الثمن : هل يستحق (ثمن) تذكرة السينما؟!

الثمن  هو إسم الفيلم العربي اللى عرضته دور العرض المصرية مؤخرا فى السينمات.. وعلى الرغم من الدعاية اللى حظي بيها الفيلم وبطولة عمرو يوسف اللى اصبح واحد من اشهر الفنانين فى مصر حاليا، الا ان عدد مشاهدي الفيلم فى القاعة لما اتفرجنا على الفيلم كان قليل جدا..

من تأليف وإنتاج أمل عفيفي، وإخراج هشام عيسوي وبطولة عمرو يوسف و صبا مبارك، بنشوف قصة سائق تاكسى فقير، بيحاول يحصل على الفلوس بأي شكل علشان يعالج زوجته (سهر الصايغ) من مرض خطير جداً، وفى نفس الوقت بيتلقي عرض من رجل مشبوه (صلاح عبد الله) لقتل كاتب ومفكر مشهور (عبد العزيز مخيون).. وبتستمر الأحداث بعد كده علشان نشوف طبيعة علاقة (صلاح عبد الله) بـ(صبا مبارك) وغيرها من الأسرار.

على الرغم من الفكرة العامة الجيدة للفيلم، الا ان تنفيذ الفكرة وتحويلها لفيلم مكتمل الأركان واجته كتير من المشاكل، بداية بالسيناريو اللى كان مهلهل وضعيف وغير مترابط، ومروراً بالحوار الضعيف والهزلى فى بعض الأحيان ونهاية بالإخراج اللى فشل فى اقناعنا بأي شىء بخصوص الأحداث، أو حتي الحبكة الرئيسية للفيلم القائمة على فكرة قتل رجل الأعمال للمفكرين بدعوي الكفر والألحاد.

عمرو يوسف وبعد مشاركته فى فيلم بنعتبره ناجح زي (كذبة كل يوم) مش عارفين ليه بيشارك فى فيلم من نوعية (الثمن)، كمان صلاح عبد الله وهو صاحب تاريخ كبير ومشرف فى السينما العربية مش عارفين ليه يقبل على نفسه بنوعية الدور ده، على الرغم من قدرته على اداء الدور بشكل جيد إلا إن الدور ومساحته بالكامل غير ملائمين لـ(عبد الله) وثقله فى السينما المصرية.

الحقيقة اننا فى غني تماما عن اي كلام عن الموسيقي التصويرية او الديكورات وغيرها من عوامل صناعه الافلام، لان كل العوامل دي لم يتم الاهتمام بها فى الفيلم وتم التعامل معاها باستهتار شديد، ويمكن دي من اكتر عوامل عدم نجاح الفيلم من وجهة نظرنا

(الثمن) فيلم كان ممكن يكون افضل من كده لو كان تم الاهتمام بعوامل صناعته اكتر من الشكل اللى ظهر علينا فى صورته النهائية، لان الـ Cast الخاص بالفيلم متميز جداً وكان ممكن يخرج منه افضل من كده…فقط نرجوكم بعض الإهتمام!