الجيل الرابع : ارحموا الجيل
على الرغم من الجودة النسبية للتريلر الخاص بالفيلم، ونزوله فى موسم عيد الأضحي اللى بتتنافس فيه مجموعة من الأفلام الضعيفة واللى ماعليهاش اقبال –باستثناء فيلم اهواك- الا ان (الجيل الرابع) للأسف فشل فى انه يجذب انتباهنا او يجعلنا مهتمين بمتابعة الأسكتش الشبه كوميدي اللى استمر على مدار ساعتين ثقيلتين على نفسنا الى ابعد الحدود!
الفيلم من تاليف عمرو سمير عاطف واخراج احمد نادر جلال، وهم من الاسماء اللامعة فى عالم السيت كوم، لكن الفرق كبير بين عمل فيلم كوميدي مكتمل وبين عمل مسلسل سيت كوم قائم على فكرة ان الحلقات يمكن مشاهدتها بشكل منفصل.. للاسف المفهوم ده اختلط عند الثنائى اللى كتب واخرج الفيلم وجعلهم يقدموا لنا سيت كوم على مدار ساعتين متصلتين!
الفيلم بيحكي عن عدد من المواقف الكوميدية اللى بيقع فيها مجموعة من الشباب نتيجة سوء حظهم وخروجهم من ورطة الى ورطة.. الاسم الاشهر فى الشباب اللى قاموا بالفيلم هو احمد مالك، واللى شوفناه مؤخراً فى محاولة كوميدية تانية اقوي وافضل بالمقارنة بالجيل الرابع وهى فيلم اهواك مع تامر حسني وقبل كده شوفناه فى الجزء الثاني من فيلم الجزيرة مع النجم احمد السقا..
فكرة اختيار مالك للـVoice Over الخاصة بالفيلم كانت سيئة جداً، يمكن لان مخارج الصوت عنده مش واضحة او لأنه بيتكلم بسرعة، بالأضافة للاعتماد على الموسيقي التصويرية طوال أحداث الفيلم تقريبا بلا انقطاع، وفى خلفية كل المشاهد بلا تفرقة، ونعتقد ان الموسيقي كان فيها لمحة واضحة من (الأقتباس) من فيلم Pulb Fiction اخراج العبقري (كوانتن ترانتينو).
طبعا غني عن التعريف اننا نقول ان الاحداث الدرامية فى الفيلم كلها قائمة على سلسلة واحدة لا تنقطع من (ورطه-هروب-مشهد كوميدي-ورطه-هروب-مشهد كوميدي).. الخ فى تكرار جعلنا نخاف فى نهاية الفيلم اننا مش هانخرج من الـLoop ده للأبد! ودي كانت اسوأ عيوب الفيلم من وجهه نظرنا.
بعض المشاهد كانت متميزه فعلا زي مشاهد المطاردات بالسيارات او المشهد اللى بيتم تحويل الفيلم بالخدع السينمائية لمشهد (كوميكس) واللى على الرغم من قصره كان مشهد متميز.
من الأمور اللى ضايقتنا فى الحوار الاعتماد على الألفاظ الخارجة على اساس انها ممكن تكون مصدر للكوميديا.. طبعا مش هاننسى فيلم (اهواك) اللى كان فيه نفس النوعية من الالفاظ تقريباً لكن بتكثيف اكبر، وواضح ان هناك اتجاه عام مؤخراً لتقديم الشتائم على انها شىء كوميدي المفروض نضحك عليه!
الجيل الرابع فيلم كان عاوز يبقى كويس.. لولا انه تم التعامل معاه على انه سيت كوم طويل !
