الديزل: هل محمد رمضان فعلا (نمبر وان)؟!

على الرغم من الفرقعة السينمائية والفوائد الكبيرة اللي ممكن تعود على ممثل او فنان لما يقول دايما انه رقم 1. لكن ده بيخلي دائما معدل محاسبة الجمهور له عالية، ومش بيقبلوا ابدا انه يكون رقم 2 وبيحاسبوه على أي وقعة فنية تصدر منه. لكن محمد رمضان في فيلم الديزل كان واخد باله كويس جدا من النقطة دي وهو بيشتغل على فيلم الديزل.

الديزل بيحكي عن شاب بيشتغل في مجال السينما كدوبلير مشاهد خطرة وسائق لفنانة مشهورة (ياسمين صبري) لكن بيقع في مشكلة كبيرة مع تنظيم عصابي بيستهدفه هو وخطيبته (هنا شيحه) بقيادة مجرم خطير هو فتحي عبد الوهاب.

مش عاوزين نخوض أكتر من كده في تفاصيل القصة علشان ما نحرقش المشاهدة على محبي الفيلم، لكننا لاحظنا في السيناريو والقصة اللي كتبها امين جمال ومحمود حمدان و محمد محرز، إهتمامهم باظهار رمضان في صورة الشخص العادي مش السوبر هيرو، كمان شخصيته لها ابعاد تانيه اعمق من مجرد مشاهد الاكشن اللي بيقدمها، مع محاولة للابتعاد عن الايفيهات المعتادة  من محمد رمضان في كل اعماله ومحاولة تركيزه المرة دي في الشخصية اللي بيقوم بيها.

المخرج كريم السبكي قدم قبل كده فيلم قلب الأسد مع محمد رمضان في 2013 وهنا التعاون الثاني بينهم. والحقيقة ان كريم بيحاول يقدم بعض المشاهد والكادرات اللي حسينا انها مُتكلفة شوية لكن من ناحية تانية هو مخرج متميز بيحاول يكون له بصمة واضحة في كل الاعمال اللي بيقدمها مش مجرد انه يكون كادرات وخلاص.

بالنسبة للاداء التمثيلي محمد رمضان زي ما قولنا كان اكثر تركيزا على الشخصية، لكن من ناحيه تانيه سيناريو الفيلم لم يهتم بما فيه الكفاية بباقي الشخصيات ولم يفرد لها مساحة علشان تقدم انفعالات وتمثيل حقيقي. فتحول الفيلم كأن محمد رمضان ينافس محمد رمضان!

الديزل مش افضل فيلم اكشن شوفناه في مصر، لكنه محاولة من ممثل مجتهد انه يقدم عمل يرضي بيه جمهوره. والعبرة النهائية مش مين هو (نمبر وان) لكن مين قادر انه يقدم فن يستمر بعد رحيله ويخلي الناس تفتكره دايما.

علشان تبقى عارف:

محمد رمضان بيظهر في الفيلم بشخصيته الحقيقية بالإضافة للشخصية اللي بيلعبها في الفيلم.