إزاي تبقى مؤثر على السوشيال ميديا؟ في ٢٠١٨ نصائح دعاء سليط
على الرغم من أن كلنا تقريباً عندنا حسابات على مواقع التواصل الإجتماعي والسوشيال ميديا، لكن مش كلنا قادرين نكون مؤثرين ونعمل بوستات تجيب تفاعل كبير وتحصد ألاف اللايك والشير والكومنت.
توجهنا بأسئلتنا لدعاء سليط متخصصة السوشيال ميديا Social Media Specialist واللي علاقتها بالمجال من أواخر التسعينات لما كانت السوشيال ميديا مقتصرة على تطبيقات زي ICQ وماسنجر، وحتى ظهور فيس بوك وتويتر وتطورهم حتى اليوم. دعاء حاصلة على شهادات من معاهد دولية متخصصة في التسويق الإلكتروني بشكل عام والتواصل الإجتماعي بشكل خاص.
في البداية سألنا دعاء عن ظاهرة ملاحظينها، وهي إن البوستات التافهة هي اللي بتجيب تفاعل كبير على السوشيال ميديا، بينما كتير من الموضوعات الجادة مش بتاخد نفس القدر من الأهتمام.
دعاء بتقول: حاليا التوافه بقت محتوي قوي لجذب الإنتباه ، تحليلي الشخصي أولا إن في حالة عامة من إنحدار الذوق العام وبالتالي الحاجات التافهه بقت تلاقي تفاعل ملحوظ، ثانيا في نوع من تفريغ الطاقة نتيجة الضغوط في الحياة فتلاقي الناس بتحاول تملي الفراغ اللي في عقلها وتخفف حدة مشاكلها اليومية بالتفاعل علي الحاجات التافهه طبعا ده غير البوستات الي بيتم ترويجها بالعمد ودي بيتصنع لها ترافك لأغراض التسويق والدعاية. أما البوستات الجادة ليها جمهور ليس بقليل لكن كل مافي الامر ان هتلاقي الشريحه دي ماعندهاش فراغ أوقت يسمح لها بالتواجد لوقت طويل على السوشيال ميديا.
بعد كده سألنا دعاء سليط عن نصايحها للناس اللي عاوزه تبقى لها فولورز كتير على مواقع السوشيال ميديا فقالت:
الصبر هو أول نصيحة لأن علشان تبني مجتمع من الأصدقاء المتفاعليين بجد إنت محتاج وقت وصبر كبير ده لو إنت مش من اصحاب ضربات الحظ اللي بتحصل مع الانفلونسرز (المؤثرين) اللي تم إختراعهم والتنوير عليهم في مجالات عده.
أما ثاني نصيحة انك تكون نفسك وتحدد إهتماماتك علشان تكون مميز وصاحب بصمة لأن اغلبية الناس علي مواقع التواصل الإجتماعي عايزة تبقي ناس تانية ومبسوطة انها بتتظاهر بغير حقيقتها وده كتير بيتكشف وحصل أكثر من مرة على شبكات تواصل إجتماعي أن حسابات مشهورة أكتشف الناس أنها حسابات وهمية أو لأشخاص تانيه.
أما ثالث نصيحة هي إنك تعرف إمتي تستغل الترند لصالحك وإمتي متستخدموش ، وإزاي تتابع الهاش تاج العالي وتكتب فيه علشان تحقق تواجد … وآخر نصيحة متفكرش إنك تستني الناس تيجي تتواصل معاك.. بالعكس خليك إنت المبادر وإخلق حلقات التواصل ووسع دايرتك ومع الوقت هتلاقي إن المجتمع بتاعك بيوسع وبيزيد بشكل طبيعي .
أما أخر أسئلتنا لدعاء سليط متخصصة السوشيال ميديا كان عن الفرق بين البروفايل الشخصي وبروفايل الشركات فقالت لنا:
البروفايل الشخصي أكثر خصوصية ولو هنتكلم عن الفيسبوك على سبيل المثال فانت بتختار مين يتابعك ومين تتابعه ومين ممكن يشوف كتاباتك ومين ميشوفهاش وممكن تعمل بلوك (او بلوق حسب ترند الايام دي مع رضوي الشربيني) أما بروفايل الشركات فهو صفحة عامة مطروحة للكل مطلوب إنها تكون واجهة للشركة فالمتحتوي لازم يرتبط بالخدمة أو السلعة اللي بتتقدم وبيعرض مميزاتها وبيسوق لها ، كمان بروفايلات الشركات لازم تكون وسيلة سهلة للتواصل مع الجمهور اللي مطلوب منك كشركة تتواصل معاه .
أسئلة أكتر كانت عندنا لدعاء، وإجابات تانيه مستفيضة قالتها لنا عن إزاي تكون حياتنا على السوشيال ميديا أفضل وأكثر فائدة لنا على المستوى الشخصي والعملي، هاننقلها لكم في موضوعات قادمة في القريب العاجل.
