أمان ياصاحبي: الهلس المعتاد في العيد

في كل عيد لازم يظهر لنا فيلم بيقدم شوية نكت جنسية ومواقف كوميدية معتمدة على الضرب بالاقلام والمواقف الكوميدية المبتذلة ويسمي كل ده في النهاية فيلم! أمان يا صاحبي هو الفيلم ده!

القصة

الفيلم بيحكي عن رجلين بيتزوجوا بنتين أغنياء علشان يصرفوا عليهم، لكن مجموعة من المواقف اللي المفروض أنها كوميدية بتحصل لهم أثناء الزواجة اللي بيكتشفوا بعد كده أنها خدعة كبيرة.

فريق العمل

الفيلم من بطولة سعد الصغير ومحمود الليثي والمطربة بوسي و علاء مرسي و بدريه طلبه و شيماء سيف و صوفينار. أما اخراج الفيلم فكان من نصيب هاني حمدي وتأليف سيد السبكي.

الأداء التمثيلي

طبعا من الغريب أننا نتكلم عن أي أداء تمثيلي حقيقي من أبطال معظمهم قادمين من عالم الغناء. الأداء التمثيلي كان شبه مش موجود على الرغم من أحداث الفيلم نفسها مش محتاجه أداء تمثيلي كبير لكن في النهاية كل المطلوب من الفيلم هو مجموعة من الاستعراضات والايفيهات وخلاص على كده!

السيناريو والحوار والأخراج

سيناريو الفيلم كان عبارة عن مجموعة من المشاهد الغير مترابطه مع بعضها البعض، وكانت مهمة السيناريو انه يخلط خيط واهي وضعيف من الأحداث علشان يبرر الأغاني والاستعراضات والنكت في الفيلم! أما الحوار فوقع عليه العبء بالكامل علشان يخلق حالة الكوميديا في الفيلم وطبعا فشل الحوار في أي شيء كوميدي غير النكت والايفيهات المعتمدة على ضرب الليثي بالقلم زي ما بيحصل في معظم أفلام السبكي!

الديكورات والموسيقى والأزياء

طبعا من العبث اننا نتكلم عن الديكورات او الأزياء في فيلم زي امان ياصاحبي، لكن لازم نعترف ان الفيلم بيقدم مجموعة من الأغاني والاستعراضات اللي بتعجب شريحة معينة من الجمهور، وممكن نعتبر دي الحسنة الوحيدة للفيلم.

الخلاصة

لو بتحب سعد الصغير والليثي وصوفينار وبوسي وعاوز تتفرج على شوية استعراضات واغاني تناسب حالة العيد.. فيلم امان يا صاحبي هايعجبك.

علشان تبقى عارف:

محمود الليثي بطل الفيلم من مواليد يونيو 1979 بالأسكندرية. وهو في الأساس درس في