اقوى 10 نجوم في 2018
أسماء كتير بتلمع في عالم النجوم في 2018. لكننا قررنا نختار أفضل 10 بس علشان نجمعهم لكم في تقريرنا عن أفضل النجوم في 2018. ياتري مين هم؟
أسر ياسين
واحد من النجوم اللي أثبتوا براعة تمثيلية كبيرة في 2018. ويكفيه دوره المميز في فيلم تراب الماس المأخوذ من الرواية الشهيرة لأحمد مراد واللي بتحمل نفس الإسم. مش قادرين ننسى مشهد نوبة الصرع في الفيلم واللي أداها (أسر) ببراعة منقطعة النظير.
محمد ممدوح
تميز محمد ممدوح مكانش في 2018 بس. الحقيقة أن كل أدوار محمد ممتازة جدا. وقدر يبعد عن حصر المخرجين له في أدوار معينة بسبب تكوينه الجسدي المميز. لكن ممدوح قدر يقدم مستويات مختلفة من الأداء في كتير من الأعمال السينمائية والدرامية على حد سواء. ودوره في فيلم تراب الماس يشهد على ده.
أكرم حسني
الصاروخ الكوميدي المنطلق بأقصى سرعة. مجرد وجود إسم أكرم حسني على أفيش فيلم أو مسلسل يعتبر ضمان لصريخ من الكوميديا والضحك المتواصل. وسواء دوره في فيلم البدلة أو مسلسل الوصية. قدر أكرم يقدم أدوار ممتازة وكوميديا من العيار الثقيل.
ظافر العابدين
أداء هادي وواثق من نفسه. واهتمام بكل جملة حوارية وكل مشهد بيقوم بيه. كل العوامل دي ساعدت على أننا نختار ظافر العابدين كواحد من أفضل الفنانين في 2018. خاصة بعد مشاركته في المسلسل القوي ليالي أوجيني واللي قدر يقدم من خلاله شخصية مركبة فيها كتير من التناقضات واللي أظهرت قدراته التمثيلية.
ياسر جلال
صاروخ فني مش بيعرف الهبوط أبدا.. هو ده ملخص التاريخ الفني لياسر جلال اللي أعاد اكتشاف نفسه من خلال الأعمال اللي قدمها في السنتين الأخيرتين. ودوره في مسلسل رحيم كان يعتبر تأكيد على أنه نجم كبير قادر يحفر مكانه بقوة في عالم النجوم المصرية والعربية.
أمير كرارة
نجم أكشن صاعد بقوة الصاروخ في عالم الفن. امير كرارة بيؤكد في كل دور يقوم به أنه فنان قادر يتعب على نفسه ويشتغل عليها. مش بس علشان يطور قدراته العضلية والجسدية، لكن كمان قدراته التمثيلية والفنية.
ماجد الكدواني
بدون مبالغة. ماجد الكدواني واحد من أنجح وأفضل الفنانين في مصر والعالم العربي. مش بس في 2018 لكن على مستوى تاريخه الفني بالكامل. الكدواني بيثبت في كل فيلم بيقوم ببطولته على قداته الغير عادية على تجسيد أي دور يُسند له. سواء درامي أو كوميدي أو حتى أعلان صغير بيقوم به. الكدواني (جوكر) حقيقي بيسد في أي مكان يتحط فيه.
عمرو عبد الجليل
من الكوميديا للدراما. ممثل شامل قادر يتنطط بين مستويات الأداء المختلفة بسهولة يُحسد عليها. ناهيك أنه تربي فنيا على يد عملاق بحجم يوسف شاهين. كل العوامل دي بتخلي أداء عمرو عبد الجليل واحد من أفضل الأدوار اللي شوفناها في مسلسل طايع في 2018
باسل خياط
مسلسل الرحلة اللي تم عرضه في 2018 مش بس قدم لنا ممثل رائع هو باسل خياط. هو كمان عرفنا على ابعاد مختلفة يقدر باسل يقدم بيها شخصياته، واللي بتتميز بأنها أدوار مركبة وصعبة جدا. لكن باسل قدر يأدي شخصيته في المسلسل بشكل رائع ومميز.
أحمد أمين
لازم لا نحصر أحمد أمين كممثل مساعد لأكرم حسني. أمين موهبة كوميدية متفجرة قادر على أنه يحول أي موقف يحصل قدامه الى حالة متفجرة من الضحك. ومشاركته في مسلسل الوصية كانت مجرد تأكيد على كونه كوميديان بييلعب في منطقة خاصة جدا هو اللي ابتكرها لنفسه.
