الكويسين: هل قدم كوميديا “كويسه”؟
فيلم الكويسين يعتبر واحد من الأمثلة العادية عن الافلام الكوميدية النمطية اللي بتنو وتزدهر في فترة الأعياد. وعلى الرغم من اقبال المشاهدين بشكل اكبر في الفترة الاخيرة على افلام الاكشن الا ان الافلام الكوميدية لسه قادرة تسيطر على ساحة الافلام في العيد.
(الكويسين) بيحكي عن عائلة الكويس. العائلة اللي كل موقف من مواقف حياتها بيتحول لمجموعة من المواقف الكوميدية اللي مش بتتوقف من بداية الفيلم لنهايته تقريبا. والكوميديا في الفيلم بتتنوع ما بين كوميديا المواقف وكوميديا الايفيه. وعلى الرغم من سيطرة كوميديا الايفية على منتصف الفيلم الاول تقريبا، من بداية النصف الثاني قرر ايمن وتار مؤلف الفيلم التركيز على الكوميديا النابعة من المواقف بالشكل الأساسي. وده كان من القرارات الموفقة في الفيلم.
أحمد الجندي في موقع الاخراج قدم اداء جيد وغير متكلف. وحاول قدر الامكان يقلل من تمدد السيناريو اللي أصابنا ببعض الملل خاصة في النصف الاول من الاحداث. وبشكل عام قدر الجندي يوظف امكانيات ابطال الفيلم في اماكنها الصحيحة.
اداء احمد فهمي لدور مظهر كويس كان اعتيادي. وحسينا ان فهمي مش بيعمل اي مجهود علشان يقدم شخصية مختلفة عن باقي الشخصيات اللي قدمها في اعماله السابقة سواء الدرامية او السينمائية.
حسينا باعجاب كبير بادوار الفنانات الشابات اسماء ابو اليزيد و تارا عماد و جيلان علاء واللي قدرت كل واحدة منهن انها تقدم اداء تمثيلي قوي ومختلف. وخاصة اسماء ابو اليزيد واللي فاكرين لها دورها المميز في مسلسل هذا المساء.
الكويسين فيلم كوميدي تقليدي من افلام مواسم العيد. ننصح بمشاهدته لو عاوزين تفضوا دماغكم من اي حاجه لمدة حوالي ساعتين.
علشان تبقى عارف: ايمن وتار مؤلف الفيلم كتب بعض حلقات مسلسل الوصية اللي تم عرضه في رمضان الماضي. كمان كان واحد من فريق العمل في برنامج البرنامج مع باسم يوسف.
