اتعلم معانا… إيتيكيت السينما
سواء كان عندك اشتراك فى أحدث قنوات الستلايت… أو حتي عندك تليفزيون 77 بوصه أحدث موديل.. هاتفضل السينما فسحة لا يمكن الإستغناء عنها فى أي خروجة.. هاتفضل الشاشة الضخمة وتجربة المشاهدة مع الجمهور والصوت المجسم قادرة على جذب الجمهور المحب للأفلام من أخر الدنيا.
لكن السينما –زيها زي أي مكان عام- ليها ايتيكيت لازم الناس تتبعه فى التعامل بداخل قاعات العرض، وفيه قواعد مهمة لازم ناخد بالنا منها علشان نقضى تجربة مشاهدة لطيفة علينا وعلى باقي الجمهور اللى بيتفرج معانا على الفيلم… وده اللى هانحاول نشرحه دلوقت.
-
أثناء حجز التذكرة
من أكتر الحاجات اللى بنلاحظها وبتضايقنا.. الصفوف الطويلة أمام شباك التذاكر لحجز الأفلام، وخصوصاً فى مواسم الأعياد وشم النسيم ولما بيكون في فيلم مكسر الدنيا بيتعرض فى السينما.. ياتري الزحمة دي سببها إيه؟
السبب فى الغالب هو عدم التزام عدد كبير من الجمهور بإيتيكيت حجز التذكرة، بمعني إنك بما إنك واقف فى الطابور مستني دورك حاول تطلع الفلوس من محفظتك وحاول قدر الإمكان إن الفلوس تكون فكه، وإنك تكون محدد مسبقاً المكان اللى ناوي تقعد فيه علشان توفر على موظف الحجز الوقت والمجهود وتوفر على باقي المشاهدين وقت إنتظار مالوش داعي.
الحجز على الإنترنت النهردة أصبح أسهل وأسرع بكتير من الحجز من شباك التذاكر ودي فكرة تانية تجنبنا الوقوف والزحمة، لكن لو لا بد من الوقوف يبقى لازم نلتزم بالإيتيكيت وطبعا ماينفعش ما نلتزمش بالطابور نفسه لإن دي مخالفة لابسط قواعد الأدب والمنطق.
-
داخل صالة الإنتظار.
قبل عرض الفيلم بيقدر الجمهور ينتظر فى قاعة مخصصة للإنتظار، وبيكون فيها كافيتيريا لطلب الطعام والشراب، ولازم نعرف إن ممنوع دخول قاعة العرض بأكل وشرب من خارج الكافيتيريا، والحقيقة إن ده قرار مش فى محله لإن المأكولات والمشروبات فى كافيتيريا صالة العرض بيكون مبالغ جداً فى أسعارها، وبيستغل أصحاب السينمات النقطة دي لمحاولة زيادة ربح المكان.
التدخين مسموح فى الكافيتيريا وصالة الإنتظار قبل بداية الفيلم، لكن ياريت لو تلتزم بقواعد الإيتيكيت والذوق وما تدخنش جنب أطفال أو جنب شخص متضايق من ريحة الدخان، وافتكر دايماً إن مش كل حاجه من حقك تعملها هى بالضرورة تصرف سليم.
فى اختيار الأكل اللى هاتاخده معاك قاعة العرض ياريت تركز على إن الأكل ده مايكونش بيعمل صوت عالى اثناء أكله أو فتحه زي البطاطس المقلية مثلا، ومايكونش له رائحة نفاذة ممكن تضايق باقي الجمهور زي اللب مثلاً، وفى راينا إن الفيشار هو الوجبة الخفيفة المثالية اللى تقدر تاكلها بدون ما تضايق حد وفى نفس الوقت تستمتع بيها أثناء مشاهدة الفيلم.
-
داخل قاعة السينما
وممكن نعتبر ده الجزء الرئيسي لموضوعنا… لأن أهم جزء فى إيتيكيت التعامل فى السينما هو التعامل داخل القاعة نفسها واثناء عرض الفيلم… هانحاول نلخص لكم إيتيكيت التعامل داخل القاعة فى نقط سريعة ومختصرة:
- ممنوع التدخين تماماً داخل قاعة العرض، وتقدر تستني الإستراحة فى منتصف الفيلم علشان تشرب سيجاره.
- بلاش تتكلم كتير بصوت عالي مع أصحابك اللى جنبك.. وبلاش تقوم كتير علشان تتكلم فى الموبايل خاصة لو كنت قاعد فى منتصف القاعة علشان ما تتعبش الناس اللى قاعده جنبك فى كل مرة بتقوم فيها.
- إختار الأكل اللى هاتاخده معاك القاعة ودي نقطة اتكلمنا عنها بالتفصيل من شويه
- أسوأ حاجه ممكن تعملها فى السينما انك تحرق الأحداث سواء بقصد أو بدون قصد من خلال تعليق بصوت عالي أو إنك تكلم اللى جنبك وتكتشف إن الصف اللى انت قاعد فيه كله سامع حرقك للأحداث!
- مش معني إن الفيلم كوميدي إن كل اللى فى القاعة مايبقوش سامعين الأحداث من صوت ضحكك، ومش معني إن الفيلم مرعب إنك تنط كل شويه فى مكانك وتبهدل الناس معاك، ومش معني إن الفيلم عميق إنك تخرج الناس من المود بسؤالك كل شويه لصاحبك عن الأحداث!
- لو القاعة فاضية والأماكن تسمح حاول تسيب كرسي واحد فاصل بينك وبين اللى جنبك لو ماتعرفوش.. ده هايريحك ويريحه ويخلي القعده فى القاعة أحسن وممكن تستغل الكرسي الفاضى لو معاك شنطة أو أي شىء تاني.
- بلاش تحط رجلك على ضهر الكرسي اللى قدامك لإن ده سلوك مش حضاري أبداً، ولو عاوز تحس براحة ممكن تحجز فى صفوف معينة فى السينمات بيكون أمامها مساحة فاضية، ولو قدامك ناس قاعده يبقى ممنوع تماما إنك تحط أقدامك على ضهر الكرسي بتاعهم علشان ده هايتعبهم ويضايقهم طول فترة العرض.
- حاول قدر الإمكان تكون صامت وهادىء معظم الوقت.. إعمل موبايلك Silent لو ينفع أو حتي Vibration Onlyوحاول تقلل تعليقاتك على الفيلم للحد الأدني.. حاول ما تتكلمش مع أصحابك وما تلعبش فى الموبايل اثناء الفيلم.
ملخص إيتيكيت السينما هو إنك تحط قدامك طوال الوقت فكرة إنك مش لوحدك وإن حواليك ناس لازم تحترمهم علشان يحترموك، واللى ماتحبش إن حد يعمله معاك ما تعملوش مع الناس، وافتكر إنك سايب التليفزيون والقهوة وداخل السينما مخصوص علشان تستمتع بتجربة المشاهدة مع جمهور تاني فا حاول تتبسط وتبسط الناس معاك فى نفس الوقت.
شاركونا فى التعليقات بتجاربكم فى السينمات.. وايه تاني تحبوا تضيفوه على ايتيكيت السينما؟
