الفندق: فيلم عربي عن الخيانة الزوجية

على الرغم من أن الموسم الشبه رسمي لطرح الأفلام العربية بيكون في مواسم الأعياد ورأس السنة، إلا أننا أحيانا بنشوف أفلام بتحاول التحليق خارج السرب ده، وده شيء يستحق التحية لو كانت الأفلام دي قوية وتستحق المشاهدة. تعالوا نتعرف أكتر على فيلم (الفندق).

القصة

الفيلم بتدور أحداثه في أحد الفنادق مع اكتشاف أحد الأزواج لخيانة زوجته، وسعيه للانتقام منها، في نفس الوقت اللي بنشوف فيها أسباب الخيانة دي وازاي الهجر وعدم الاهتمام بالزوجة ممكن يدفعها للدخول في علاقات غير مشروعة مع أخرين.

فريق العمل

الفيلم من أخراج  عاطف شكري وتأليف  أسامة فهمي وبطولة علا غانم و محمد نجاتي و أحمد كرارة و أحمد الحلواني و إبرام سمير و أحمد صادق

الأداء التمثيلي

علا غانم بتحاول من جديد تقف على رجليها سينمائيا بعد سلسلة من الاختيارات الخاطئة في الفترة الأخيرة، والحقيقة أننا شايفين أن علا فنانة موهوبة لكنها مش بتحسن اختياراتها، ومش عارفه لحد الأن تقف على أرض صلبة أو تجد لنفسها مساحة قوية من الأداء التمثيلي. ونتمني أنها في اختياراتها القادمة تكون أكثر توفيقا وتحديدا.

محمد نجاتي وأحمد كراره بيقدموا أداء تمثيلي يقع في خانة المقبول، وقدروا يجسدوا المطلوب منهم في السيناريو، لكن لم نشعر بروحهم الحقيقية في الأحداث، يعني حسينا أنهم مجرد ممثلين بتأدي دورها في الفيلم وخلاص، وكنا متوقعين منهم أداء تمثيلي أفضل من كده.

السيناريو والحوار والأخراج

سيناريو الفيلم حاول يجتهد ويقدم أحداث مشوقة وجديدة ومختلفة، لكن المحاولة دي وقفت قدامها كتير من العقبات زي الإنتاج مثلا اللي حسينا أنه مش قوي وماقدرش يقدم فيلم غنى على مستوى الديكورات وأماكن التصوير مثلا، كمان الإخراج كان محتاج يبقى أقوى وأكتر احترافية واكتر اهتماما بتقديم أحداث أقوى للمشاهدين.

الديكورات والموسيقى والأزياء

ديكورات الفيلم والموسيقى الخاصة به كانت متواضعه، وفي رأينا الفيلم بكافة عناصره كان محتاج اهتمام أكبر من كده ومساحة إنتاجية أفضل.

الخلاصة

فيلم (الفندق) كان ممكن يكون فيلم أفضل لو توفرت له عوامل أفضل من كده  على كافة الأصعده.

علشان تبقى عارف:

تصنيف الفيلم +16 بسبب موضوع الفيلم اللي بيتناول الخيانة الزوجية