أخلاق العبيد: جديد خالد الصاوي في السينما

بعد متابعتنا له بداية من دوره المثير للجدل في فيلم عمارة يعقوبيان، ومرورا بكتير من أدواره في السينما والتليفزيون، وبالإضافة لمشاركته في الحياة الثقافية وتأليف الدواوين الشعرية، وغيرها من الأمور. كل ده بيخلينا نثق يوما بعد يوم من أن خالد الصاوي فنان عبقري، وواحد من أفضل من وقفوا أمام الكاميرا في جيله الفني.

لكن العظمة والعبقرية زي ما بتكون قوية في النجاح، بتكون قوية في الفشل والسقوط، وأمثال خالد الصاوي بيعتبروا عدم النجاح أو التوفيق من أول مرة، خطوة أساسية وضرورية لاكتشاف طرق جديدة للنجاح والتألق.

قصة أخلاق العبيد

فيلم أخلاق العبيد، وهو أحدث أفلام خالد الصاوي، بيحكي عن رجل الأعمال رضوان الجمال، واللي بيعاني من مرض نفسي بيخليه عرضه للانهيار العصبي بسهولة، الأمر اللي بيخليه يرجع من بره لمصر، لكنه بيصادف مجموعة من المواقف والمشاكل اللي بتفجر الأوضاع بالنسبة له، وبتكشف لنا كتير من الحقائق.

فريق عمل أخلاق العبيد

بيشارك خالد الصاوي في بطولة الفيلم يسرا اللوزي، وسارة سلامة، وكارولين خليل، ولطفي لبيب، ومحمد شرف، ورامي غيط، وهو من تأليف عصام الشماع، وإخراج أيمن مكرم، وتم تصويره ما بين مصر وتايلاند.

رأينا في الفيلم

أما عن الأداء التمثيلي، وعلى الرغم من تميز خالد الصاوي، لكن في رأينا كان محتاج أداؤه يكون أفضل من كده، أو علشان نكون واضحين: كان محتاج أداؤه يكون أقل انفعالا وأكثر واقعية. أما أداء باقي الممثلين معاه، فكان تمثيلهم باهت وغير محدد الملامح. وخاصة يسرا اللوزي وسارة سلامه، واللي حسينا إن أداؤهم كان المفروض يكون أقوي وأكثر تكثيفا.

ديكورات الفيلم واستغلاله التصوير في تايلاند كانت رائعة جدا، ودي تقريبا الحسنة الوحيدة في الفيلم، أما الموسيقي التصويرية فكانت متذبذبة ما بين الجيد والسيء

بنشوف في الفيلم مشاركات من الفنان محمد شرف، واللي كان تعرض لوعكة صحية كبيرة الفترة الأخيرة، والحقيقة ان شرف من الفنانين الغير مسلط عليهم الضوء إعلاميا على الرغم من موهبته الضخمة. وبنتمني انه يقوم بالسلامة، كما بنشوف ظهور للفنان مراد مكرم، وهو مقدم برنامج “الأكيل” على برنامج سى بى سى سفرة. ومراد من الناس اللي بنتوقع أنه هايشق طريقه في مجال التمثيل بسرعة ممتازة، لإنه موهوب ومن الواضح ان فيه الجزء (المطرقع) الموجودة في أي فنان!

الخلاصة:

أخلاق العبيد كان ممكن يكون فيلم أفضل لو تم الاهتمام به أكتر من كده. فنيا وانتاجيا

علشان تبقى عارف:

يسرا اللوزي بطلة الفيلم من مواليد 1985 ودرست في الجامعة الأمريكية قبل ما تتجه لمجال التمثيل.