يوم للستات : يوم لحرية المرأه!

المخرجين والكتاب المصريين والعرب، لازم يبدأوا فى التفكير فى تيمة (المكان)، ومعناها أن مكان ما يتحول من مجرد مكان جغرافي، لمكان بطل للأحداث وصاحب دور فعال فيها.. تقريباً كل الأفلام اللى تناولت المكان كلاعب رئيسي فى الأحداث حققت نجاح كبير.. ولا يمكن نستثني ( يوم للستات) من القاعدة دي.

الفيلم من إخراج كاملة أبو ذكري ومن بطولة نيللي كريم وإلهام شاهين وناهد السباعي، بمشاركة كبيرة من فنانين كبار جدا زي  فاروق الفيشاوي  محمود حميدة  هالة صدقي وغيرهم كتير.

الفيلم بيحكي عن مجموعة من السيدات فى منطقة شعبية، وبيتم تخصيص حمام السباحة الموجود فى المنطقة اللى عايشين فيها علشان يتم تخصيص يوم من أيام الإسبوع إنه يكون للسيدات فقط.. الخبر اللى بيقابله سكان المنطقة ما بين مؤيد ومعارض.

من هنا بيتحول حمام السباحة من مجرد مكان للاعب فى الأحداث… حمام السباحة بيغير ويؤثر فى شخصية أبطال الفيلم، وبيلعب دور رئيسي فى الأحداث لا يقل عن دور باقى أبطال الفيلم!

بالنسبة للأداء التمثيلي نقدر نقول بضمير مرتاح أن الفنانة الهام شاهين قدمت أفضل أدوارها الفنية فى تاريخها الفني كله، وهى بالمناسبة منتجة الفيلم أيضا… الهام شاهين قدرت تقدم دور معقد وشخصية إمرأة جريئة بتواجه مجتمعها بصدر مفتوح.. ملابسها ومكياجها والحوار المكتوب لها كلها أمور تضافرت علشان تأكد على شخصية الهام العنيدة والجريئة.

نيللي كريم قدمت شخصية سيدة فقدت أسرتها فى حادثة العبارة المصرية الشهيرة.. ومن يومها مش قادرة تتجاوز الحزن والإكتئاب اللى بيسيطر على حياتها.. ومن هنا بيتدخل ذهابها لحمام السباحة علشان تبدأ فى رحلتها ضد أحزانها وكيفية التصدي لها.

سيناريو الفيلم قدر يفرد مساحة مميزة للشخصيات الرئيسية للفيلم، لكن الحوار فى أجزاء كبيرة منه كان مباشر  وحسينا أننا أمام خطبة عصماء بأكتر من مجرد كلام عادي بيخرج من شخصيات عادية بنقابلها فى حياتنا اليومية زى ما هو المفروض من الشخصيات اللى بنشوفها قدامنا.

الديكورات كانت ممتازة واختيار أماكن التصوير كان رائع، وكان من الواضح اهتمام المخرجة كاملة ابو ذكري اختيار اماكن حقيقية وتقديم صورة حية وحقيقية ومليئة بالحركة، وده كان واضح من الكادرات المتميزة اللى قامت المخرجة بتكوينها وساعدت على استمتاعنا بالفيلم.

سواء اختلفنا مع (يوم للستات) من عدمه، لايمكن  ننكر أنه فيلم محترم ومحاولة جادة على  طريق تقديم سينما مصرية متميزة وبتناقش قضايا مهمة وفلسفية.

علشان تبقى عارف:

• الفيلم يعتبر ثاني تعاون سينمائي على التوالي بين إلهام شاهين والمخرجة كاملة أبو ذكري بعد (واحد/صفر).
• الفيلم هو أول فيلم سينمائي طويل لكاملة أبو ذكري منذ عام 2009 الذي شهد عرض فيلمها (واحد/صفر).
• الفيلم يمثل التعاون الثاني بين إلهام شاهين والكاتبة هناء عطية بعد فيلم (خلطة فوزية).