احلى إعلانات في رمضان ٢٠٢٢
من فترة طويلة نسبيا، تحولت الإعلانات من مجرد مقاطع فيديو قصيرة علشان تروج لسلعة أو خدمة معينة، لفن قائم بذاته. الإعلان هو فن توصيل رسالة، في فترة زمنية قصيرة جداً. وده اللي خلانا عاوزين نتكلم معاكم عن أحلى إعلانات شوفناها في رمضان ٢٠٢٢ من منظور فني مش بس بحسابات المشاهدات وتريندات السوشيال ميديا.
عمرو دياب.. الأحلى.. الأغلى!
https://www.youtube.com/watch?v=TantVyEo7sg
مع الساعات الأولى لبداية شهر رمضان الكريم، بدأ عرض أول إعلانات الموسم، من خلال طرح البريد المصري لإعلان (السر) اللي ظهر فيه عمرو دياب، وهو بيمارس الرياضة عند علامات أيقونية في مصر. مع أغنية هاديه نسبيا من حيث اللحن لكن حماسية في كلماتها.
على السوشيال ميديا الناس كان عندها حالة من الذهول، لأننا مش متعودين على اعلان بالتكلفة دي من هيئة زي البريد المصري، وهو ده الهدف الأساسي من الإعلان، هو تسويق البريد المصري كمؤسسة حكومية لها مئات السنين في التعاملات اليومية للمواطن، وفي نفس الوقت هي قادرة تواكب العصر، وقادرة تمول اعلان ضخم يخليها تنافس إعلانات البنوك اللي بيقدم البريد خدمات مشابهة لها.. زي عمرو دياب بالظبط اللي كل ما نتخيل أنه تقدم في السن و (راحت عليه) يفاجئنا بألبوم أو تراك شبابي جدا ياخد الترند لصالحه ويعلم على الكل.
اللي حب اعلان عمرو دياب هايحب اعلان بنك مصر.. واللي قدمته الفنانة شيرين.. بعد كل المعاناة اللي عانت منها الفترة الأخيرة، بتقدم لنا اغنية (يامعافر) – اللي نص مصر سمعتها على أنها شتيمة على فكرة- ودي نفس المنطقة اللي بيلعب فيها بنك مصر كل سنة.. أغنية مالهاش علاقة مباشرة بخدمات البنك لكن بصوت مطربين بنحبهم وبتدعوا للتفاؤل والقتال علشان نحقق أهدافنا في الحياة – أو يمكن المعافرة علشان ناخد دور في طابور البنك؟ – احنا رأينا نخلينا مع الهضبة أحسن!
https://www.youtube.com/watch?v=_fLgknT8Hh0
لازلنا مع عمرو دياب.. واعلانه التقليدي مع (فودافون) اللي بيتعاون معاها بقى له فترة.. لكن المرة دي اعلان (اللي بينا حياه) من فودافون كان مختلف قوي وجميل جدا…
الإعلان بيستعرض قصة حب شاب وبنت، وازاي العلاقة دي بتقوى وتستمر من خلال وسائل الاتصال الحديثة واللي بتلعب فودافون دور الأسد فيها… سواء تغطية الشبكة أو خدمات الانترنت وغيرها.
إعلان مختلف.. جميل.. هادي.. والأحلى فيه هو أن صناعه لعبوا على تفاصيل صغيرة قوي لكن لها مفعول السحر عندنا.. منها مثلا الهوية البصرية، أننا بنشوف الألوان المميزة لشعار فودافون في كل حاجه حوالينا في الإعلان. بالإضافة لاختيار ولد وبنت لهم ملامح مصرية طيبة وأسرة مصرية من اللي بنصادفها كل يوم في حياتنا.. واختيار مواقف جميلة بنتعرض لها باستمرار.. كل ده مع صوت عمرو دياب اللي لا يختلف عليه اتنين ولحن سهل يدخل دماغنا وصعب يخرج منه.. ده اللي خلى اعلان فودافون السنة دي من أحلى الإعلانات. بعيد إعلانات السنين اللي فاتت اللي بدأت تبقى تقليدية ومكررة.
اورانج والبطولة النسائية!
https://www.youtube.com/watch?v=TvJLYF8ApVk
اورانج زي ما عودتنا، بتلعب على فكرة (الونستالجيا) من خلال إعادة احياء أغاني قديمة عن الربيع والجو الجميل، لكن باستخدام نجمات الصف الأول في مصر.. منى زكي اللي لسه اثارتها للجدل بعد مشاركتها في فيلم (أصحاب ولا أعز) من ناحية، ونيللي كريم اللي أصبحت متخصصة في ترند مسلسلات الدراما والعياط (استنوا رأينا في مسلسلها الرمضاني “فاتن أمل حربي” قريبا) ودينا الشربيني اللي مشاركاتها في الإعلانات والبرامج والأعمال الفنية بتزيد يوم بعد يوم. كل دول كانوا أبطال اعلان اورانج رمضان ٢٠٢٢ مع الاهتمام بفكرة الألوان المستمدة من شعار اورانج، مع ابراز للربيع اللي بتدور حواليه فكرة الإعلان بالكامل. بحيث شوفنا في النهاية لوحة جميلة مبهجة ربيعية. تتناسب مع أجواء رمضان السنة دي.
وي.. نوستالجيا كمان وكمان
https://www.youtube.com/watch?v=zJ7Q7bIVd_4
ولأن النوستالجيا مضمونة النجاح.. قررت شركة WE أن ده يكون موضوع إعلانها.. من خلال الاستعانة بياسمين عبد العزيز و كريم محمود عبد العزيز.. والسبب الأساسي لنجاح الإعلان هو الكيميا الجميلة بينهم. بالإضافة لأن الإعلان فكرنا بليالي رمضان زمان والمقارنة بينها وبين رمضان دلوقت.
مكتوبة علينا مكتوبة
https://www.youtube.com/watch?v=5Zi6X0yOwXA&t=170s
ولأن الأحلى دايما بنحب نخليه للأخر.. اعلان شبكة (زين) للاتصالات واللي بتعمل عظمة كل سنة.. بتقدم لنا السنة دي اعلان جميل جدا من بطولة نادين نجيم وغناء حلا الترك. عن ازاي الناس ممكن تخاف من الحرب العالمية الثالثة بينما احنا بنمر كل يوم بحروب مختلفة. ضد التنمر. ضد تلويث البيئة.. ضد عمالة الأطفال. وغيرها من الأمور..
مانقدرش نقول أن كان فيه اعلان خارج توقعاتنا في ٢٠٢٢.. كل الشركات بتلعب من منطقة الأمان بتاعتها، وبتعيد التأكيد على رسايلها التسويقية المعتاده كل سنة. يمكن لأن الشركات دي كبيرة ولها سياسة تسويقية طويلة المدى.. لكن علشان نكون مُنصفين، ورغم أن مافيش تجديد في إعلانات رمضان، لكن على الأقل بنشوف اهتمام بالصورة والكادرات الرايقة وتوظيف كويس جدا للألوان والمزيكا.. وفرصة نسمع أصوات جميلة بحجم الهضبة وشيرين وغيرهم.