أفضل 10 أفلام أجنبية فى 2016

ميزانيات ضخمة وأفلام ضعيفة! الجملة دي ممكن تلخص الموسم السينائى العالمي لسنة 2016.. لاحظنا فيها إهتمام بالكم على حساب الكيف.. واهتمام بجودة الصورة على حساب قوة القصة، وبقوة المؤثرات على حساب ضعف الأداء التمثيلي.. طبعا بعض الأفلام بتعتبر شاذه عن القاعدة دي.. وهى دي الأفلام اللى هاتصنع قائمتنا بالعشرة أفلام الأفضل فى 2016 من وجهه نظرنا.

Don’t Breathe

شوية غموض على شوية إثارة على أداء تمثيلي متميز من سيرجيج أونوبكو و جاين ماين جرافيس و دانيل زوفاتو بيخلونا نرشح Don’t Breathe كواحد من أفضل الأفلام فى 2016.. على الرغم من ميزانيته المنخفضة، لكن المستوي الإخراجي والأداء التمثيلي، والسيناريو المتميز، كل الأمور دي ضاعفت إعجابنا بالفيلم وجعلتنا نرشحه كواحد من أفضل الأفلام فى 2016.

Doctor Strange

ماينفعش نبقى فى سنة 2016 .. واللى نقدر نعتبرها واحدة من أهم السنوات فى تقديم شخصيات الـ Super Heroes منغير مانتكلم عن السوبر هيرو الجديد… الدكتور ستيفن سترينج اللى بيتعرض لحادثة بتجعله غير قادر على ممارسة الطب، الأمر اللى بيخليه يطرق أبواب جديدة ويجرب طرق مختلفة للعلاج. ومن هنا بتبدأ رحلة الدكتور سترينج علشان يتحول من شخص عادي لبطل خارق.

الفيلم من  تأليف جون سباهتس اقتباساً عن رواية ستيف ديتكو المصورة، واللى وضع لها السيناريو والحوار سى روبرت كارجيل و سكوت دريكسون.. كل الاسماء دي تضافرت علشان تقدم لنا فيلم متميز، وساعد الإخراج والمؤثرات الخاصة على تقديم صورة متميزة وحيوية ومقنعة لعين المشاهد.. كل ده بيخلينا نرشح الفيلم لواحد من أفضل الأفلام فى 2016.

Allied

نسيب الأكشن والرعب ونتكلم عن نوعية مختلفة شوية…. الجاسوسية والرومانسية لما يمتزجوا مع بعض.. والأداء التمثيلي لبراد بيت لما يتحد مع جمال ماريون كوتيلارد وتمثيلها المتميز… وكل ده لما ينضرب فى خلاط الحرب العالمية الثانية وأجواء مشحونة بالترقب والقلق متخيلين النتيجة ممكن تكون ايه؟ بالظبط كده… النتيجة بتكون قصة عن ظابط قوات خاصة ومخابرات بريطاني بيرتبط ببطلة مقاومة شعبية فرنسية فى كفاحهم ضد الألمان.. لكن أحداث الفيلم بتنقلب رأساً على عقب لما…. هاتعرفوا لما تتفرجوا!

Moana

واحد من أجمل أفلام الأنيميشن اللى شوفناها فى 2016… نقدر نقول إنه جرعة من التفاؤل والإصرار والإيجابية فى مواجهة المشاكل والتفكير خارج الصندوق واكتشاف الحلول المبتكرة والسعي وراءها مهما كانت مكلفة وغير منطقية.

الميزة فى الفيلم انه بيخاطب الكبار والصغار على حد سواء، والأداء الصوتي لأبطاله أولي كارافالو و دواين جونسون و ألان توديك و ريتشيل هاوس و  جيمني كليمنت و  تيمويرا موريسون كان متميز.. كمان التحريك وظهورالشخصيات الكرتونية على الشاشة وحركتها وانسيابها… كلها أمور جعلتنا نرشح الفيلم كواحد من أفضل الأعمال فى 2016.

Lion

إقتباساً عن قصة حقيقية مُلهمة ومؤثرة، بنشوف قصة طفل هندي بيتوه من أهله وهو صغير، وبيركب القطار لمدينة مش عارف عنها حاجه ومش بيعرف يتكلم بلغة أهلها، ثم بتتبناه أسرة أسترالية وبيعيش معاهم حوالى 20 سنة، قبل ما يقرر يرجع لاسرته الهندية الأصلية.. الأمر اللى بياخد الفيلم لمنحني جديد ومختلف.

كان صعب على كتير من المشاهدين أنهم يكتموا دموعهم أمام الجرعة الإنسانية اللى قدمها لنا الفيلم، السيناريو والإخراج والتمثيل كلها عوامل تضافرت علشان تقدم لنا واحد من أفضل الأفلام فى 2016 حسب تصنيفنا.

Deadpool

من أهم واشهر أفلام الـ Super Heroes فى 2016 وفى التاريخ بشكل عام.. بداية من التترات المختلفة عن باقي الافلام وحتي السيناريو والحوار الملىء بالسخرية والتريقة على كل شىء حتي على الشركة المنتجة والأبطال.. كل العوامل دي بتخلينا نختار Deadpool كواحد من أفضل الأفلام فى 2016، على الرغم من العملية الجراحية والإستئصالية اللى قامت بها الرقابة المصرية واللى أثرت على فهمنا لأمور كتير فى الفيلم، لكن فى النهاية يظل الفيلم قوي ومؤثر ومتميز.

Fantastic Beasts and Where to Find Them

ممكن نختلف أو نتفق على شخصية هاري بوتر ومجموعة الأفلام اللى قدمتها الكاتبة العبقرية (جي كي رولنج)، لكن لا يمكن نختلف على مدي أهمية الشخصية والكاتبة وسلسلة الأفلام.. وبالتالى نقدر نعتبر فيلم Fantastic Beasts and Where to Find Them واحد من أهم الأفلام فى 2016، لإنه بيمهد لسلسة أفلام بنعتقد أنها هاتكون قوية ومؤثرة وقد لا تقل أهمية عن سلسلة أفلام هاري بوتر. صحيح السلاسل القوية مش بتبان من اللحظة الأولي.. لكن التمهيد اللى قدمه الفيلم يُحترم جدا، وتضافرت فيه عناصر التمثيل والمؤثرات الخاصة والأخراج والسيناريو، علشان يقدموا لنا فيلم متميز ولازم نضعه فى قائمتنا.

Hacksaw Ridge

فيلم تاريخي ومقتبس عن قصة حقيقية قوية وملهمة… كل العناصر دي كانت لازم تخلى النور ينور فى دماغنا ونقرر اختيار Hacksaw Ridge كواحد من أفضل الأفلام فى 2016… الأروع من التمثيل والسيناريو والحوار فى الفيلم هو القصة المقتبسة عن أحداث حقيقية بتحكي عن جندي رافض للتجنيد الإجباري بيجد نفسه فى المعارك الأمريكية ضد الألمان واليابانيين فى الحرب العالمية الثانية… العالم ده كله والتناسق القوي بين القصة الحقيقية والفيلم بتخلينا نختاره كواحد من أفضل الأفلام فى 2016.

Kubo And The Two Strings

قصة الفتي الصغير (كوبو) واللى بيعيش حياة بسيطة وهادئة جداً فى إحدى قرى اليابان وبيعيش على صناعة الأوريجامي وتقديم عروض سحرية بسيطة.. على الرغم من بساطة القصة لكن عمق الفيلم وملائمته للكبار قبل الصغار، كلها عوامل جعلتنا نرشح الفيلم كواحد من أفضل الأفلام فى 2016 والحقيقة اننا نقدر نقول ان 2016 كانت واحدة من السنوات اللى أفلام الانيميشن احتلت فيها نصيب كبير جدا وامتازت الأفلام دي بغزارة انتاج وعمق فى القصة واهتمام كبير بالتحريك والأداء الصوتي.

The Conjuring 2

جه الوقت إننا نتكلم عن أفلام الرعب… الحقيقة أفلام الرعب فى 2016 كانت ضعيفة جداً وعلى غير المستوي إطلاقاً.. لكن الجزء الثاني من The Conjuring  كان مستواه متميز جدا، وتشاركت المؤثرات الخاصة مع الموسيقي التصويرية وطبعاً الأداء التمثيلي من فيرا فارميجا و باتريك ويلسون و فرانسيس أوكونور و خافيير بوتيت و سيمون ماكبرني و ماريا دويل كينيدي كلهم قدروا يقدموا أداء تمثيلي متميز ومقتبس عن قصة حقيقية بنشوف فى نهاية الفيلم صور من القصة الحقيقية، وتسجيلات صوتية بنعتبرها أكثر رعباً من الفيلم نفسه! على العموم محبى الفيلم هايتفرجوا ويحكموا بنفسهم.

دي كانت قائمتنا لأفضل الأفلام فى 2016.. شاركونا برأيكم عن أفضل الأفلام فى السنة الماضية، وقولولنا كنتوا تحبوا تشوفوا أفلام ايه فى القايمة بتاعتنا؟