أزمة نسب: مسلسل بيعاني من أزمة دراما!

مسلسل أزمة نسب من المسلسلات اللى اثارت ضجة كبيرة فى رمضان2016، بداية من اسم المسلسل واللى اتغير بعد الحكم فى قضية النسب الشهيرة بين أحمد عز وبطلة المسلسل زينة، الأمر اللى خلي ناس كتير تقول ان تغيير الإسم جه لإستغلال الحكم فى القضية بتاعة زينه لايهام المشاهدين ان المسلسل بيحكي عن قضية ازمة النسب الشهيرة. لكن للاسف مش دايما المسلسل اللى بيثير جدل كتير بيكون هو المسلسل الأفضل… مسلسل أزمة نسب خير مثال على كلامنا ده.

من اخراج سعيد حامد وبطولة زينة ومحمود عبد المغني وراندا البحيري وفريال يوسف ومن تأليف محمد صلاح العزب بنشوف قصة بنت فقيرة عايشه فى حي شعبي وأمها بتشتغل فى مجال الدجل والشعوذة، وبتحاول توهم رجال الاعمال انها تقدر تعرف ايه الافضل بالنسبة لمشاريعهم وحياتهم الشخصية والمالية.

بعد كده بنعرف ان زينة متجوزه ابن واحد من أشهر رجال الأعمال، واللى محمود عبد المغني بيشتغل سائق فى الفيلا بتاعتهم، وفى نفس الوقت والدة زينة بتعمل شغل دجل وشعوذة على المليونير اللى مش عارف حقيقة اللى بيحصل من ورا  ضهره، ثم بتتعقد الأمور لما بينكشف أمور الجواز وبيدخل كل أبطال المسلسل فى دوامات متتاليه من الصراع، خاصة مع محاولات ابليس او محمود عبد المغني انه يحقق  اي نفع باي طريقة ممكنه من ورا التعقيدات دي.

حاجات كتير فى المسلسل كانت غير منطقية بالمرة، بداية من اسم (ابليس) وسببه اللى حاول المسلسل تبريره بإسلوب غير منطقي او مفهوم للمشاهد، ولو كان اهل الحارة سهل عليهم يستعملوا اسم ابليس مع محمود عبد المغني، ايه يدفع اهل الفيلات والقصور اللى بيشتغل معاهم انهم ينادوه بنفس الإسم؟ الموضوع ده ممكن ناخده مقياس لاحداث كتير بتحصل فى المسلسل بدون تبرير او بمبرر يصعب فهمه والتعامل معاه، وبشكل عام حسينا انه تمت كتابة المسلسل باستسهال واستعجال علشان يلحق العرض فى سباق رمضان.

الموسيقي التصويرية كانت غير مؤثرة فى المسلسل.. لا لون ولا طعم ولا رائحه.. وللأسف حسينا ان وجودها كان زي عدمه وده فى راينا من اكبر عوامل بتعرفنا ان اللى عمل الموسيقي التصويرية للمسلسل ماعملهاش (بمزاج) وانها كانت معموله فقط علشان يكون للمسلسل موسيقي والسلام.

الأداء التمثيلي لمعظم الأبطال كان نمطي، أداء زينه كان مبالغ فيه جدا واداء محمود عبد المغني كان مايفرقش كتير عن اداؤه فى باقى الافلام اللى قدمها قبل كده.. كل العوامل دي بتشير لفشل اخراجي ذريع فى تقديم اي جديد او اخراج اي شخصية من الابطال من شخصيته الاصلية واعادة تقديمه من جديد فى دور مختلف تماما.

أزمة نسب مش من مسلسلات رمضان التقيلة اللى ننصح بعدم تفويت حلقه واحده منها… شوفوه لما تخلصوا مشاهدة باقى المسلسلات والبرامج.