البدلة: أحلى فيلم كوميدي في العيد ولا ايه؟!

على الرغم من زيادة عدد أفلام الكوميديا اللي بنشوفها مؤخرا إلا أنه من الصعب أننا نقول على فيلم معين إنه ضحكنا فعلا. علشان كده فرحنا لما حسينا إن فيلم البدلة مش مجرد رص لمجموعة من الايفيهات الكوميدية لكن وراه مجهود مبذول واهتمام بالتفاصيل.

البدلة بيحكي عن تامر حسني وأكرم حسني اللي بيحضروا حفلة بأزياء ضباط شرطة، في محاولة منهم للتنكر، لكنهم بيكتشفوا أن (البدلة) ممكن تفتح لهم أفاق كتيرة وتكتسب لهم احترام وهيبة مكانوش يتوقعوها، الأمر اللي بيدخلهم في سلسلة من المواقف الكوميدية اللي مش بتنتهي واللي تم استغلالها ببراعة وإتقان.

على الرغم من أننا شوفنا الأحداث دي قبل كده في فيلم Let’s be cops لكن تم تمصيرها بشكل جيد، واستغلال مكونات القصة علشان تناسب المجتمع المصري والعربي بشكل كبير. ومن هنا بتيجي أهمية أيمن بهجت قمر ككاتب مش بيستسهل التقليد الأعمي وبيحب يحط بصمته المميزة والناجحة في أي عمل بيقوم بكتابته.

المخرج محمد جمال العدل قدم لنا مؤخرا مجموعة من الاعمال المهمة زي مسلسل أرض النفاق و لأعلى سعر والخروج وحارة اليهود، وعلى الرغم من أن تقديم الاعمال الدرامية هو الغالب على سيرته الذاتية لكنه أثبت انه قادر على التنوع في نوعية الاعمال اللي بيقدمها وقدر يقدم كادرات رشيقة ومتعوب عليها وخارج التصنيف المعتاد لأفلام العيد اللي بيغلب عليها الاستسهال ومحاولة تصوير اكبر قدر من المشاهد في مكان واحد أو اثنين فقط.

أكرم حسني قادر يقدم لنا دويتوهات سينمائية قوية مع كتير من نجوم مصر، وبعد نجاحه في مسلسل الوصية في رمضان الماضي قدر يثبت لنا انه موهبة كوميدية مميزة، والدويتو بينه وبين تامر حسني مميز جدا وان الاتنين قادرين (يباصوا) لبعض ايفيهات ومواقف كوميدية كتير خليتنا ندمع من كتر الضحك!

البدلة فيلم كوميدي مميز وفي رأينا هو أفضل كوميديا في عيد الأضحى 2018

نصيحة كايرو360: أكرم حسني كان في الأساس ضابط شرطة لكنه فضل الاستقالة والعمل في مجال الفن والتمثيل والكوميديا.