم تاني.
