اختفاء… نهاية النكد وبداية الغموض والتشويق!
“لسة بوز! لسه في الدموع كنوز!”
جملة قصيرة في اعلان اتصالات في رمضان السنة دي على لسان نيللي كريم، يعرفنا أنها عارفة أن قطاع كبير من المشاهدين زهق من تقديمها لمسلسلات (النكد) والمأسي الإنسانية والمشكلات الاجتماعية. علشان كده قررت نيللي أنها تغير جلدها السنة دي وتقدم لنا مسلسل اعتماده الأساسي على الدراما والغموض والتشويق.
وعلشان هي نيللي كريم مش أي حد. المسلسل كان مُغرق في الغموض والتشعب.. بيلعب على فترتين زمنيتين مختلفتين تماما، وبتقدم نيللي من خلالها شخصيتين متقاربتين لكن بيجمع بينهم سر غريب!
الشخصية الأولى هي شخصية الدكتورة الجامعية فريدة المنشاوي اللي بتقرر تسيب شغلها وترجع مصر علشان تتابع اعلان زوجها السابق (هشام سليم) الروائي الشهير عن روايته الجديدة (اختفاء) اللي بيتهم فيها رجل اعمال شهير (قام بدوره محمد ممدوح) بارتكاب جريمة قتل من فترة طويلة.
ومع اقتراب موعد إطلاق الرواية بتبدا مجموعة من الأحداث الغامضة أهمها اختفاء الكاتب الشهير وحريق في دار النشر. لكن فريدة بتقدر توصل لنسخة من الرواية. ومن هنا بيبدأ الجانب الثاني في المسلسل، وهو استعراض حياة (نسيمة) – بتقوم بدورها نيللي كريم برضو- .. البنت المجنونة اللي عاشت في فترة ما قبل ثورة 1952 وارتبطت عاطفيا بفنان… ثم بتستمر الأحداث الشيقة.
سيناريو المسلسل محكم جدا.. متشابك وعميق والكاتب أيمن مدحت قدر يغوص فيه ويسحبنا معاه لأعماق القصة اللي بنجد نفسنا متورطين فيها من الحلقة الأولى. لكن التورط ده كان هايكون ناقص لولا مجهود المخرج أحمد مدحت في توضيح التفاصيل وفك خيوط التشابك بين الأحداث أول بأول علشان نكون دايما في الصورة.
لكن على صعيد أخر جايزة أسوأ ماكياج هاتكون من نصيب محمد ممدوح اللي اظهاره بصورة رجل عجوز كان مبالغ فيه جدا، لكنه لم يؤثر على أداء الفنان اللي قدر يتغلب على مشكلة مخارج الألفاظ عنده من رمضان الماضي في مسلسل نحن لا نطفىء الشمس. وبشكل عام ده تعاون جديد بين (تايسون) وبين نيللي كريم اللي سبق وقدموا فيلم (بشتري راجل) قبل كده مع بعض.
هشام سليم وعلى الرغم من قلة ظهوره على الشاشة لكنه قدر يقدم شخصية قوية ومميزة وكانت حاضرة مع المشاهدين طوال الوقت وده شيء يحسب له.
موسيقى المسلسل قوية ومميزة لكن المتابعين من خلال اليوتيوب هايتعبوا جدا من حذف كتير من المقاطع الصوتية بسبب حقوق الملكية الفكرية. والصراحة الموضوع ده متعب ومتكرر مع كتير من المسلسلات واللي بينسى صناعها أن المتابعة النهردة على اليوتيوب أصبحت بالملايين وده شيء لازم يتم الاهتمام به.
اختفاء مش أقوى مسلسل في رمضان 2018 لكنه مسلسل يستحق المتابعة وعامل زي جبل الجليد.. اللي ظهر من الأحداث دلوقت أقل بكتير من المستخبي في باقي أيام رمضان.. خلينا نشوف ايه اللي هايحصل!
