أشغال شقة جدا .. موسم جديد ونجاح جديد
السنة اللي فاتت شوفنا الموسم الأول من مسلسل اشغال شقة، والحقيقة انه عجبنا جدا وكان في رأينا واحد من أحسن المسلسلات الكوميدية في رمضان. السنة دي في رمضان ٢٠٢٥ بنشوف استكمال لنفس النجاح اللي حققه الموسم الأول، على الرغم من خوفنا من أن الفكرة أصبحت مستهلكة، لكن هشام ماجد ومصطفى غريب وباقي فريق عمل المسلسل اثبتوا لنا ان التكرار ممكن يحقق نفس النجاح..وأكتر.
أحداث الموسم الجديد بتستكمل من نهاية الموسم السابق، لكن لو ماشوفتش الجزء اللي فات تقدر تتفرج على الجزء ده عادي بدون مشاكل في فهم الأحداث. بنشوف الطبيب الشرعي حمدي (هشام ماجد) ومراته أسماء جلال (ياسمين) في مواقف كوميدية جديدة، لما بيقرروا يعينوا حد معاهم في الشقة يساعدهم في شغل البيت. نفس السيناريو اللي كتبه خالد وشيرين دياب، لكن المرة دي مع مواقف كوميدية أكتر
في رأينا ان المرة دي المواقف الكوميدية مكانتش نابعة بالأساس من الشغالات اللي بيتم الاستعانة بيهم، لكن بالأساس من شخصية عربي (مصطفى غريب) اللي كان شايل لوحده ٦٠٪ تقريبا من كوميديا الأحداث، سواء الايفيهات او المعتمدة على المواقف المختلفة. أما لو هانتكلم عن الشغالات فا الحلقات الأولى اللي ظهرت فيها شخصية (مدينة من نيجيريا) عملت لنا بجد صراخ من فرط الضحك، والحقيقة ان اسلام مبارك الفنانة السودانية اللي قامت بالدور عملته بأفضل ما يكون ونتوقع أن دورها هايكون بداية انطلاق لها في أعمال تانيه قادمة.
في (اشغال شقة جدا) تمت زيادة مساحة دور درية، والدة الدكتور حمدي (الفنانة شيرين) واللي لعبت هي كمان دور الحماة المتسلطة بشكل كويس وكوميدي جدا، أما دكتور عصام (محمد عبد العظيم) فكان خطير في تجسيد دور الطبيب الشرعي اللي بيتحمل كل المصايب اللي بيحطها عليه الثنائي هشام ومصطفى غريب.
هشام ماجد بيثبت يوم بعد يوم انه حصان كوميدي منطلق بقوة غير عادية، وفي رأينا هو تفوق في الموسم ده على أكرم حسني في مسلسل (الكابتن) اللي لعب كوميديا من المنطقة المُعتادة اللي ممكن تخلينا مبتسمين أحيانا، لكن مش بتخلينا واقعين على الأرض من الضحك زي ما حصل مع أشغال شقة.
ولأن الكوميديا الحلوة دايما بتجيب معاها مشاكل كتير لإنها بتخبط في (الحلل) طول الوقت، شوفنا اعتراضات كتير على المسلسل وبعض الشخصيات اللي ظهرت فيه، زي شخصية (مدينة) اللي ممكن بعض المشاهدين يشوفوا فيها حالة من التنمر، أو شخصية سناء اللي قامت بيها فدوى عابد واللي أثارت تحفظ برضو من البعض.
أسماء جلال صاحبة الاطلاقة الجميلة، السيناريو حاول يعطيها مساحة للكوميديا أكتر من مرة، لكن أسماء أدائها كان أقل من توقعاتنا بكتير، يمكن علشان محاطه دايما بحيتان كوميديين زي هشام ماجد ومصطفى غريب. لكن برضو كان عندنا توقعات أعلى بخصوصها.
بيعيب المسلسل من وجهة نظرنا ان ايقاعه اللي كان سريع جدا في الأول كان أحيانا بيكون بطىء، مع بعض الشخصيات زي شخصية انتصار أو ناهد السباعي، كمان بعض المواقف الكوميديا زي ما قولنا ممكن تكون مثيرة للاشمئزاز زي حلقة تحليل البول، أو بعض الايفيهات اللي كان فيها تلميحات جنسية أو تلميحات لشتايم مش كويسة. لكن هي كده دايما الكوميديا، علشان توقعك من الضحك مش هاتكون دايما ماشيه قواعد الأدب والأخلاق.
أشغال شقة جدا هو موسم ثاني واعد جدا وفي رأينا انه أكيد مكمل معانا للموسم الثالث، ونتمنى انه يكون على نفس القوة من الكوميديا وأكتر كمان، مع مواقف جديدة ونجاح جديد بإذن الله.
